जापानद्वारा कीर्तिपुर आँखा अस्पताललाई उपकरण हस्तान्तरण

काठमाडौं : जापान सरकारले कीर्तिपुर आँखा अस्पतालका डाइबेटिक रेटिनोप्याथीका बिरामीका लागि आवश्यक स्वास्थ्य सामग्री हस्तान्तरण गरेको छ । नेपालका लागि जापानका राजदूत किकुता युताकाको उपस्थिति बुधबार अस्पतालमा आयोजित समारोहमा उक्त उपकरण हस्तान्तरण गरिएको हो ।

जापान सरकारको ‘ग्रासरुट ह्युमन सेक्युरिटी प्रोजेक्ट’ (जिजिपी)को करिब एक लाख ५४ हजार एक सय अमेरिकी डलर अनुदान सहयोगमा उक्त चिकित्सा उपकरण जडान गरिएको हो । जिजिपी तल्लो तहका सामुदायको सामाजिक–आर्थिक विकासमा जनतालाई प्रत्यक्ष लाभ हुनेहुने गरी स्थापना गरिएको परियोजना हो ।

सो अवसरमा राजदूत किकुताले उक्त परियोजनामा संलग्न सबैको प्रयासको प्रशंसा गर्दै उचित चिकित्सा उपकरण नहुँदा बिरामीलाई आवश्यकताअनुसारको निदान र उपचार गर्न नसकिने उल्लेख गरे । उनले डाइबेटिक रेटिनोप्याथीबाट पीडित व्यक्ति नेपालको ठूलो रोगबाट पीडितमध्ये एक भएको र त्यस्ता व्यक्तिलाई परियोजनाद्वारा प्रदान गरिएको चिकित्सा उपकरणले राम्रो चिकित्सा सेवा प्राप्त हुने विश्वास व्यक्त गरे ।

उनले यस परियोजनाको सहयोगले नेपालमा स्वास्थ्य सेवाको विकासमा ठूलो योगदान दिने विश्वास व्यक्त गर्दै आगामी दिनमा दुई देशबीच थप आदानप्रदानमा हुनेसमेत बताए । राजदूत किकुताले सो अवसरमा नेपालले जापानमा पहिलो पटक आठ विद्यार्थी अध्ययनका लागि पठाएको सन् २०२२ मा १२०औं वार्षिकोत्सव मनाउन पाउँदा खुसी व्यक्त गरे । दूतावासले यो सहयोगले अस्पतालमा आउने बिरामीलाई थप सहयोग पुग्ने र यसले नेपाल र जापानका जनताबीचको मित्रतालाई अझ सुमधुर बनाउने विश्वास व्यक्त गरेको छ । कीर्तिपुर आँखा अस्पताल नेपाल नेत्र ज्योति संघद्वारा स्थापना भएको हो ।

सुस्तामा शीत भण्डार 

रामकरन हरिजन/मध्यान्ह

पश्चिम नवलपरासी, १८ माघ । पश्चिम नवलवरासी सुस्ता गाउँपालिकाले पाँच सय मेट्रिक टन क्षमताको शीत भण्डार निर्माण गरेको छ । यस क्षेत्रमा मौसमी तरकारी फलफूल, आलु, प्याज, केरालगायत तरकारीहरु बढी मात्रामा उत्पादन हुने क्षेत्रमा शीत भण्डार नहुँदा प्रत्येक वर्ष कुहिएर नष्ट भएको छ ।

मौसमी फलफूल तरकारीहरु कुहिन नदिनको लागि फरक–फरक ५ वटा चेम्बर रहेको शीत भण्डार भवनमा सुरक्षित राख्नको लागि शीत भण्डार भवन निर्माण गरेको गाउँपालिकाले जनाएको छ । 

