काठमाडौँ : आन्दोलनका क्रममा तोडफोड, लुटपाट र आगजनीबाट क्षतिग्रस्त बनेको भाटभटेनी सुपरमार्केट महाराजगञ्ज करिब छ महिनाको मर्मत तथा पुनर्निर्माणपछि पुनः सञ्चालनमा आएको छ ।

सुपरमार्केटको पुनः उद्घाटन अवसरमा संस्थाका अध्यक्ष मीनबहादुर गुरुङ लगायतको उपस्थितिमा धार्मिक अनुष्ठान सम्पन्न गरी सर्वसाधारणका लागि सेवा पुनः सुरु गरिएको जनाइएको छ । आन्दोलनको घटनाबाट भवन संरचना पूर्ण रूपमा क्षतिग्रस्त भएपछि पुनर्निर्माण कार्य चरणबद्ध रूपमा अघि बढाइएको थियो ।

उक्त आन्दोलनको प्रभाव देशभर रहेका १२ वटा स्टोरमा परेको थियो । तोडफोड तथा आगजनीका कारण ठूलो आर्थिक क्षति पुगेको र भवनभित्र रहेका सामग्री नष्ट भएको कम्पनी स्रोतले जनाएको  छ। घटनाका क्रममा केही व्यक्तिहरू जलेको अवस्थासमेत भेटिएको उल्लेख गरिएको छ ।

यसअघि नै भाटभटेनी सुपरमार्केट कोटेश्वर पनि पुनर्निर्माण सम्पन्न गरी सञ्चालनमा आइसकेको छ । पुनः सञ्चालनमा ल्याइएका संरचनाहरूमा क्षतिका दृश्य र राष्ट्रिय प्रतीकात्मक भवनहरूको तस्बिर समेटिएको सन्देशमूलक प्रस्तुति राखिएको छ, जसमा सिंहदरवार, सर्वोच्च अदालत र संघीय संसद भवन का दृश्यहरू समावेश छन् ।

घटनापछि भवन लामो समय सञ्चालनमा आउन नसक्ने अनुमान गरिए पनि पुनर्निर्माण सम्पन्न गरी सेवा पुनः सुरु गरिएको कम्पनीले जनाएको छ । व्यावसायिक पूर्वाधार पुनर्स्थापनाले निजी क्षेत्रको पुनरुत्थान सम्भावना र सेवा निरन्तरताप्रति सकारात्मक सन्देश दिएको सरोकारवालाहरूको धारणा छ ।