लहान : सिरहाको गोलबजारस्थित उत्तिमलाल मेमोरियल हस्पिटलका सञ्चालक डा. सुशीला सिंहले अस्पतालमाथि हालै लगाइएका आरोपहरूको खण्डन गरेकी छन् ।
उनले अस्पतालले मोटो रकम असुल गरेको आरोपलाई गलत, अतिरञ्जित, र भ्रामक सूचनामा आधारित भएको बताइन् । अस्पतालको छवि धमिल्याउने उद्देश्यले यस्ता आरोप लगाइएको उनको भनाइ छ ।
डा.सिंहका अनुसार, सुत्केरी महिला सीता कुमारी महतो लहान प्रादेशिक अस्पतालबाट रेफर गरेर अत्यन्तै गम्भीर अवस्थामा अस्पताल ल्याइएकी थिइन् । उनलाई लामो समयदेखि प्रसव पीडा भएको र बच्चा जन्माउन निकै कठिन भएको थियो । चिकित्सकहरूले शल्यक्रियाको तयारी गरिरहेका बेला, डाक्टरहरूको टोलीले अन्ततः सफलतापूर्वक सामान्य प्रसव गराउन सकेको थियो । जन्मिएपछि शिशुलाई श्वासप्रश्वासमा समस्या देखिएपछि आइसीयूमा राखेर उपचार गरिएको थियो ।
डा. सिंहले बच्चा ‘बर्थ एस्फिक्सिया’का कारण निस्सासिएको र बालरोग विशेषज्ञहरूको टोलीले तुरुन्तै भेन्टिलेसनको सहायतामा श्वासप्रश्वास सञ्चालनमा ल्याउन सफल भएको बताइन् । नवजात शिशुको स्वास्थ्यमा सुधार आएपछि, पाँच दिनसम्म एनआइसीयूमा राखी थप उपचार गरिएको थियो । चौथो दिनमा शिशुलाई नियोनेटल जण्डिस देखिएको र त्यसको उपचार फोटोथेरापीबाट गरिएको थियो ।
अस्पतालले सुत्केरी र नवजात शिशुको उपचारको लागि ७४ हजार रुपैयाँको बिल पेश गरेकोमा, बिरामीको आर्थिक अवस्थालाई ध्यानमा राखेर १० हजार रुपैयाँ छुट दिँदै ६० हजार रुपैयाँमा सहमति गरिएको थियो । बिरामी परिवारले ५० हजार रुपैयाँ तिरेर बाँकी १० हजार रुपैयाँ तिर्न बाँकी रहेको अस्पतालले जनाएको छ ।
डा. सिंहले बिरामीका परिवारले बाँकी रकम तिर्न आलटाल गरिरहेको आरोप लगाउँदै चाँडो बुझाउन अनुरोध गरेकी थिइन् । उनले अस्पतालविरुद्ध फैलाइएको गलत सूचना र आरोपले अस्पतालको प्रतिष्ठा बिगार्ने षड्यन्त्र भएको दाबी गर्दै, यस्ता भ्रमहरूमा नपरी सत्य तथ्य बुझेर मात्र धारणा बनाउन आग्रह गरिन् ।
अस्पतालले राज्यद्वारा निर्देशित सेवा–सुविधाहरूको पालना गर्दै आएको र जनताको स्वास्थ्य सेवामा निरन्तर काम गरिरहेको जानकारी दिएको छ ।