नवलपरासीको सुस्ता गाउँपालिका वडा नं ४ नरसहिस्थित २ कट्ठा भन्दा बढी क्षेत्रफलमा ४ करोड ९९ लाख ४१ हजार २ सय ९९ रुपैयाँ बराबरको शीत भण्डार भवन निर्माण कार्य गरेको छ । गत वर्ष फागुन महिनाबाट कालिगण्डकी रविना जे.भी. कन्स्ट्रकसन कम्पनीले शीत भण्डार भवन निर्माण कार्य शुरु गरेको थियो । आर्थिक वर्ष मंसिर महिनामा सित भण्डार निर्माण सम्पन्न गरेको छ इन्जिनियर विष्णुप्रसाद ज्ञवालीले बताए ।

प्रदेश सरकार र सुस्ता गाउँपालिकाको संयुक्त लगानीमा ५ वटा चेम्बर रहेको शीत भण्डार भवन निर्माण कार्य गरेको योजना शाखाका बिस्णुप्रसाद ढकालले बताए । सित भण्डार भवन निर्माण भए पनि विद्युत जडा गर्न र पर्खाल बनाउन बाँकी रहेकोले शीत भण्डार भवन सञ्चालन नभएको सुस्ता गाउँपालकाका प्रमुख प्रशासकीय अधिकृत बुद्ध प्रकाश पौडेलले बताए ।

दलित समुदायमाथि अपमान गर्नेलाई कारबाहीको माग

सरिता पराजुली/मध्यान्ह

जुम्ला, १८ माघ । जुम्लामा सामाजिक सञ्जालमार्फत दलित समुदायको अपमान हुने शब्द लेख्नेविरुद्ध कारबाहीको माग गरिएको छ । फेसबुकबाट दलित समुदायमाथि अपमानित गर्ने शब्द लेखिएको विषयमा दलित सेवा संघ जुम्ला शाखाले बुधबार एक प्रेस विज्ञप्ति जारी गर्दै कारबाहीको माग गरेको हो ।

जुम्ला सिंजा गाउँपालिका वडा नम्बर २ घोडेङ्गा निवासी गौरीलाल जैशीको गौरीलाल तिमिल्सिना नामक फेसबुक खाताबाट दलित समुदायमाथि जातीय विभेदपूर्ण र अपमानजनक शब्द लेखिएकोप्रति दलित समुदायको ध्यानाकर्षण भएको विज्ञप्तिमा उल्लेख छ ।

जैशीले लेखेको उक्त फेसबुक स्टाटसले जातीय तथा अन्य छुवाछूत र भेदभाव कसुर र सजाय ऐन, २०६८ आकर्षिक हुने भएकाले दोषीलाई कानून बमोजिम कडा भन्दा कडा कारबाही गर्न विज्ञप्तिमार्फत सरोकारवालासँग माग गरिएको छ ।

सामाजिक सञ्जालबाट दलित समुदायमाथि हुने विभेद कदापी सह्य नहुने दलित सेवा संघ जुम्ला शाखाका अध्यक्ष भिमबहादुर नेपालीद्वारा हस्ताक्षरित विज्ञप्तिमा उल्लेख छ । यस्तै दलित समुदायमाथि आँच आउने शब्द सामाजिक सञ्जालमा लेखिएको पाइएको भन्दै दलित समुदायको संगठित आवाजलाई बेवास्ता नगर्न चेतावनीसमेत दिइएको छ । जैशीले सामाजिक सञ्जाल फेसबुकमा लेखेको दलित समुदायलाई होच्याउने शब्दको चौतर्फी विरोध भएको छ ।

साइकल यात्रासँगै रक्तदान गर्दै सन्तोष

काठमाडौंः वातावरण संरक्षणमा जनचेतना जगाउने उदेश्य्सहित मोरङ जिल्ला उर्लाबारी नगरपालिका वडा न ३ मंलबारेका युवा सन्तोष गिरीले मेची महाकाली साइकल यात्रा पूरा गरेका छन् । भण्डै एक महिनामा साइकल यात्रा पूरा गरेका सन्तोषको टिमले आन्तरिक पर्यटन प्रवद्र्धनमा टेवा पुर्‍याउने उदेश्यसमेत राखेको थियो ।

