भविष्यमा चर्चितभन्दा पनि कुशल मोडल तथा कलाकार बन्ने सोच लिएर यस क्षेत्रमा प्रवेश गरेका बाग्लुङका स्थानीय वासिन्दा बाबुराम उपाध्यायको पछिल्लो समय कलाकारिताको साथै निर्माताको पनि उपनाम थपिएको छ । साथीहरुसँगको सहकार्यमा उनले ‘मधु रिमा’ नामक चलचित्र निर्माण गरिरहेका छन् । लोकप्रिय टेलि सिरियल ‘भद्रगोल’का बागबिरे डनको पहिचान बनाएका बाबुराम उपाध्यायले केही म्युजिक भिडियोमा पनि मोडलिङ गरेका छन् । कला क्षेत्र आफैंमा एउटा राम्रो र सम्भावना बोकेको क्षेत्र हो, जहाँबाट एउटा कलाकारले राम्रो अवसर पाउने माध्यम हुन सक्छ । अभिनय विधामा राम्रा सम्भावना बोकेका कलाकारहरुले यसैको माध्यमबाट विभिन्न अवसरहरु पाइरहेका हुन्छन् भने देश विदेशको यात्रा गर्दै संसारमा चर्चित हुने अवसर पनि जुटाइरहेका हुन्छन् । वास्तवमा कलाकारिता एउटा रहरमात्र होइन, जहाँ गर्न सके नाम र दाम दुबै कमाउन सकिने उपाध्यायको भनाइ छ । मोडलिङ वा कलाकारितालाई धेरैले आफ्नो रुची र इच्छाको रुपमा लिने गरेको भएता पनि सबैले सफलता हासिल गर्न भने सक्दैनन् । उपाध्यायले भने सफलता हासिल गरिसकेका छन् । कला क्षेत्र र व्यवसायलाई सँगसँगै अगाडि बढाउने सोचका साथ सम्भावनासहित अभिनय क्षेत्रमा प्रवेश गरेका कलाकार तथा निर्माता बाबुराम उपाध्यायले मध्यान्ह दैनिकका लागि सानु श्रेष्ठसँग गरेको कुराकानीको सम्पादित अंश :
केमा व्यस्त हुनुहुन्छ ?
केही समय पहिले दुई वटा म्युजिक भिडियोको सुटिङमा व्यस्त रहें भने यतिबेला फिल्मको कामले व्यस्त बनेको छु । मेरो आफ्नै व्यवसाय पनि भएको र कला क्षेत्रमा पनि रुचीको कारण समय मिलाउन अलि समस्या परिरहेको छ ।
अबका दिनमा व्यवसाय कि कलाकारिता ?
व्यवसायलाई प्राथमिकतामा राखेर मोडलिङ तथा कलाकारितालाई पनि अगाडि बढाउने सोच छ ।
नेपालमा कलाकारिताको भविष्य कस्तो देख्नुभएको छ ?
यो ग्ल्यामर क्षेत्र भएकोले यसलाई हेर्ने मानिसको आ–आफ्नै दृष्टिकोण हुन्छ । त्यसैले धेरै नै सुधार गर्नुपर्ने अवस्था छ । मोडल वा कलाकारिता भन्ने बित्तिकै नराम्रो सोच्ने प्रचलनलाई हटाउन सके नेपालमा पनि यस क्षेत्रको विकास हुन सक्छ । विगतको तुलनामा केही सुधार भएजस्तो देखिएपनि हामीमा एकअर्काको ईष्र्या गर्ने मानसिकतामा परिवर्तन गर्न सक्नु पर्छ ।
चलचित्रमा काम गर्ने अफर कत्तिको आउछ ?
मोफसलमा बसेर कलाकारिता गर्ने हामी जस्ता कलाकारलाई केन्द्रबाट जति नै अफर आएपनि चाहे अनुसारको चलचित्रमा काम गर्न कठिन हुन्छ । काठमाडौंसम्म आएर काम गर्दा चलचित्रबाट पाउने पारिश्रमिक भन्दा बढी खर्च हुने हुँदा चाहेर पनि अफर आए अनुसारको काम गर्न सकिँदैन । त्यसैले मोफसलबाट पनि चलचित्र निर्माण गर्न सकिने वातावरण सिर्जना हुन जरुरी देख्छु म त ।
घरपरिवारको सहयोग कस्तो छ ?
घरपरिवारको सहयोग त हुने नै भयो । आफ्नै व्यवसाय पनि भएकोले व्यवसायलाई थाँती राखेर कलाकारिता गर्न पनि मुश्किल छ । कलाकारिताबाट घरपरिवार चलाउन सकिन्न अहिलेको अवस्थामा । त्यसैले व्यवसायलाई पहिलो प्राथकिमतामा राखेर कलाकारिता गर्न बाध्य छु ।
चर्चित हास्य टेलिचलचित्र ‘भद्रगोल’का बागबिरे डनको भूमिकामा देखिनु हुन्छ खासमा तपाईं नायक हो कि खलनायक ?
‘जस्तोसुकै चरित्र र पात्र किन नहोस्, लेखकको कल्पना र निर्देशकको परिकल्पना अनुसार अभिनय क्षमता देखाउँदै आएको छु । कमेडी सिरियल ‘भद्रगोल’मा बागबिरे डन खलपात्रको भूमिकामा देखिने भएपनि मैले गरेको अभिनय सबैले रुचाउनु भएको छ । मेरो आउँदै गरेको चलचित्रमा म इमान्दार र कुशल दाजुकोे भूमिकामा देखिंँदैछु । नायक, खलनायक भन्दा पनि आफुलाई दिइएको भूमिकामा न्याय गर्न सक्नु नै बास्तविक कलाकार हो जस्तो लाग्छ । अभिनयको नवरसभित्र रहेर जस्तोसुकै चरित्रको अभिनय गर्न सक्छु भन्नेमा म विश्वस्त छु । त्यसैले म एउटा कलाकार हुँ ।
तपाई त हास्य सिरियलमा पनि खलपात्रको भूमिकामा देखिनु हुन्छ दर्शकको रुचीमा के भिन्नता पाउनु भयो ?
