काठमाडौँः नेपाल चेम्बर अफ कमर्सका उपाध्यक्ष दीपक मल्होत्राले रेमिटेन्समाथिको निर्भरतालाई कम गर्दै नेपालमा प्रवासी नेपालीहरूको पुँजीलाई उत्पादनमूलक क्षेत्रमा लगानी गर्ने वातावरण निर्माण गर्नुपर्ने बताएका छन् ।

गैरआवासीय नेपाली संघ (एनआरएनए) को १२ औँ ग्लोवल कन्फरेन्सलाई सम्बोधन गर्दै उपाध्यक्ष मल्होत्राले रेमिटेन्सले देशको अर्थतन्त्र धाने पनि यसले मुख्यतया उपभोग मात्र बढाएको भन्दै अब उद्यमशीलता र औद्योगिक विकासमा ध्यान केन्द्रित गर्नुपर्ने बताए । मल्होत्राले आर्थिक वर्ष २०८२/८३ को पहिलो ६ महिनामा मात्रै नेपालले १० खर्ब ६२ अर्ब ९३ करोड रुपैयाँ (करिव ७.५ अर्ब डलर) रेमिटेन्स प्राप्त गरेको बताए ।

उनले यो अघिल्लो वर्षको तुलनामा ३९.१ प्रतिशतको वृद्धि भएको बताए । नेपाली श्रमिकहरू उच्च आय हुने मुलुकमा जानु, डलरको मजबुती, वित्तीय सेवाको डिजिटलीकरण र हुन्डी जस्ता अनौपचारिक माध्यमको नियन्त्रणका कारण रेमिटेन्स बढेको उनको भनाइ छ । प्रवासी नेपालीको लगानी भित्र्याउन नेपालले समग्र पारिस्थितिकी प्रणाली (इकोसिस्टम) विकास गर्नुपर्ने बताए । नीतिगत स्थायित्व र लगानी विश्वास, संस्थागत संयन्त्र, नवीन वित्तीय उपकरण, रणनीतिक लगानी क्षेत्रहरू (पर्यटन, कृषि, सूचना प्रविधि र पूर्वाधार) तथा ज्ञान हस्तान्तरण र उद्यमशीलतामा जोड दिए ।