रौतहट : निर्वाचित वडाध्यक्षसहितका स्थानीयहरुले वृन्दावन नगरपालिकास्थित वागमती नदीबाट नदीजन्य पदार्थ उत्खनन गरिरहेका एक्जाभेटर र ट्याक्टरमा तोडफोड गरेका छन् ।
आइतबार वडा नम्वर २ का वडाध्यक्ष सिकिन्द्र पटेल र वडा नम्वर ४ का अध्यक्ष श्याम यादवले स्थानीय बासिन्दाहरुलाई उचालेर बागमती नदीमा उत्खनन गरिरहेका एक्जाभेटरमाथि आक्रमण गर्दै तोडफोड गरेर क्षति पुर्याएका हुन् । उनीहरुले एक्जाभेटरको इन्जिनभित्र बालुवा समेत हालेको आरोप लागेको छ ।
उक्त स्थानमा उत्खनन भएका बालुवा गिटी लोड गर्न खडा रहेका तीन वटा ट्याक्टरमा क्षति पुर्याउँदै दुई वटा ट्याक्टरको साँचो खोसेर भागेको बताइएको छ ।
प्रतिउत्तरमा स्थानीय बासिन्दाहरुले एक्जाभेटरमाथि तोडफोड गर्नेहरुलाई लखेटेर वागमती नदी पारी सर्लाही पुर्याएका थिए ।
आक्रोशित रहेका अर्को पक्षले बलेरीखोरमा वडाध्यक्ष श्याम यादवले सञ्चालन गरेको राँगा, भैंसी फर्ममा समेत आगजनी गरिदिएका छन् ।
किन यस्तो अवस्था आयो वृन्दावनमा ?
वृन्दावन नगरपालिकाले गत असोज महिनादेखि तीन पटक नदीजन्य पदार्थको उत्खननको लागि बोलपत्र आह्वान गरेको थियो । उक्त बोलपत्र आह्वान गर्दा कुनैपनि बोलपत्र दर्ता नभएपछि बोलपत्रलाई रिभाइज गर्नुपर्ने मुल समस्या आएपछि प्रमुख प्रशासकीय अधिकृतको निरन्तर सरुवाबाट काम हुन पाएन । यता नगरपालिकाको आन्तरिक आयश्रोत समेत खेर गइरहँदा जेठ ५ गते नगरपालिकाले अमानतमा उठाउने निर्णय गर्दै स्थानीय व्यवसायीलाई २० दिनको लागि २८ लाखमा ठेक्का लगाएपछि लडाइँ शुरु भएको हो ।
वडा नम्वर २ र ४ का वडाध्यक्ष गिटीबालुवाको कारोवारी रहेको तर तीनले ठेक्का नपाउँदा यस्तो लफडा शुरु गराएका हुन् । सोही क्रममा मेयर विनोद प्रसाद कुर्मीको सवारीसाधन माथि समेत आक्रमण गरियो । अवस्थालाई सामान्य पार्न पटक–पटक उक्त स्थानमा ठूलो संख्यामा सुरक्षाकर्मीहरु परिचालन गरिँदा समेत समस्या यस्तै रहेको छ ।
नगरप्रमुख कुर्मीले कांग्रेस र माओवादीहरुले यहाँको विकास निर्माणमा पूर्ण रुपमा बाधक बनेको गम्भीर आरोप लगाउँदै भने, ‘पाँच वर्षसम्म अरु कसरी यहाँको मेयर बन्छ, आउनुस्,बस्नुस्, मिलेर छलफल गरेर समस्या समाधान गरौं ।’