‘मानवता बचाउ’भन्ने अभियानका साथ जहाँ–जहाँ साइलयात्रामा पुगे त्यहाँ त्यहाँको स्थानीय निकाय, स्थानीय संघसंस्थाको समन्वयमा रक्तदान कार्यक्रमको पनि आयोजना गरे । जसलाई नेपाल रेडक्रस सोसाईटीले पनि सहयोग गरेको थियो । सन्तोषको टोली विश्व साइकल यात्री अजित बराल,  सन्देश सुवेदीको टोलीले साइकल यात्रा गरेको हो ।

सूचना प्रविधिका विद्यार्थी रहेका सन्तोषले हेराल्ड कलेज, नक्सालबाट आइटीमा स्नातक समेत गरेका छन् । नेपालमा विभिन्न भौगोलिक, राजनीतिक, पर्यटकीय तथा सांस्कृतिक क्षेत्रलाई प्रवद्र्धन गर्ने साइकल यात्रा उदेश्य रहेको सन्तोष भनाई छ । मेची महाकाली साइकल यात्राको सफलता पछि पनि सन्तोषले ‘आइ डेर नो’ ड्रग भन्ने कार्यक्रममा सहभागि हुन् काठमाडौंदेखि पोखरासम्म साईकल यात्रा गरे त्यस्तै सेभ ग्लोबल वामिङ भन्दै काठमाडौं चितवन हँुदै हेटौंडासम्म साइकलमै पुगे र बीच–बीचमा वृक्षारोपण समेत गरे । सन्तोषले वातावरण संरक्षणको लागि भन्दै काठमाडौंबाट बनेपा कासिभञ्जयाङसम्म साइकल यात्रा गरेर दर्जनांै बिरुवा रोपे । सो क्रममा निम एभोकार्डो, बर, पिपल लगायतका बिरुवा रोपे ।

आन्तरिक पर्यटन प्रवद्र्धनमा साइकल पर्यटनको विकाश गर्ने सन्देश दिन पनि साइकल यात्रा गर्ने गरेको सन्तोष भनाई छ । नेपालमा साइकल चलाउनेहरुलाई गरिब हो भनेर सोच्नु वा आर्थिक हैसित कमजोर भएकाहरुले मात्रै साइकल चलाउँछन् भन्ने चिन्तन रहनु गलत बुझाई भएको सन्तोषको भनाई छ ।

समाजको लागि केही गर्नुपर्छ भन्ने हुटहुटी भएका सन्तोषले जब अजित बराल भटे त्यसपछि उनलाई साइकल यात्राको माध्यमबाट पनि समाजलाई सकारात्मक सन्देश प्रवाह गर्न सकिने ठानेर साइकल यात्रामा जुटेको बताए । मेची महाकाली साइकल यात्राको क्रममा सन्तोषको टिमले साइकल यात्रा मात्र गरेन स्थानीय संघ संस्था र रेडक्रस्रको सहयोगमा एक दर्जन भन्दा बढी स्थानमा रक्तदान कार्यक्रमको आयोजना गरी ५५८ युनिट रगत जम्मा गरे । जुन संकलित रगतबाट सयौंको जीवन समेत बचाउन सकिएको सन्तोषको भनाई छ ।

यात्राका क्रममा उनीहरुले बिर्तामोड, दमक, उर्लाबारी, धरान, जनकपुर, हेटौंडा, बुटवल, कपिलवस्तु, दाङ, तुल्सीपुर, नेपालगञ्ज, महेन्द्रनगर लगायतका विभिन्न शहरमा रक्तदान कार्यक्रम गरेका थिए ।

दुर्घटनामा रगतको अभावमा धैरेले ज्यान गएको कुरालाई मध्येनजर गदै रक्तदान कार्यक्रमलाई पनि साइकल यात्रासँगै जोडेर लगेको सन्तोषको भनाई छ । रक्तदान यात्राको सफलता र गिरीको सकारात्मक प्रभाव पार्ने निरन्तरको प्रयासले धेरैलाई प्रेरित गरेको छ ।
सन्तोषका अनुसार साइकल चलाउँदा वातावरण प्रदर्शन नहुने, पेट्रोल नचाहिने हुँदा पैसापनि बचत हुने तथा मानिसको स्वास्थ्य पनि राम्रो हुन्छ ।  साइकलमा नेपालको राष्ट्रिय झण्डा बोकेर राष्टिय एकताको सन्देश समेत प्रवाह गरेको साइकल यात्री गिरीको भनाई छ । साइकल यात्रामा निस्किएका सन्तोषले अरुले सजिलै प्राप्त गर्न नसक्ने सफलता र अनुभव हात पारेका थिए । आफ्नो छुट्टै र आकर्षक परिचय बनाएका उनले आफूले जुन कार्य गरेपनि साइकल यात्रालाई भने कहिल्यै नछोडने बताए  ।

नेपाल ओलम्पिक कमिटी साईकिलीङ प्लेयरको परिचय पत्र समेत पाएका सन्तोषले युवा तथा खेलकुद मन्त्रालय राष्ट्रिय युवा परिषद अन्तर्गत प्रदेश युवा क्लव सञ्चालका सदस्य समेत हुन्  । सन्तोषको बिहानीको यात्रा साइकलबाट शुरु हुन्छ । नेपालका लागि साइकल यात्री तथा सामाजिक अभियन्ताका रुपमा परिचित सन्तोषको धेरैजसो साइकल यात्रीसँग सम्बन्ध पनि बनाएका छन् ।

पछिल्लो समय उनी पर्यटन प्रवद्र्धनमा पनि त्यत्तिकै सक्रिय छन् । सबैलाई  साइकल चढ्न उनी आह्वान पनि गर्छन । अहिलेको काठमाडौंको समस्या विषाक्त वायु प्रदुषण, ध्वनी प्रदूषण, भयाभह सडक दुर्घटना, विकराल ट्राफिक जाम यी यावत समस्याले समाधान साइकल यात्राले मात्र समाधान गर्न सक्ने सन्तोषको बुझाई छ । गाउँमा होस् या सहरमा साइकल संस्कृतिको विकास गर्नुपर्ने आवश्यकता रहेको सन्तोषको भनाइ छ । यसमा सरोकारवाला सबै अग्रसर भएर लाग्न आवश्यक रहेको उनको जोड छ ।

शहरलाई स्वस्थ बनाउन शहरलाई सुन्दर बनाउने आन्दोलन हो’ उनले भने, ‘यो साइकल र्‍याली मात्र होइन । साइकल मैत्री शहरको परिकल्पनामा जोड दिनु अहिलेको आवश्यकता हो । यसले मानव स्वास्थ्य मात्र हैन वातावरण प्रदूषणलाई समेत कम गराउँछ ।  

सन्तोष लगायको टिमको साइकल अभियान सफल बनाउन नेपाल रेडक्रस सोसाइटी, नेपाल प्रहरी, पेन्क कस्टम, कान्तिपथ साइकल सोसाइटीका विभिन्न स्थानका कमिटीहरु स्थानीय क्लव संघ संस्था तथा आम सर्वसाधारणको सबैको साथ रहेको थियो ।  

६ लेन परियोजनाः इटहरीको १५ वटा घरमा चल्यो डोजर

तेजबहादुर बन/मध्यान्ह

इटहरी, १८ माघ । सार्वजनिक जग्गा मिचेर बनाइएका १५ वटा घरहरू इटहरी उपमहानगरले ड्रोजर लगाएर भत्काएको छ । ६ लेन राजमार्ग परियोजना अन्तर्गत सडकको मापदण्ड भित्र बनेका घरहरूमा उपमहानगरले डोजर लगाएर भत्काइरहेको छ । राजमार्गलाई फराकिलो बनाउन र सार्वजनिक जग्गा मिचेर बनाइएका संरचना हटाउन उच्च अदालत विराटनगरले आन्तरिक आदेश जारी गरे लगत्तै उपमहानगरले त्यस्ता संरचनाहरूमा डोजर लगाउन थालेको हो ।

