अर्घाखाँची : अर्घाखाँचीको पाणिनी गाउँपालिका वडा नम्बर २ का वडाध्यक्ष चन्द्रकान्त पौडेलले आफू वडाध्यक्षमा निर्वाचित हुँदा गरेका अधिकांश बाचा पूरा गरेको दाबी गरेका छन् ।
पौडेलले आफु निर्वाचित हुँदा पाणिनी गाउँपालिका २ मा गरेका धेरै बाचा पूरा गर्दै वडामा क्रमशः विकाशको गति अगाडि बढाएको बताए ।
वडाका सबै क्षेत्रमा रहेका गाउँका नागरिकहरूको माझ समय–समयमा पुगेर स्थानीयहरूको समस्यालाई बुझि विकास निर्माणका कामहरु अगाडि बढाएको उनको भनाइ छ । अध्यक्ष पौडेलले गरेको विकास देखेर खुसी महसुस भएको पोखराथोकका स्थानीय चन्द्रसारु मगरले बताए ।
चुनावमा जनतासँग अध्यक्ष पौडेलले गरेका प्रतिबद्धता अनुसार काम गरेपछि स्थानीयले वडाध्यक्षको खुलेर प्रशंसा गर्ने गरेको स्थानीय प्रमोद गौतमले बताए ।
गौतमले,‘पौडेल जनप्रतिनिधिको रूपमा निर्वाचित भएपछि वडाको हरेक क्षेत्रमा सुधार र परिवर्तन भएको छ ।’
निर्वाचनका बेला घोषणापत्रमा उल्लेख गरिएका र जनतासँग चुनावमा गरेका बाचा ७० प्रतिशत पूरा गरीसकेको वडाध्यक्ष पौडेलले मध्यान्हलाई बताए ।
पौडेल भने, ‘म निर्वाचित भइसकेपछि निकै अध्ययन गरेर विकासको गति अगाडि बढाएको छु । अहिलेसम्म सन्तोषजनक कार्य गरेको महसुस भएको छ । न्यून बजेट छ, जनताका अपेक्षा धेरै छन् ।’
वडाका जनप्रतिनिधिले चुनावको समयमा गरेका अधिकांश वाचा पुरा गरेकोमा स्थानीय मनोज गौतमले खुसी व्यक्त गरे ।
वडा नम्बर २ का गाउँमा सडक निर्माण, कृषकहरूका लागि कृषि औजार खरिद तथा अनुदान वितरण, स्वास्थ्य क्षेत्रको लागि वडावासीहरूलाई लाभ हुने गरी भवन निर्माण, औषधि वितरण, जेष्ठ नागरिकलाई सम्मान, जंगली जनावरबाट खेतीबाली जोगाउन भोटेकुकुर वितरण, ८० वर्ष माथिका जेष्ठ नागरिकहरुलाई तिर्थ यात्रा, वडास्तरीय अध्यक्ष कप खेलकुदहरु, विद्यालयका शिक्षक, व्यवस्थापन समितिका पदाधिकारीलाई शैक्षिक भ्रमण, महिला स्वास्थ्य स्वयम् सेविका सम्मान, विद्यालयमा शिक्षाको गुणस्तर सुधार लगायतका काम गरेको वडाध्यक्ष पौडेलले बताए ।
यस्तै असार अगाडि सबै योजना चैत, वैशाखभित्र सम्पन्न, वडाका जनताको माग अनुसार वडास्तरीय घुम्ती शिविर सञ्चालन, मौरीका घार किसानलाई वितरण, उत्पादनको आधारमा अनुदान, विभिन्न प्रकारका लक्षित वर्गका कार्यक्रमहरुको परिचालन, नियमित वडामा हुने विकास निर्माणका कामको अनुगमन, प्रत्येक दिन ठिक १० बजे कार्यालयमा उपस्थित भइ निरन्तर काम गर्दै आएको वडाअध्यक्ष पौडेलले बताए ।
विद्यालयका न्यूनतम भौतिक संरचनाहरू निर्माण गरी शैक्षिक गुणस्तरमा विशेष जोड दिएको अध्यक्ष पौडेलले जानकारी दिए । साथै विद्यार्थीहरुको लागि नियमित विद्यालयमा आउने बानिको विकाश गर्न समय–समयमा शैक्षिक सामग्री वितरण समेत गरेको वडाध्यक्ष पौडेलले दाबी गरे ।
साथै वडामा शान्ति, सुरक्षा समय–समयमा सम्बन्धित सुरक्षा निकायसँग सहकार्य र समन्वय गरेर काम गर्दै स्वच्छ खानेपानीको लागि गाउँमा खानेपानी पाइप वितरण गरिएको वडाअध्यक्ष पौडेलले बताए । निर्वाचनमा आफूलाई विजय गराएमा विद्युत्, खानेपानी, सडक, नाला, कृषि तथा शिक्षा जस्ता महत्वपूर्ण विकासका काम गर्ने अध्यक्ष पौडेलले बाचा गरेका थिए ।
.jpg)
