X

इटहरी : सुनसरीको इटहरीस्थित नेपाल दयानन्द वैदिक मिसन ग्लोबल एकेडेमी (डिभिएम) स्कुलले आगामी माघ १८ गतेखदेखि प्रथम डिभिएम कप अन्तर विद्यालय क्रिकेट प्रतियोगिता गर्ने भएको छ । विद्यालयको खेल मैदानमा आयोजना हुने प्रतियोगिताबारे आइतबार पत्रकार सम्मेलन गरी विभिन्न विषयमा जानकारी गराइयो । अन्तर्राष्टिय स्तरमा ख्याती कमाइसकेको खेल क्रिकेटको स्थानीय स्तरमा प्रवर्दन गर्न डिभिएम स्कुलले पहिलो पटक अन्तरविद्यालय क्रिकेट प्रतियोगिता गर्न लागिएको पत्रकार सममेलनमा जानकारी दिइयो ।

स्थानीय तहदेखि विद्यालयस्तरमा क्रिकेटको मोह अत्याधिक रहेपनि खेल्ने अवसर नपाएका विद्यार्थीहरूको मनोभावना बुझ्दै पहिलो पटक यो खेल आयोजना गर्न लागिएको जनाइएको छ । विद्यालय स्तरबाट क्रिकेटको दक्ष खेलाडी उत्पादन गर्न यो प्रतियोगिताले महत्वपूर्ण भूमिका निर्वाह गर्ने अपेक्षा लिइएको छ । विद्यालयमा अध्ययनरत विद्यार्थीहरूको सर्वाङ्गिण विकासका लागि पनि यो खेलले निकै महत्वपूर्ण भुमिका निर्वाह गर्ने डिभिएम स्कुलका प्राचार्य वेणु सिटौलाले बताए ।

माघ १८ देखि सुरु हुने क्रिकेट प्रतियोगिता अन्तर्गत अहिलेसम्म सुनसरी र मोरङ गरेर ३५ वटा विद्यालयहरूले नाम दर्ता गराइसकेको र संख्या बढेर ४५ सम्म पुग्ने पत्रकार सम्मेलनमा बताइएको छ । खेलमा विजेता हुने विद्यालयलाई नगद २५ हजार रुपैयाँ, ट्रफी, मेडल र प्रमाण पत्र प्रदान गरिने छ भने उपविजेता हुने विद्यालयलाई १५ हजार नगद, ट्रफी, मेडल र पमाण पत्र प्रदान गरिने जनाइएको छ ।

साथै प्रतियोगिताले विद्यालय स्तरमा पनि क्रिकेटको मोह बढाउने र भविष्यमा दक्ष खेलाडी उत्पादन गर्न सकिने अपेक्षा गरिएको छ । प्रतियोगितामा सुनसरी र मोरङका सामुदायिक तथा निजी विद्यालयमा अध्ययनरत कक्षा १० सम्मका विद्यार्थीहरूले मात्र सहभागिता जनाउन पाउने प्रावधान रहेको जनाइएको छ । पत्रकार सम्मेलनमा स्कुलका उपाध्यक्ष ईश्वरी पराजुली, सञ्चालक सदस्य निलम चौलागाईं, सह प्राचार्य नारायण सुवेदी, प्रशिक्षक क्षितिज दाहाललगायतको उपस्थिति रहेको थियो ।