लालबन्दी : लालबन्दी नगर वाङ्मय परिषद्को आयोजनामा सर्लाहीमा ‘लालबन्दी साहित्य महोत्सव–२०८१’ शुरु भएको छ । महोत्सवको नेपाल प्रज्ञा–प्रतिष्ठानका कुलपति भूपाल राईले करुवाको पानीले बिरुवालाई सिञ्चन गर्दै महोत्सवको समुद्घाटन गरेका थिए ।
महोत्सवलाई सम्बोधन गर्दै प्रमुख अतिथि राईले अहिले देशभर खुलेका प्रतिष्ठानहरू जनताको लामो संघर्ष र बलिदानबाट प्राप्त भएको गणतन्त्रात्मक व्यवस्थाको परिणाम भएको बताए । उनले प्रज्ञा–प्रतिष्ठानको ६७ वर्षे इतिहासमा केही भएन भन्ने गुनासाहरूलाई चिर्न आफैँले विद्यार्थीसँग कुलपति कार्यक्रमलाई अघि सारेको बताए ।
उनले स्थानीय तहमा गठन भएका प्रतिष्ठानहरूलाई केन्द्रसँग जोड्नुपर्ने आवश्यकता रहेको बताउँदै स्थानीय स्तरका अध्येयताहरूलाई अघि सारेर भाषा, साहित्य, कला र संस्कृतिको प्रवद्र्धनमा लाग्न आग्रह गरे ।
उनले स्थानीय तथा प्रदेशस्तरमा गठन भएका विभिन्न प्रतिष्ठानलाई केन्द्रीय प्रतिष्ठानसँग जोड्न आवश्यक रहेको र त्यसको लागि कार्य अघि बढाइएको बताए ।
तिनलाई जोड्न निकै चूनौतीपूर्ण रहेको कुरा कुलपति राईले उल्लेख गरेका थिए । महोत्सवमा नेपाल प्रज्ञा–प्रतिष्ठानका कुलपति राई, लालबन्दी नगरपालिकाका नगरप्रमुख एवम् लालबन्दी नगर वाङ्मय परिषद्का प्रमुख संरक्षक बासुदेव अधिकारी र लालबन्दी नगरपालिकाका प्रमुख प्रशासकीय अधिकृत बसन्त न्यौपानेले संयुक्त रूपमा रचना द्वैमासिक साहित्यिक पत्रिकाका प्रधान सम्पादक, नेपाल साहित्यिक पत्रकार संघका पूर्व अध्यक्ष तथा प्रेस काउन्सिल नेपालका पूर्व बोर्ड सदस्य रोचक घिमिरे र अन्नपूर्ण पोस्ट दैनिकका प्रधान सम्पादक तथा उपन्यासकार अखण्ड भण्डारीलाई पुरस्कार तथा पत्रकार शंकर श्रेष्ठलाई सम्मान समर्पण गरिएको थियोे । वाङ्मय परिषद्ले घिमिरेलाई ५० हजार राशिको कृष्णलाल स्मृति पुरस्कार र भण्डारीलाई ‘बोरा’ उपन्यासका लागि नगद ५० हजार राशिको भाषा साहित्य पुरस्कार तथा श्रेष्ठलाई २५ हजार राशिको स्थानीय प्रतिभा सम्मान –२०८१ समर्पण गरिएको थियोे । पुरस्कृत प्रतिभा घिमिरेले कृष्णलाल अधिकारीको योगदान र अखण्ड भण्डारीले ‘बोरा’ उपन्यास लेखन, परिवेश र पात्रबारे धारणा राखेका थिए ।
महोत्सवका विशिष्ट अतिथि नेपाल प्रज्ञा–प्रतिष्ठानका प्राज्ञसभा सदस्य चेतनाथ धमलाले आफ्नो शुभकामना मन्तव्यमा लालबन्दी वाङ्मय परिषद् गठन भएयता महत्वपूर्ण प्राज्ञिककर्म र गतिविधि गर्दै प्रथम साहित्यिक शहीद कृष्णलाल अधिकारीको नाममा पुरस्कार स्थापना गर्नु भनेको यस परिषद्ले महत्वपूर्ण कार्य गरेको बताए ।
धमलाले आफ्नो धारणा राख्ने क्रममा साहित्यिक शहीद कृष्णलाल अधिकारी स्मृति पुरस्कारबाट पुरस्कृत वरिष्ठ साहित्यिक पत्रकार रोचक घिमिरे र उक्त वाङ्मय पुरस्कारबाट पुरस्कृत ‘बोरा’ उपन्यास र तिनका सर्जक पत्रकार एवम् उपन्यासकार अखण्ड भण्डारी र वाचित रचना बारे लघुत्तम टिप्पणी गरेका थिए ।
अर्का विशिष्ट अतिथि बर्दघाट प्रज्ञा–प्रतिष्ठानका कुलपति प्रा.डा.घनश्याम न्यौपाने परिश्रमीले गजल वाचन गर्दै लालबन्दी वाङ्मय परिषद्का प्राज्ञिक कामलाई आफूले आत्मसात् गर्दै अनुशरण गर्ने बताए ।
उक्त महोत्सवका सभाध्यक्ष, नगर वाङ्मय परिषद्का प्रमुख संरक्षक, लालबन्दी नगरपालिकाका नगरप्रमुख बासुदेव अधिकारीले स्थानीय भाषा, साहित्य, संस्कृति र कलालाई केन्द्रसँग जोड्न नगर वाङ्मयले अहम भूमिका खेलेको बताए । उनले स्थानीय वाङ्मयसँग जोडिएका यहाँका साहित्यकारहरूले लालबन्दीलाई संघीय केन्द्रसँग मात्रै नभइ देश विदेशमा समेत परिचित गराउन भूमिका खेलेको बताए ।
उक्त महोत्सवमा सुमन घिमिरे अग्रिमको कवितासंग्रह ‘प्यालासँग कविता’ र जीवनीसंग्रह ‘समाजसेवामा अधिकारी’, विवश पौडेलको गजल संग्रह ‘धर्तीको जून’,देवराज पौडेलको कथासंग्रह‘मानवता हराएका सहरहरू’को लोकार्पण गरिएको थियोे ।
लालबन्दी साहित्य महोत्सवका अतिथिहरू रोचक घिमिरे भूपिन खड्का, निमेष निखिल, प्रतीक घिमिर, सुरेश सुवेदी, निरन्जना चन्द,भाष्कर कार्की, रमेश भट्टराई सहृदयी, पूर्णकला घिमिरे, यस लामा, गजलकार सुमित्रा आचार्य,कुमार दाहाल कुसुम र केशव समर्पण लगायतले कविता तथा गजल वाचन गरेका थिए । उक्त महोत्सवमा विभिन्न सांस्कृतिक झाँकीहरू समेत प्रदर्शन गरिएको थियोे । लालबन्दी वाङ्मय परिषद्का अध्यक्ष अच्युत अधिकारीले लालबन्दी साहित्य महोत्सव–२०८१,यसको गठन,उद्देश्य,प्रवद्र्धित पुरस्कार,सम्मान र प्राज्ञिक कार्यबारे जानकारी दिएका थिए ।
स्वागत मन्तव्य लालबन्दी नगर वाङ्मय परिषद्का कोषाध्यक्ष विवश पौडेल र उद्घोषण कम्युनिटी वेयलफियर एकेडेमी स्कुलका संस्थापक प्रिन्सिपल सुदीप कार्कीले गरेका थिए ।