माघ १३ गतेदेखि चलेको यस अभियान अन्तर्गत ६ दिनको अवधिमा इटहरी वडा नम्बर ९ को १५ वटा घरहरू डोजर लगाएर भत्काइएको उपमहानगर प्रमुख हेमकर्ण पौडेलले बताए । शुरूवाती समयमा सामान्य विवाद देखिएपनि विकाश निर्माणका कामहरूमा अवरोध नगर्न अनुरोध गरेसँगै सडक क्षेत्रभित्र पर्ने घरहरू स्थानीय आफैले भत्काउन थालेका छन् । अदालतको आदेश अनुरूप राजमार्ग क्षेत्रमा पर्ने घरहरू अहिले भतकाउन थालिएको मेयर पौडेल बताउँछन । अहिले सम्म १५ वटा घरहरू भत्काइसकिएको मेयर पौडेलले बताए ।

इटहरी ९ मा करीब घरहरू भत्काउने कार्य सकिएको र ६ नम्बर क्षेत्रमा शुरूवात गर्न लागिएको पनि मेयर पौडेलले बताए । ‘६ नम्बर वडामा ३० वटा भन्दा बढी घरहरू राजमार्ग क्षेत्रमा परेका छन्, ति सबैमा डोजर चल्छ’ मेयर पौडेलले भने । राजमार्ग ओगटेर बनाइएका वडा नम्बर ६ का घरधनीहरूलाइ १५ दिनभित्र सर सामान सारिसक्न उपमहानगरले अनुरोध गरेको छ । १५ दिनभित्र सामान नसारी अटेर गरे उपमहानगर जिम्मेवार नहुने र सोहि अवस्थामा डोजर चल्ने बताइएको छ ।

सडक परियोजना अन्तरगत ५५ फुट कायम हुने गरी गत शुक्रबारदेखि डेजर चलाइएको उपमहानगरले जनाएको छ । अघिल्लो वर्ष धरान रोडमा ५५ फुट कायम गरी सडक विस्तार गरिएकोमा विराटनगर रोड भने त्यतिकै छोडिएको थियो । घरधनीहरूले जग्गाको मुआब्जा पाउनुपर्ने माग गर्दै सडक बिस्तारमा अवरोध गर्दै आएका थिए ।

पटक–पटकको अवरोध र विवादकै कारण लामो समयदेखि ६ लेन राजमार्ग इटहरीमा स्थकित हुदै आएको थियो । इटहरीसँगै सुनसरीको दुहबी र धरानमा पनि राजमार्ग विस्तार बारे छलफल चलिरहेको ६ लेन परियोजनाको कार्यालय विराटनगरले जनाएको छ ।

हुम्लामा पशु औषधिको अभाव

ओबराज शाही/मध्यान्ह 

हुम्ला, १८ माघ । हुम्लाका सातवटै गाउँपालिकामा रहेका पशु शाखा तथा पशु अस्पतालमा औषधिको चरम अभाव भएको छ । हिउँदमा पशु पंक्षीमा विभिन्न रोग लाग्ने भए पनि पशु शाखा तथा पशु अस्पतालमा औषधि लिन जाँदा हुम्लाका किसान खाली हात फर्किन बाध्य छन् ।

हुम्लाका सातवटै गाउँपालिकामा भएका पशु शाखा र जिल्ला पशु अस्पतालको विप्लव नेतृत्व नेपाल कम्युनिस्ट पार्टी हुम्लाको आयोजनामा माघ १५ गतेदेखि माघ १८ गतेसम्म अनुगमन गर्दा औषधिको चरम अभाव देखिएको विप्लव जिल्ला सचिव कमलसिंह बुढाले बताए । उनका अनुसार जिल्लाका सबै गाउँपालिकामा पशु बस्तुका लागि आवश्यक कुनै औषधि नभएको अनुगमनमा पाइएको छ । गाई र बाख्रालाई चिसोले निमोनिया लागेपछि अ‍ौषधि ल्याउन सिमकोट गाउँपालिका पशु शाखामा जाँदा कुनै औषधि नभएर घर फर्किनु परेको सिमकोट गाउँपालिका वडा ७ का किसान पूर्णबहादुर सिंहले बताए ।

