काठमाडौं : अख्तियार दुरुपयोग अनुसन्धान अयोगले बाग्लुङको काठेखोला गाउँपालिकाका तत्कालीन प्रमुख प्रशासकीय अधिकृतसहित ६ जनाविरुद्ध भ्रष्टाचार मुद्दा दायर गरेको छ ।
अख्तियारले तत्कालीन प्रमुख प्रशासकीय अधिकृत खिम बहादुर विक, तत्कालीन सब–इञ्जिनियर नवीन थापा, असिस्टेन्ट सव–इञ्जिनियर सनोज उपाध्याय, उपभोक्ता समितिका अध्यक्ष अम्मर बहादुर गुरुङ, सचिव चेलीमाया थापा र कोषाध्यक्ष गगन बहादुर कार्कीविरुद्ध बुधबार विशेष अदालत काठमाडौंमा मुद्दा दायर गरेको हो ।
अख्तियारका सहायक प्रवक्ता वेदप्रसाद भण्डारीका अनुसार गाउँपालिकास्थित नालढुङ्गा (घुँडेखोला) खानेपानी योजनामा नापी किताब अनुसारको पाइप प्रयोग नगरेको, एक्लेखेतघाट ह्यूमपाईप आयोजनामा कमसल सामग्री प्रयोग गरी अनियमितता गरेको भन्ने उजुरीका आधारमा अनुसन्धान हुँदा तत्कालीन प्रमुख प्रशासकीय अधिकृत विक, तत्कालीन सब–इञ्जिनियर थापा र असिस्टेन्ट सव–इञ्जिनियर उपाध्यायले सम्झौतामा उल्लेख भएबमोजिम सुपरीवेक्षण गर्न, गुणस्तर कायम गर्न र यथार्थ कार्यको नापजाँचको लागि सम्बन्धित साइट प्राविधिकलाई जिम्मेवारी नतोकी नापी कितावमा सही गरी सहमति जनाई नभए नगरेको कार्यको समेत झुट्टा बिल भरपाई बनाई/बनाउन लगाई गलत मूल्याङ्कनमा प्रत्यक्ष सहभागी भएको, इष्टिमेटबमोजिम नभए नगरेको कार्यको समेत नापी किताव तयार गरी भुक्तानीका लागि सिफारिस गरेका थिए । उनीहरुले २ लाख ३९ हजार २८४ रुपैयाँ हानिनोक्सानी गरी भ्रष्टाचार गरेको पुष्टि भएको अख्तियारले जनाएको छ ।
साथै, उपभोक्ता समितिका अध्यक्ष गुरुङ, सचिव थापा र कोषाध्यक्ष कार्कीले सम्झौता गरिएको एक्लेखेतघाट ह्यूमपाईप निर्माण आयोजनाको सम्झौता बमोजिम ह्यूमपाईप राख्दा गर्नुपर्ने लगायतकाे लगत इष्टिमेटमा तोकिएका कामहरु गर्नुपर्नेमा सो नगरी/नगराई स्थलगत रुपमा नभएको नगरेको कार्यको समेत झुट्टा बिल भरपाई बनाउने, कार्यभन्दा बढी नापी कितावमा चढाउन लगाई सोहीबमोजिमको भुक्तानी लिने ठहर गर्दै सोही बराबरको मागदावीसहित आरोपपत्र दायर गरिएको अख्तियारले जनाएको छ ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies