काठमाडौँ : नेपाली कांग्रेसले आफ्नो भ्रातृ संस्था नेपाल विद्यार्थी संघ (नेविसंघ) अन्तर्गतको सिनेटले पार्टी संरचनाबाट अलग रहने भन्दै गरेको निर्णयलाई अस्वीकार्य ठहर गर्दै त्यसले अनुशासनसम्बन्धी कारवाही निम्त्याउन सक्ने चेतावनी दिएको छ ।

सानेपामा जारी केन्द्रीय समिति बैठकका क्रममा प्रवक्ता देवराज चालिसेले पार्टी विधानले व्यवस्था गरेका निकायले आफूलाई अलग घोषणा गर्नु राजनीतिक र कानुनी दृष्टिले उचित नहुने स्पष्ट पारे । उनका अनुसार लोकतान्त्रिक अभ्यासअन्तर्गत असहमति र प्रतिक्रिया व्यक्त गर्न सकिए पनि ती गतिविधि विधानको दायराभित्रै रहनुपर्ने हुन्छ ।

उनले उक्त निर्णय पार्टी अनुशासन र मर्यादासँग जोडिएको संवेदनशील विषय बन्न सक्ने संकेत गर्दै यसलाई स्थापित सीमाभन्दा बाहिरको कदमका रूपमा व्याख्या ग । बैठकमा यो विषय औपचारिक रूपमा उठिसकेको पनि जानकारी गराइएको छ ।

यसैबीच, सिनेटको निर्णयप्रति असहमति जनाउँदै र अध्यक्ष दुजाङ शेर्पाविरुद्ध कारवाहीको माग राख्दै नेविसंघकै एक समूह पार्टी कार्यालय पुगेको थियो । ज्ञापन पत्र बुझ्दै महामन्त्री गुरुराज घिमिरेले नेविसंघको ऐतिहासिक भूमिकालाई स्मरण गराउँदै यस्तो संस्थालाई अलग राख्ने विषय पार्टीकै अधिकार क्षेत्रभित्र पर्ने बताए ।