गुल्मी : गुल्मीको इस्मा गाउँपालिकाले गाउँपालिकाभित्र पाँच वटा गाई र भैंसी पाल्ने कृषकलाई मासिक १० हजार रुपैयाँ दिँदै आएको छ ।
गाउँपालिकाले आर्थिक वर्ष २०७९/०८० मा ६ वटा कृषि फर्मलाई मासिक १० हजार रुपैयाँका दरले गाई भैंसी हेरालु खर्च भनेर रकम उपलब्ध गराएकोमा चालु आर्थिक वर्ष २०८०/०८१ मा गाउँपालिकामा ४ वटा फर्मले पाँच वटाभन्दा बढी दुहुना गाई र भैंसी पाल्दै आएको र उनीहरुलाई पनि मासिक १० हजारका दरले पैसा उपलब्ध गराइएको गाउँपालिका कृषि शाखा प्रमुख तुल्सी थापाले बताए । नयाँ फर्म दर्ता भएर मापदण्ड पूरा गरेको खण्डमा नयाँले पनि १० हजार रुपैयाँ पाउने उनले बताए ।
गाउँपालिकामा दर्ता भएको नमुना कृषि तथा पशुपन्छी फर्ममा हाल ९ वटा दुहुना गाई रहेका छन् । गाउँपालिकाको वडा नम्बर ५ मा रहेको उक्त फर्मले अघिल्लो आर्थिक वर्षदेखि नै निरन्तर पाँच वटाभन्दा बढी दुहुना गाई पाल्दै आएको छ । त्यस्तै वडा नम्बर १ मा रहेको गौरव कृषि तथा पशुपन्छी फर्ममा हाल दुहुना गाई र भैंसी गरी ९ वटा रहेका छन् । त्यस्तै वडा नम्बर ६ मा रहेको घिमिरे कृषि तथा पशुपन्छी फर्ममा पनि ९ वटा दुहुना गाई र भैंसी रहेका छन् । वडा नम्बर २ मा रहेको गगन गृष्मा कृषि तथा पशुपन्छी फर्ममा ८ वटा गाई र दुहुना भैंसी रहेका छन् । यी फर्महरुले पनि आर्थिक वर्ष २०७९/०८० देखि नै गाई भैंसी हेरालु खर्चको रुपमा मासिक १० हजार रुपैयाँ पाउँदै आएका छन् ।
गाउँपालिकाभित्रका कृषकहरूलाई कृषिमा थप हौसला प्रदान गर्नका लागि गाउँपालिकाले मासिक १० हजार रुपैयाँ उपलब्ध गराउन थालेको गाउँपालिकाका अध्यक्ष भगत सिंह खड्काले बताए । खड्काले कृषि र पशुपन्छीको क्षेत्रमा गाउँपालिकाले काम गर्ने खोजेका धेरै विषयमा नागरिक उत्साहित नभएको बताए । उनले अनुदानको अपेक्षा मात्र गर्ने, तर कामलाई व्यावसायिकरण गर्न नखोज्नु दुःखद रहेको बताए । काम गर्न खोज्ने व्याक्तिलाई गाउँपालिकाले निरुत्साहित नपार्ने उनले बताए ।
त्यस्तै गाउँपालिकाकी उपाध्यक्ष अधिवक्ता पार्वती कुँवरले गाउँपालिकाले प्रदान गरेको अनुदान किसानलाई सहयोग मात्रै भएको बताइन् । उनले भनिन्, 'उहाँहरुलाई हामीले गरेको काममा हाम्रो पालिका साथमा छ भन्ने अनुभूति मात्रै दिलाउन खोजेका हौं ।'
व्यावसायिकरुपमा सञ्चालनमा आएका फर्महरुमा आफू स्वयं अवलोकन र अनुगमनमा समेत पुगेको र कृषकको मिहिनेत देखेर खुसी लागेको उनले बताइन् । उनले इस्मा दुधमा आत्मनिर्भर बन्दै गएको बताइन् । उनले भनिन्, 'स्थानीय स्तरमा हुने कार्यक्रममा दुध खपत गर्दा पालिका बाहिरबाट खरिद गर्नु परेको छैन, यो हाम्रा लागि सुखद पक्ष हो ।'
