कपिलवस्तु : व्यापार संघ कपिलवस्तुको आयोजनामा आगामी माघ ९ गतेदेखि २० गतेसम्म नवौं कृषि पर्यटन तथा औद्योगिक व्यापार महोत्वस हुने भएको छ । महोत्सवका लागि मूल आयोजक समिति समेत गठन गरिएको छ । व्यापार संघ कपिलवस्तुको अध्यक्ष महादेव पोख्रेलको संयोजकत्वमा ५ सय सदस्यीय मूल आयोजक समिति गठन गरिएको महासचिव गोपाल बन्जाडेले जानकारी दिए । महोत्सवलाई सफल पार्न ३० वटा उपसमिति समेत गठन गरिएको छ ।
जनप्रतिनिधि, स्थानीय व्यापारी, उद्योगी, राजनीतिक दलका प्रतिनिधि, सञ्चारकर्मीको उपस्थितिमा समिति गठन गरिएको हो ।
आइतबारको भेलालाई सम्बोधन गर्दै उद्योग वाणिज्य संघका केन्द्रीय सदस्य जमशेर अलि मियांले महोत्सव यस क्षेत्रको चिनारी रहेको बताए । उनले यसलाई सफल पार्नु सबैको दायित्व रहेको बताए । महोत्सवबाट नयाँपन भित्र्याउनुपर्ने बताउँदै यो महोत्सव सबैको साझा कार्यक्रम हो भन्ने सन्देश दिन सबै आ–आफ्नो क्षेत्रबाट लाग्न उनले सुझाव दिए ।
कार्यक्रमलाई सम्बोधन गर्दै कृषि उत्पादनलाई विशेष प्राथमिकता दिनुपर्ने वडाध्यक्ष नेत्र प्रसाद बेल्वासेले बताए ।
मेला महोत्सवले पर्यटन प्रवर्द्धनमा टेवा पुग्ने भएकाले महोत्सवमा आउने राष्ट्रिय स्तरका कलाकारहरुलाई यस क्षेत्रमा रहेका विभिन्न पर्यटकीय स्थानहरुमा अवलोकन गराउनुपर्ने चन्द्रौटा उद्योग वाणिज्य संघका अध्यक्ष ईश्वरी प्रसाद पाण्डेले बताए । महोत्सवलाई सफल पार्न उद्योग वाणिज्य संघको हरेक क्षेत्रबाट सहयोग रहने उनको भनाइ छ ।
कार्यक्रममा होटेल व्यावसायी संघका अध्यक्ष लेखनाथ घर्ती, राष्ट्रिय मानव अधिकार प्रतिष्ठान कपिलवस्तु जिल्ला अध्यक्ष विष्णु प्रसाद खतिवडा, नेपाली कांग्रेसका जिल्ला उपसभापति हुमकान्त खनाल लगायतले महोत्सवको सफताको शुभकामना दिएका थिए ।
‘कृषि उद्योग पर्यटन र व्यापार स्थानीय उत्पादनको प्रयोग रोजगारको मुख्य आधार’ भन्ने मूल नाराका साथ सञ्चालन हुन गइरहेको महोत्सवले उद्योग, व्यापार, व्यावसायहरुका साथै स्थानीय कृषिजन्य उत्पादन र उत्पादित वस्तुहरुको प्रचार–प्रसार एवम् व्यावसायीकरण गर्ने मुख्य उद्देश्य राखिएको महोत्सव मूल आयोजक समितिका संयोजक महादेव पोख्रेलले बताए ।
स्थानीय संस्कृति, खेलकुद, पर्यटनसँगै उद्यमशिलतालाई प्रवर्द्धन गरी समुदायमा आपसी एकता र विश्वासको भावना फैलाउने उनले बताए ।