‘गाउँघरमा पशुबस्तुमा विभिन्न रोग देखा पर्दा औषधि नपाएर ती पशुबस्तु मर्ने गरेको छ’ उनले भने । सिमाकोट गाउँपालिका पशु शाखाका एक कर्मचारीले औषधिको अभावमा किसानहरु रित्तो हात फर्कनु परेको स्वीकार गरेका छन् । गाउँघरबाट किसानहरु विभिन्न पशुपंक्षीजन्य रोगको अ‍ौषधि लिन आउने गरेको तर खाली हात पठाउनु परेको उनले बताए ।

उनका अनुसार जिल्ला पशु अस्पतालमानै औषधि नभएकोले शाखाले किसानलाई औषधि उपलब्ध गराउन नसकेको हो । हुम्लामा राष्ट्रिय सडक सञ्जालसँग नजोडिएसम्म जिल्लामा यस्ता समस्या आइरहने सरोकारवालाहरु बताउँछन् ।

साक्षीविरुद्ध नै मुद्दा दायर

काठमाडौंः घुस लिएर भ्रष्टाचार गरेको मुद्दामा प्रतिकुल बकपत्र गरेको अभियोगमा साक्षीविरुद्ध नै मुद्दा दायर गरिएको छ । अख्तियार दुरुपयोग अनुसन्धान आयोगले बुधबार भावना महतविरुद्ध विशेष अदालत काठमाडौंमा मुद्दा दायर गरेको हो ।

मालपोत कार्यालय ताप्लेजुङमा कार्यरत तत्कालीन मालपोत अधिकृत पनेरु महतको भ्रष्टाचारसम्बन्धी मुद्दामा सरकारी साक्षीका रुपमा पेश गरिएकी महतले घुस लिएर गलत बकपत्र गरेको भन्दै उनीविरुद्ध भ्रष्टाचार मुद्दा दायर गरिएको अख्तियारका प्रवक्ता श्यामप्रसाद भण्डारीले जानकारी दिए । महतको भ्रष्टाचार मुद्दामा सरकारी साक्षी बनेकी भावना महतले बयान व्यहोराको प्रतिकूल बकपत्र दिएकी हुन् ।

पनेरुले १ लाख ५० हजार रुपैयाँ घुस लिई भ्रष्टाचार गरेको आरोपमा उनीमाथि विशेष अदालतमा मुद्दा दायर भएको थियो । घुसबापतको रकम राखिदिने महतलाई उक्त मुद्दाको अनुसन्धानका क्रममा सजायमा पूर्ण छुट दिएर प्रतिवादी नबनाई सरकारी साक्षीको रुपमा पेश गरिएको थियो ।

तर भावना महतले विशेष अदालत काठमाडौंसमक्ष बकपत्र गर्दा बयानको प्रतिकूल हुने बकपत्र गरेको पुष्टि भएकाले उनलाई भ्रष्टाचार निवारण ऐन, २०५९ अनुसार भ्रष्टाचारको मतियार मानी अख्तियारले विशेष अदालतमा मुद्दा दायर गरेको हो । भावना महतउपर १ लाख ५० हजार रुपैयाँ बिगो कायम गरी ऐनअनुसार राष्ट्रसेवकलाई हुने सजायको आधा सजाय माग गरिएको छ ।

गत वैशाख ११ गते जिल्ला मालपोत कार्यालय ताप्लेजुङका प्रमुख मालपोत अधिकृत लेखा पनेरु महतलाई अख्तियारको टोलीले नियन्त्रणमा लिएको थियो । टोलीले महतलाई सोवाग्राहीबाट लिएको एक लाख ५० हजारसहित नियन्त्रणमा लिएको थियो । बाबुका नामको जग्गा दाखेल खारेज गरी नयाँ लगत दर्तासहित छोराका नाममा पास गरिदिएबापत सेवाग्राहीबाट एक लाख ५० हजार रकम लिएको अभियोगमा उनलाई अख्तियारको टोलीले नियन्त्रणमा लिएको हो । 

फुङ्लिङ वडा नं ४ स्थित एक घरबाट सेवाग्राहीबाट लिएको रकम उक्त रकमसहित पनेरू पक्राउ परेकी थिइन् । ‘विशेष अदालत, काठमाडौंसमक्ष बकपत्र गर्दा आयोगबाट अनुसन्धानको क्रममा निजले गरेको बयान व्यहोराको प्रतिकूल हुने गरी बकपत्र गरेको पुष्टि हुन आएकोले निजको उक्त कार्य भ्रष्टाचार निवारण ऐन, २०५९ को दफा ३ को उपदफा (१) र दफा ३ को उपदफा (१) को देहाय (घ) बमोजिमको मतियारमा कसुर भएको हुँदा निज प्रतिवादी भावना महतउपर १ लाख ५०,०००।– (एक लाख पचास हजार) बिगो कायम गरी भ्रष्टाचार निवारण ऐन, २०५९ को दफा ३ को उपदफा (१) र दफा ३ को उपदफा (१) को देहाय (घ) बमोजिमको कसुरमा ऐ.ऐनको दफा २२ बमोजिम राष्ट्रसेवकलाई हुने सजायको आधा सजाय हुन मागदावी लिई माग/दाबी लिई आज विशेष अदालत काठमाडौंमा आरोपपत्र दायर गरिएको छ,’ आयोगका प्रवक्ता भण्डारीद्वारा जारी विज्ञप्तिमा उल्लेख छ ।

कर्णालीमा ‘सुरक्षित यात्रा अभियान’ शुरु

बबईमा सुरक्षित यात्रा कार्यक्रम अन्तर्गत चालक र यात्रुहरुलाई सामुहिक सुरक्षा सचेतना गर्दै प्रदेशका सुरक्षा अधिकारीहरु ।

सुर्खेतः कर्णाली प्रदेश प्रहरी कार्यालयले ‘सुरक्षित यात्रा अभियान’ शुरु गरेको छ । मातहतका दश जिल्लामा सवारी दुर्घटना न्यूनीकरणका लागि अभियान थालिएको प्रहरीले जनाएको छ ।

सुरक्षित यात्राका लागि नेपाल प्रहरी, ट्राफिक प्रहरीले चेक पोष्टहरुमा कम्तिमा ५ मिनेटभित्र सचेतना दिने, सवारीसाधन अवस्था चेकजाँच गर्ने, प्रहरीप्रति जनताको अपेक्षा तथा सुझावको बारेमा जानकारी लिने, गुनासो सुन्ने, सवारी चालकसँगै यात्रुहरुलाई सुरक्षित यात्राका लागि ट्राफिक नियम, सुरक्षा सावधानी सिकाउने लगायतका कुराहरु जानकारी गराउने गर्दछन् ।

कर्णाली प्रदेश गर्ने मुख्यद्वार बबईमा कर्णाली प्रदेश प्रहरी कार्यालय सुर्खेतका एसएसपी तथा सूचना अधिकारी माधवप्रसाद श्रेष्ठ, नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय कर्णाली प्रदेशका प्रमुख (एसपी) प्रज्वल महर्जनले चालक तथा यात्रुसँग सामुहिक रुपमा सुरक्षित यात्राका बारेमा जनचेतना दिएका थिए ।

प्रहरीले कर्णाली प्रदेशभर दुर्घटनाको दर बढ्दै गएपछि सवारी दुर्घटना न्युनीकरणका लागि सुरक्षा सचेतना कार्यक्रम गरेको जनाइएको छ । प्रदेशभर सुरक्षित यात्रा कार्यक्रम लागू गरिएको र जसमा प्रहरीले यात्रु र चालकलाई गाडीमै सुरक्षा सचेतना दिने गरेको कर्णाली प्रदेश प्रहरी कार्यालय प्रवक्ता माधव प्रसाद श्रेष्ठले बताए ।

