लहान : धार्मिक सहिष्णुता र सामाजिक सद्भावलाई प्रवद्र्धन गर्ने उद्देश्यले लहानमा ‘हातेमालो अन्तर धार्मिक संवाद समिति’सक्रिय रूपमा क्रियाशील रहेको छ । २०७३ असोज ८ गते गठन भएको यस समितिले हिन्दू, मुस्लिम, इसाई र बौद्ध धर्मालम्बीलाई एकत्रित गरी शान्ति, सहिष्णुता र आपसी भाइचाराको सन्देश फैलाइरहेको छ ।
लहान क्षेत्र, जहाँ विभिन्न धार्मिक समुदायका मानिसहरूको सहअस्तित्व रहेको छ, केही वर्षअघिदेखि धार्मिक तनावको सामना गर्दै आएको थियो । विशेषगरी लक्ष्मी पूजाको दिन भएको विवादास्पद घटनापछि, जसमा गाईको बली र मस्जिदमा सुंगुरको टाउको फेला परेको थियो, यस क्षेत्रको सामाजिक सद्भावमा चुनौती उत्पन्न भएको थियो। यही समस्यालाई सम्बोधन गर्दै ‘हातेमालो अन्तर धार्मिक संवाद समिति’को स्थापना गरिएको थियो ।
समितिको नेतृत्वमा समग्र जनउत्थान केन्द्र र जी.आई.जेड.–सी.पी.एस.को सहकार्यमा शुरुवात गरिएको यो अभियानमा हिन्दू–मुस्लिम समुदायका प्रतिनिधिहरू प्रारम्भमा संलग्न भए । हाल यसमा क्रिश्चियन र बौद्ध धर्मावलम्बीहरू पनि सहभागी भइ ३१ सदस्यीय समिति बनेको छ, जसमा महिलाहरूको उपस्थिति उल्लेखनीय रहेको छ ।
समितिले गठन भएदेखि नै सामाजिक तथा धार्मिक समस्याहरू समाधान गर्न संवाद र सहकार्यको बाटो अपनाउँदै आएको छ । यसको प्रयासले लहान क्षेत्रमा धार्मिक सहिष्णुता र शान्तिको वातावरण सिर्जना भएको छ । समितिले मात्र लहान नगरपालिकामा सीमित नभइ, धनगढीमाई नगरपालिकासम्म पनि धार्मिक सद्भावको सन्देश फैलाउँदै आएको छ ।
समितिका गतिविधिहरूको प्रशंसा गर्दै मधेश प्रदेशका स्वास्थ्य मन्त्री शत्रुधन प्रसाद सिंह कोइरीले यसले समाजमा सकारात्मक परिवर्तन ल्याइरहेको बताएका छन् । उनले प्रदेश सरकारले धार्मिक सहिष्णुतालाई सुदृढ गर्न सहयोग गर्दै जाने प्रतिबद्धता जनाए ।
समग्र जनउत्थान केन्द्रका अध्यक्ष राम भरोसी महतोको अध्यक्षतामा सम्पन्न कार्यक्रममा उपाध्यक्ष अनिता चौधरीले कार्यक्रम सञ्चालन गरेकी थिइन् । समितिले भविष्यमा पनि शान्ति, भाइचारा र सामाजिक सद्भावका लागि थप कदम चाल्ने योजना बनाएको छ ।
