काठमाडौँ : आगामी प्रतिनिधि सभा निर्वाचनलाई सामान्य आवधिक प्रक्रिया मात्र नभई मुलुकको भावी दिशा निर्धारण गर्ने महत्त्वपूर्ण अवसरका रूपमा लिनुपर्ने धारणा व्यक्त गरिएको छ । नेपाली कम्युनिस्ट पार्टीका वरिष्ठ नेता तथा पूर्व उपप्रधानमन्त्री नारायणकाजी श्रेष्ठले मतदातालाई सम्बोधन गर्दै निर्वाचन परिणामले देशको भविष्यमा निर्णायक प्रभाव पार्ने बताएका हुन् ।

सर्लाही जिल्ला क्षेत्र नं. ३ मा आयोजित चुनावी कार्यक्रमहरूमा बोल्दै उनले आफ्नो दलले निरंकुश शासन अन्त्य गरी लोकतान्त्रिक गणतन्त्र स्थापनामा महत्त्वपूर्ण योगदान दिएको उल्लेख गरे । संविधानमार्फत दलित, जनजाति, महिला, मधेसी, मुस्लिम, श्रमिक वर्ग तथा पछाडि परेका समुदायको अधिकार सुनिश्चित गर्ने आधार तयार गरिएको दाबी पनि उनले गरे ।

संघीय शासन प्रणाली लागू भएसँगै राज्य संरचना केन्द्रबाट प्रदेश, स्थानीय तह र वडा तहसम्म विस्तार भई सेवा प्रवाह नागरिक नजिक पुगेको उनको भनाइ थियो । सुशासन र भ्रष्टाचार नियन्त्रण सन्दर्भमा विभिन्न चर्चित प्रकरणहरूमा अनुसन्धान तथा कारबाही प्रक्रिया अघि बढाइएको उल्लेख गर्दै उनले कानुनी शासन सुदृढीकरणमा जोड दिएको बताए ।

मिटरब्याज समस्यालाई गम्भीर सामाजिक चुनौतीका रूपमा उल्लेख गर्दै पीडितलाई न्याय दिलाउन आयोग गठन, कानुनी पहल तथा प्रशासनिक समन्वय गरिएको जानकारी उनले दिए । राजनीतिक परिवर्तनपछि अबको प्राथमिकता शिक्षा, स्वास्थ्य, रोजगारी, खाद्य सुरक्षा, आवास, खानेपानी, विद्युत्, सडक तथा सिँचाइलगायत आधारभूत सेवामा सुधार गर्दै आर्थिक विकास र समृद्धि हासिल गर्नु रहेको पनि उनले बताए ।

अन्त्यमा उनले संविधान, गणतन्त्र, संघीयता, समावेशीकरण र सुशासनको संरक्षणका लागि आफ्नो दललाई समर्थन गर्न आग्रह गर्दै मतदातालाई निर्वाचन चिह्नमा मतदान गर्न अपिल गरेका छन् ।