बिनोद थापामगर/मध्यान्ह
कतार : निर्देशक भूपेन्द्र गुरुङको निर्देशनमा बनेको नेपाली फिल्म ‘कप्टी’को पहिलो स्पेसल शो बेलायतमा हुने भएको छ ।
बुधबार निर्माण टिमले एक पोस्टर सार्वजनिक गर्दै आगामी १९ जुन २०२२, मा सामुयल कोडि स्पोर्टस् कलेज फान्बोरोमा प्रदर्शन हुने घोषणा गरेको हो । चलचित्रमा चर्चित कलाकारहरु शेरबहादुर गुरुङ, उर्मिला गुरुङ, उमेश गुरुङ, स्मृति बलामी, गिरिप्रसाद पुन (लाहुरे दाइ) केशव राई, सोनी गुरुङलगायतको बेजोड अभिनय रहेको छ ।
सोलुखुम्बुको जुबु, मैदेल गाउँ, गोकियो रि, कालिन्चोक, लमजुङको डाँडाथोक गाउँ र इलाममा छायांकन गरिएको मौलिकपनको नेपाली कथानक चलचित्र ‘कप्टी’मा मदन काश्यप घिमिरेको छायांकन, बन्दे प्रसादको सम्पादन, समिर मियाको कलर र भी एफ एक्स, आश्रम गुरुङको शब्द/संगीत गायक/गायिका आर के नेपाली, धर्मेन्द्र सेवन, मेलिना राईको स्वर रहेको फिल्मको निर्माता मोहनकुमार खत्री, प्रेमबहादुर गुरुङ, मिनु लामा र अमेरिका निवासी मनिता गुरुङ र सहनिर्माता नातीकाजी गुरुङ रहेका छन् ।
भ्याली फिल्म एकेडमी प्रा.लि.को ब्यानरमा बनेको नेपाली फिल्म 'कप्टी'को स्पेसल शो निर्देशकको गाउँले परिवार डाँडाथोक युरी परिवारले आयोजना गरेको हो भने तमु छोज धीं यूकेका महासचिव इलम पोखरी समाजका अध्यक्ष परशु गुरुङ, तमु छोज धीं यूकेका सल्लाहकार लमजुङ समाज यूकेका कोषाध्यक्ष पूर्णराज गुरुङ र यूकेमा धेरै कार्यक्रमहरुमा कलाकारका संयोजन गर्ने कलाकार तथा समाजसेवी कुमार गुरुङको सहयोग र संजोकत्वमा प्रदर्शन हुन लागेको हो ।
गाउँले परिवेश रीतिथिति गाउँठाउँकै रहनसहन संस्कृति उजागर, पुरानो खेल ठेलो, प्रौढ शिक्षा कुरा गरिएको चलचित्रमा संसार कप्टीहरुको हातमा जान्छ तर छलकपट धेरैबेर टिक्दैन भन्ने सन्देश बोकेको चलचित्र हो 'कप्टी' । चलचित्र राम्रो बनेको बताउँदै निर्माता मोहन कुमार खत्रीले सबै दर्शकलाई हेर्न अनुरोध गरेका छन् ।
चलचित्र प्रदर्शनको लागि यूकेपछि युरोप, जापान, अस्ट्रेलिया, कतार, क्यानाडा, अमेरिकामा कुरा अगाडि बढेको र चाँडै प्रदर्शन मिति घोषण हुने निर्माता खत्रीले बताए ।
मौलिक चलचित्रहरुलाई साथ सहयोग र प्रोत्साहनको निमित्त चलचित्र 'कप्टी' हेर्न आइदिन यूकेवासी सम्पूर्ण नेपाली दाजुभाइ, दिदीबहिनीहरुलाई निर्देशक गुरुङले अनुरोध गरेका छन् । यूकेमा अन्य ठाउँहरुमा शो, टिकेटलगायत थप जानकारीका लागि परशु गुरुङ, पूर्णराज गुरुङ, कुमार गुरुङलाई सम्पर्क गर्न सकिने जनाइएको छ ।
देश विदेशको स्पेसल र च्यारटी शो गरेपछि मात्र नेपालको हलमा प्रदर्शन मिति घोषणा हुने पनि निर्देशक गुरुङले बताए । यूके शो भव्य सफलताको निमित्त सम्पूर्ण सञ्चारकर्मी, समाजसेवीलगायत यूकेवासी नेपाली दाजुभाइ, दिदीबहिनीहरु तथा सम्पूर्ण यूकेमा रहेको संघ संस्थालगायत सबैलाई निमन्त्रणा गरिएको आयोजक डाँडाथोक युरी परिवारले जानकारी गराएको छ ।