अहिलेका दर्शक भनेका बलिउड, हलिउड जस्ता ठुलो बजेटमा निर्माण हुने चलचित्रबाट प्रभावित छन् । उहाँहरुले राम्रोसँग बुझ्नु भएको छ कलिउड कसरी अघि बढ्दैछ भन्ने कुरा । त्यसैले सबैलाई थाहा भएकै कुरा हो पछिल्लो समयमा रोमान्टिक, लभस्टोरी, एक्सन भन्दा हास्य चलचित्रको दबदबा रहेको अवस्थामा गैरहास्य कलाकारहरू समेत हास्य चलचित्र वा सिरियलमा आकर्षित भएका छन् । हास्य कलाकारलाई नै मुख्य नायक बनाएर निर्माण भएका चलचित्रहरू व्यावसायिक रुपमा सफल भएको उदाहरण छन् ।
कसरी यो क्षेत्रमा लाग्नुभयो ?
मनिसको जीवनमा एक समय यस्तो आउँदो रहेछ फिल्म नखेले पनि स्वयंलाई हिरो ठान्ने । ममा पनि त्यो अवस्था नआएको होइन । सिनेमा हेरेर हलबाट निस्कँदा आफुलाई त्यही फिल्मको हिरो सम्झन्थें । त्यो उमेरको माग पनि होला तर बास्तविक रुपमा फिल्म खेल्ने चाहना भने मनमा थिएन । फिल्मकर्मीहरुको संगतमा घुलमिल हुन पुगेपछि भने बिस्तारै अभिनयप्रति आकर्षित हुन पुगेको हुँ । यो क्षेत्र भनेको राम्रो काम देखाउन सकिएमा छोटो समयमा नै आमरुपमा पहिचान बनाउन सबै भन्दा सजिलो माध्यम भएकोले विभिन्न उतार चढाबका बावजुद पनि अहिले मेरो यो क्षेत्रमा अलग पहिचान बनिसकेको छ ।
हास्य व्यंग्य कलाकारहरुको अवस्था कस्तो छ ?
अन्य अभिनेता भन्दा हास्य अभिनय गर्ने अभिनेताहरुको आम्दानी र सामाजिक सम्मान नेपालमा अत्याधिक रहेको पाइन्छ । यो कुराको पुष्टि पनि भैसकेको छ । हास्य व्यंग्य हाम्रो सभ्यता पनि हो । कसैको व्यांग्यात्मक, कसैको सम्वेदनात्मक आफ्नो आफ्नो तरिकाको प्रस्तुति हुने समाज हो हाम्रो । गाउँमा हुने मेला, जात्रा पर्वहरुमा पनि विशेष गरी हास्य हाउभाउ प्रस्तुत गर्ने व्यक्ति सबैको प्रिय हुन्थ्यो । नेपालमा हास्य व्यंग्य अत्याधिक रुचाइने विषय हो । आफुसँग धैर्यता र क्षमता छ भने नाम, दाम सबै पक्षबाट राम्रो देख्छु म त ।
तपाईं आर्थिकरुपले पनि सन्तुष्ट हुनुहुन्छ ?
मैले माथि पनि उल्लेख गरिसकेको छु । हामी मोफसलबाट कलाकारिता गर्ने भएकोले कठिन छ भनेर । तर पनि आफुले मिहेनत गरे अनुसार आर्थिकरुपले म सन्तुष्ट छु । किन भने जति काम गर्न सक्यो त्यति पाउने न हो ।
आजसम्म जे जति हुन सकेको छ त्यो निजि क्षेत्रको लगानी र पहलमा भैरहेको छ । यो क्षेत्रको विकासका लागि राज्य स्तरबाट के हुनुपर्छ जस्तो लाग्छ ?
नेपाली चलचित्र क्षेत्रलाई राज्यले उद्योगको दर्जा दिए पनि व्यवहारमा लागू हुन सकिरहेको छैन । अरु व्यवसाय वा कलकारखाना चलाउन चाहने व्यवसायीलाई बैंकले ऋण दिने व्यवस्था गरे जस्तै चलचित्र बनाउने कम्पनी, निर्मातालाई पनि बैंकले ऋण दिने वातावरण बन्न सक्यो भने चलचित्र क्षेत्रले छलाङ मार्ने कुरामा दुविधा रहन्न । त्यसैले आगामी दिनमा यस विषयमा सम्बन्धित निकाय गम्भिर हुन जरुरी रहेको देख्छु म ।
राज्यले किन लगानी गर्ने ?
एउटा चलचित्र बन्दा यससँग जोडिएका हजारौंको घरमा चुलो बल्छ । चलचित्र क्षेत्रले हजारौं व्यक्तिलाई उसको सीप र क्षमता अनुसारको रोजगारी दिँदै आइरहेको छ । साथै राज्यलाई कर पनि तिर्दै आएको छ । त्यसैले यसको विकासका लागि सरकारले दीर्घकालीन सोच बनाउनु जरुरी छ । यसै क्षेत्रमा आफ्नो जीवन बिताएका कलाकार, प्राविधिकहरुको वृद्धा अवस्था निकै कठिन हुने गरेको छ । उपचार नपाएर छट्पटिनु पर्ने अवस्थाको अन्त्यको लागि पनि आर्थिक सहयोग वा अनुदानको व्यवस्था हुनु आवश्यक छ ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies