काठमाडौं : प्रमुख प्रतिपक्षी दल नेकपा माओवादी केन्द्रले एक्लै लडेर पनि निर्वाचनी उत्साह ल्याएको छ । सरकारमा सँगै रहेका नेपाली कांग्रेस र नेकपा एमालेले निर्वाचनी गठबन्धन नै गरेर कतिपय पदमा निर्वाचन लडेका थिए । कांग्रेस र एमालेका कतिपय नेताहरूले माओवादी एक्लै निर्वाचन लडे कमजोर हुने तर्क गर्ने गरेका थिए ।
तर, उपनिर्वाचनमा माओवादीले कांग्रेस र एमालेसँग एक्लै र कांग्रेस–एमाले गठबन्धन गरेको ठाउँमा समेत प्रतिस्पर्धा गरेको छ ।
४१ स्थानमा भएको निर्वाचनमा माओवादी केन्द्रले १ अध्यक्ष र १ उपमेयरसहित ९ पद जितेको छ । माओवादीले २०७९ सालमा जितेको रुकुमपूर्वको पुथा उत्तरगंगा गाउँपालिका जोगाएको छ ।
पुथा उत्तरगंगाको उपाध्यक्ष जोगाउन माओवादी केन्द्रले कांग्रेस र एमाले गठबन्धनको सामना गर्यो । यहाँ माओवादीकी नरपुरा बुढा विजयी भइन् ।
माओवादी केन्द्रले मोरङको ग्रामथान गाउँपालिका अध्यक्ष, जाजरकोटको नलगाड नगरपालिका उपाध्यक्ष पद जितेको छ । यी दुवै पदका यसअघि कांग्रेसले जितेको थियो ।
यसअघि जितेको ५ वटा वडा गुमाएको माओवादीले यसअघि कांग्रेस र एमालेले जितेका ५ वटै वडामा आफ्नो उम्मेदवारलाई विजयी गराएको छ । यसलाई कतिपयले माओवादी एउटा शक्तिको रूपमा रहेको रूपमा बुझ्नुपर्ने मत प्रकट गरेका छन् ।
राजनीतिक विश्लेषक डम्बर खतिवडा उपनिर्वाचनले दह्रिलो सन्देश दिएको बताउँछन् । उनी भन्छन्, ‘एमाले सोचेजस्तो बलियो छैन रहेछ, माओवादी भनिएजस्तो कमजोर भइसकेको रहेनछ ।’
नयाँलाई सन्देश : अझै विश्वास बढाऊ
४१ पदमा भएको उपनिर्वाचनमा कांग्रेस, एमाले र माओवादीकै उम्मेदवार प्रतिस्पर्धी देखिए । काठमाडौं– १६ मा रास्वपाका उम्मेदवारले निर्वाचन जित्नुबाहेक अन्यत्र नयाँ दल र स्वतन्त्र उम्मेदवारहरूको उत्साहजनक उपस्थिति देखिएन ।
४१ पदका लागि भएको निर्वाचनमा १०२ जना त स्वतन्त्र उम्मेदवार नै थिए । नयाँ भनिएका दलसहित २० वटा दल निर्वाचनको मैदानमा थिए । तर, प्रतिस्पर्धामा कांग्रेस, एमाले र माओवादीका उम्मेदवार नै देखिए ।
नगरपालिका प्रमुख १, उपमेयर १, गाउँपालिका अध्यक्ष २, उपाध्यक्ष ४ र वडाध्यक्ष ३३ गरी ४१ पदका लागि उपनिर्वाचन भएको हो । ४१ मध्ये रास्वपाले विभिन्न २६ पदमा निर्वाचन लडेको थियो । त्यसमध्ये काठमाडौं महानगरपालिका– १६ को वडा अध्यक्षमा रास्वपाकी उम्मेदवार रोजिना श्रेष्ठ विजयी भइन् । रास्वपाकी श्रेष्ठ २ हजार ९०२ मत ल्याएर निर्वाचित हुँदा एमालेका लक्ष्मीरत्न तुलाधर २ हजार २२० मत ल्याएर दोस्रो भए । अन्य अधिकांश ठाउँमा रास्वपाका उम्मेदवार पाँचौं र छैठौं स्थानमा रहे ।
कुल ४१ पदमध्ये २ ठाउँको परिणाम आउन बाँकी छ । निर्वाचन आयोगका अनुसार निर्वाचनको परिणाम सार्वजनिक भएका स्थानमध्ये कांग्रेसले १७, एमालेले ७, मओवादीले ९, रास्वपाले १, नेकपा एसले १, जसपा नेपालले २, नेमकिपाले १ र स्वतन्त्रले १ ठाउँमा निर्वाचन जितेका छन् ।
झापाको कन्काई नगरपालिका– ६ मा स्वतन्त्र उम्मेदवार लक्ष्मीप्रसाद ओली विजयी भएका छन् । ओली ४९३ मतसहित निर्वाचित हुँदा एमाले उम्मेदवार दोस्रो र कांग्रेस उम्मेदवार तेस्रो भए ।
राजनीतिक विश्लेषकहरू उपनिर्वाचनले पुराना दलको विकल्पमा नयाँ दल देखिन नसकेका बताउँछन् । साथै, पुराना दलमा पनि दलहरूको सोचेजस्तो जनमत नरहेको देखिएको उनीहरूको मत छ । विश्लेषक खतिवडा भन्छन्, ‘कांग्रेसलाई कम्युनिस्टका ३ ठूला घटक एमाले, माओवादी र एसबीचको भोट काटाकाटले सिटमा राम्रै फाइदा भयो तर लोकप्रिय मतमा खासै उन्नति देखिएन ।’
कांग्रेसले जोगायो कीर्तिपुर, जोगिएनन् अरू
कांग्रेसले कीर्तिपुर नगरपालिकाको मेयर पद जोगाएको छ । कांग्रेस उम्मेदवार कृष्णमान डंगोल विजयी हुँदा माओवादीका शिवशरण महर्जन दोस्रो र एमालेका सुरेन्द्र मानन्धर तेस्रो भए । यो पालिकालाई राजनीतिक दलहरूले निकै महत्त्व दिएका थिए । महत्त्व दिएको पालिका जोगाएको कांग्रेसले अन्यत्र यसअघि निर्वाचन जितेको पालिका प्रमुख र उपमेयर गुमाएको छ ।
कांग्रेसले कर्णालीको महाबु गाउँपालिका उपाध्यक्ष तथा बाजुराको स्वामिकार्तिक खापर गाउँपालिका उपाध्यक्ष नै गुमाएको छ ।
कांग्रेसले ताप्लेजुङ‚ मोरङ, ओखलढुंगामा र उदयपुरमा पराजय बेहोरेको छ । मधेश प्रदेशमा कांग्रेसले ३ वटा वडा गुमाएको छ ।
कांग्रेसले २०७९ सालमा जितेको मोरङ ग्रामथान गाउँपालिका अध्यक्ष पद माओवादी केन्द्रलाई सुम्पिएको छ । यहाँ माओवादी उम्मेदवार नमोनारायण माझीले ६ हजार ९६९ मतसहित जित हासिल गर्दा कांग्रेस उम्मेदवार बलराम सरदारले ५ हजार ३३३ मत मात्र प्राप्त गरे ।
