सन्धिखर्क : ‘जीवन आधारको माटो, आत्मनिर्भरता र समृद्धिको बाटो’ भन्ने मूल नारासहित सन्धिखर्क नगरपालिका, पाणिनी गाउँपालिकाका जनप्रतिनिधि, साथी सहकारी संस्थाका प्रतिनिधि र जनता एग्रो फरेष्टी काठमाडौंका प्रतिनिधिबीच सम्झौता भएको छ ।
सम्झौता भएसँगै अर्घाखाँचीका किसानले उत्पादन गरेका कृषिजन्य बस्तुको अधिकतम् मूल्यमा बजारीकरण गर्ने ग्यारेन्टीसहित सम्झौता पत्रमा हस्ताक्षर भएको सन्धिखर्क नगरपालिकाका नगरप्रमुख कृष्णप्रसाद श्रेष्ठले जानकारी दिएका छन् ।
कृषिजन्य बस्तुको उत्पादन र बजारीकरणको कार्य गर्दे आएको काठमाडौंको जनता एग्रो कम्पनीले सन्धिखर्क नगरपालिका र पाणिनी गाउँपालिकासँग गरेको सम्झौता अनुसार यहाँ उत्पादन हुने कृषि उपज सामानको बजारभाउ अनुसार उचित मूल्यमा खरिद गर्ने सहमति पत्रमा उल्लेख छ ।
सम्झौता अनुसार नगरपालिका र गाउँपालिकाले स्थानीय तहमा विभिन्न समूह बनाइ उल्लेखनीय उत्पादन गरी समूहसँग सम्झौता गर्ने र आर्थिक उपार्जन र उत्पादनको कार्यमा अगाडि बढ्नेछन् भने कम्पनी पालिका र कृषि समूहबीच दोस्रो सम्झौता गरी बस्तुबजार पठाने गरी सरकार र निजी क्षेत्रबीच सम्झौता भएको हो ।
सन्धिखर्क नगरपालिकाको सभाहलमा भएको विशेष समारोहमा बोल्दै जिल्ला समन्वय समिति अर्घाखाँचीका प्रमुख जीवनारायण कोईरालाले कम्पनीले बजारीकरणको ग्यारेन्टी, विश्वासनियता कायम गरे अर्घाखाँची जिल्लामा अझै धेरै कृषिजन्य बस्तुको उत्पादनमा वृद्धि हुने बताएका छन् ।
कोइरालाले जिल्लामा धेरै कार्यक्रम गर्ने तर सफल नहुने रोग बनेकाले यस्तो कार्यक्रमले वास्तविक किसान खुसी हुने भएकाले किसानको बीचमा कम्पनीले विश्वासको आधार तय गर्नुपर्ने बताए ।
कार्यक्रममा सन्धिखर्क नगरपालिका नगरप्रमुख कृष्ण प्रसाद श्रेष्ठले यस्तो प्रकारको सम्झौता र कार्यक्रमले सिंगो नगर पालिकालाई आर्थिक रुपमा सवल र सक्षम बनाउन महत्वपूर्ण भूमिका खेल्ने भन्दै यो कार्यक्रमलाई अभियानकै रुपमा टोल–टोलसम्म पुर्याएर नगरपालिकाले सफल बनाउने दाबी गरे ।
माटो, पानी, वातावरणका साथै किसानको मागका आधारमा कार्यक्रमलाई अगाडि बढाइने श्रेष्ठको भनाइ छ ।
नगरप्रमुख श्रेष्ठले भने,‘अब हामी तुरुन्तै गाउँ–गाउँमा कृषक समुह गठन गरी अगाडि बढ्दै छौं । पालिकाले व्यवसायिक रुपमा गर्ने किसानका लागि यान्त्रिकरण, बिउविजन, प्राविधिक विज्ञ सहयोग गर्ने छौँ, यो कार्यक्रममा हुने खेतीहरुलाई जंगली जनावर कुनै पनि असर पार्देन, अब रोजगारका लागि विदेश गएका युवाहरुलाई समेत स्वदेश फर्काउने गरी अभियानकै रुपमा हामीहरु अगाडि बढ्ने छौँ ।’
जनता एग्रो फरेष्टीका अध्यक्ष एवम् वरिष्ठ उद्योगपति पवन कुमार गोल्यानले किसानको आयआर्जनमा वृद्धि, अर्गानिक खेति, विभिन्न उत्पादन प्रक्रिया र बजारीकरणमा जोड्ने गरी कम्पनी अगाडि बढेको भन्दै किसानको क्षमता अभिवृद्धि नीति निमार्णमा र वातावरणीय परिवर्तनमा सहयोग गर्ने समेत उद्देश्य रहेको बताए ।
कम्पनीले दुई पालिकामा समूहमार्फत उत्पादन भएका अदुवा, वेसार, टिमुर, कफि, दाते ओखर, छुर्पि गाईको ध्यू खरिद गर्ने भन्दै कम्पनीको मुख्य उद्देश्य स्थानीय कच्चा प्रदार्थको प्रयोग, स्थानीय उत्पादन रैथाने बाली प्रवद्र्धन र सामुहिकतामा आर्थिक विकास र समृद्धि रहेको कम्पनीका उपाध्यक्ष भोज बहादुर शाहले बताए । कार्यक्रममा कम्पनीका विज्ञ प्रेम बहादुर लामा, पत्रकार महासंघका अध्यक्ष अशोक खनाल लगायतले शुभकामना मन्तव्य राखेका थिए । नगरप्रमुख कृष्ण प्रसाद श्रेष्ठको अध्यक्षतामा भएको कार्यक्रममा कम्पनीका उपाध्यक्ष भोज बहादुर शाहले स्वागत मन्तव्य राखेका थिए भने सन्धिखर्क नगरपालिका कृषि शाखाका प्रमुख राजेन्द्र भट्टराईले सहजीकरण गरेका थिए ।