कांग्रेस सभापति देउवाविरुद्धको रिट दरपीठ

काठमाडौंः सर्वोच्च अदालतले नेपाली कांग्रेसका सभापति शेरबहादुर देउवालाई प्रमुख प्रतिपक्ष दलको नेताको सुविधा दिन नमिल्ने उल्लेख गर्दैै पेश गरिएको रिट निवेदनलाई दर्ता गर्न अस्वीकार (दरपीठ) गरेको छ ।

सर्वोच्च अदालतका रजिष्ट्रार नारायण पन्थीले संसद्को अधिकार क्षेत्रभित्रको कुरा अदालत प्रवेश गर्न नमिल्ने उल्लेख दरपिठ गरेका हुन् । प्रमुख प्रतिपक्ष दलको निर्णय गर्ने अधिकार संसद्लाई भएकाले अदालतबाट ब्याख्या गर्न नमिल्ने र सार्वजनिक सरोकारमा विषयका रुपमा आएको उक्त रिट निवेदन दर्ता गर्न अस्वीकार गरेको दरपीठ आदेशमा उल्लेख छ ।

सभापति देउवालाई प्रमुख प्रतिपक्ष दलको नेताको सुविधा दिन नमिल्ने उल्लेख गर्दै अधिवक्ता विमल पोखरेलले पेश गरेको रिट निवेदन दरपीठ भएको हो । रिट निवेदनमा कांग्रेसले प्रधानमन्त्री पुष्पकमल दाहाल ‘प्रचण्ड’लाई विश्वासको मत दिएको हुनाले प्रमुख प्रतिपक्षको अधिकार दिन नमिल्ने उल्लेख छ । प्रधानमन्त्री दाहाललाई गत पुस २६ कांग्रेसले पनि विश्वासको मत दिएको थियो ।

डोकोमै सुन्तला बेचेर २ महिनामा २ लाख आम्दानी

रेसुङ्गा : गुल्मीकी पार्वता पाण्डेले पुस र माघ महिनामा डोकोमै सुन्तला बेचेर दुई लाख आम्दानी गरेकी छन् । जिल्लाको रेसुङ्गा नगरपालिका–४ की पाण्डेले मदन भण्डारी राजमार्गको तम्घास–छल्दी सडकखण्डको राँयढुङ्गामा बसेर सुन्तला बिक्री गर्छिन् ।

पुस पहिलो सातादेखि माघ दोस्रो सातासम्म डोकोमै सुन्तला बेचेर २ लाख रुपैयाँ कमाएको उनको भनाइ छ । उनले विगत सात वर्षदेखि पुस र माघ महिनामा सुन्तला बेच्दै आएकी छन् । यो वर्ष सुन्तलाको मूल्य प्रतिकिलो ८० देखि २०० सम्म रहेको पाण्डेले बताइन् ।

‘सुन्तलाको बजारीकरणमा कुनै पनि समस्या छैन’, उनले भनिन्,  ‘सवारीमा आवतजावत गर्नेले रोकिएर सुन्तला किनेर जानुहुन्छ ।’ पाण्डे सुन्तला बिक्रीको लागि घरदेखि १५ मिनेट पैदल हिँडेर राँयढुङ्गामा आउँछिन् । विहान ११ देखि दिउँसो ३ बजेसम्म सुन्तला बिक्री गर्छिन् ।

सामान्य जीविकोपार्जनका लागि विदेशकै बाटो रोज्नु गलत भएको पाण्डे बताउँछिन् । उनका श्रीमान् नारायण पनि सुन्तला खेती र भैँसी फार्ममा काम गर्छन् । उनीहरुको फार्ममा १५ वटा भैँसी छन् । जसबाट दैनिक ३५ लिटर दुध उत्पादन हुन्छ । उनीहरुले सदरमुकाम तम्घासमा दुध बेच्दै आएका छन् । रासस