काठमाडौं : एमजी इलेक्ट्रिक गाडी किन्न चाहनेहरुले अब एनआईएमबी बैंकबाट वित्तीय सुविधा पाउने भएका छन् । नेपालमा एमजी मोटर्सको अधिकृत बिक्रेता पारामाउन्ट मोटर्स प्रालि र एनआईएमबी बैंकसँग सोसम्बन्धी साझेदारी भएसँगै ग्राहकहरुले त्यस्तो सुविधा पाउने भएका हुन् । साझेदारीअनुसार एमजी मोटर्सका इलेक्ट्रिक गाडीहरु खरिद गर्ने ग्राहकहरुले एनआईएमबी बैंकबाट ८० प्रतिशतसम्मको वित्तीय सुविधा पाउने बैंकले जनाएको छ ।
बैंककाअनुसार यस साझेदारीअन्तर्गत एमजी इलेक्ट्रिक गाडीहरु, जसमध्ये एमजी जेडएस ईभी, एमजी४ ईभी र एमजी कमेट ईभी समावेश छन्, खरिद गर्न इच्छुक ग्राहकहरुले एनआईएमबी बैंकको कुनै पनि शाखाबाट सरल वित्तीय विकल्पहरु प्राप्त गर्न सक्नेछन् । प्रतिस्पर्धी ब्याजदर र अनुकूलनशील सर्तहरुसहितको यो सुविधाले ग्राहकहरुका लागि सहज र सजिलो प्रक्रिया सुनिश्चित गर्ने विश्वास गरिएको छ ।
सम्झौताअनुसार, एनआईएमबी बैंकले एमजी इलेक्ट्रिक गाडीहरुका लागि आकर्षक ब्याजदरसहितको अटो लोन प्रदान गर्नेछ, जुन आधार दरमा एक प्रतिशत प्रिमियम प्रतिवर्ष जोडिएको हुनेछ । यो वित्तीय योजना नेपाली ग्राहकहरुका लागि यातायातमा सघाउने उद्देश्यले बनाइएको हो । केवल २० प्रतिशत अग्रिम भुक्तानीको आवश्यकता भएकाले ग्राहकहरुले कुनै पनि एमजी इलेक्ट्रिक गाडी, जसको प्रभावशाली दायरा र उन्नत सुविधाहरु छन्, अत्यधिक सुलभ मूल्यमा प्राप्त गर्न सक्नेछन् । सो अटो लोन तीन कार्य दिनभित्रै स्वीकृत गरिने बैंकको भनाइ छ ।
