काठमाडौं : विपक्षी दल नेपाली काँग्रेसको आन्तरिक कलह चुलिएको छ । बरिष्ठ नेता रामचन्द्र पौडेल पक्षले सभापति शेरबहादुर देउवालाई केन्द्रीय मूख्यालय सानेपामा भेटेर बिहीबार कडा चेतावनी दिएको छ । नेता पौडेल र महामन्त्री शशांक कोइरालाले लिखित असन्तुष्टि पत्र बुझाउँदै पछिल्ला निर्णयहरु खारेज गर्न माग गरेको छ भने ती निर्णय आफूहरुले अस्वीकार गर्ने चेतावनी दिएका छन् ।
महाधिवेशनको चटारो लागिसकेको काँग्रेसमा शक्ति संघर्षकै क्रममा कलह समेत बढेर गएको छ । सभापति देउवा पक्षले पार्टीको विधान बिपरीत महाधिवेशन बिथोल्नेगरी निर्णयहरु लिएको आरोप लगाएको छ । असन्तुष्ट पक्षले पार्टी निकायहरुको समायोजन, क्रियाशील सदस्यता वितरण, विधान विपरीत विभागहरुको गठन, भातृ तथा शुभेच्छुक संस्थाहरुको गतिविधि सञ्चालनले महाधिवेशन निष्पक्ष हुनेमा अविश्वास पैदा भएको उल्लेख गरेको छ । चार पेज लामो असन्तुष्टिपत्र बुझाएको पौडेल पक्षले सभापति देउवालाई कामचलाउको संज्ञा दिएको छ । काम चलाउ सभापतिले गर्ने काम पनि अत्यन्तै सीमित हुने भन्दै पौडेल पक्षले पछिल्ला निर्णयहरु खारेज गर्न माग गरेको छ ।
१३औं महाधिवेशन सकिएको ६ महिनाभित्र गठन गरिसक्नुपर्ने विभागहरु १४औं महाधिवेशन घोषणा भइसकेपछि बिस्तार गरिनुलाई महाधिबेशन बिथोल्ने प्रयासका रुपमा यो समूहले अथ्र्याएको छ । गत वर्षको पुसमा सम्पन्न महासमिति बैठकले गरेको निर्णय बिपरीत २८ बाट बढाएर ४८ बनाउनु अनि पद र प्रलोभन बाँडेर विधान र पार्टीको निर्वाचन आचार संहिता विपरीत काम भएको यो समूहको ठहर छ । कार्यकाल सकिएपछि कुत्सित मनसाय राखेर यी सबै काम भएकाले यस्ता कार्य तत्काल बन्द गर्ने र भएका निर्णय खारेज गर्न आग्रह गरेको छ । पूर्व पार्टी सभापति सुशिल कोइरालाले तेस्रो वर्षमा गरेको विभाग गठन देउवाकै विरोधमा खारेज भएको पनि यो समूहले संस्मरण गराएको छ ।
हालै गठन भएका विभागलाई अस्वीकार गर्ने र सहयोग नगर्ने चेतावनी देउवालाई दिइएको छ । “जुन तहका नेता प्रवेश गर्छु सोही तहको कमिटीले सिफारिस गर्ने र केन्द्रीय कार्य समितिको बैठकले निर्णय गर्ने भन्ने छ । तर, पार्टी प्रवेश गर्नेहरुलाई यति सदस्य, यति हजार जस्ता अस्पष्ट तथा अमूर्त कुरा लेखिएको छ । अझ फोरम लोकतान्त्रिक सँगको समायोजन हेर्ने भनी बनाएको समितिले केन्द्रमा पेश परेको भन्ने कुरा जानकारी आएको छ । पार्टीमा दशकौंदखि रगत पसिना भिजाएका साथीहरुलाई वडा, क्षेत्र र जिल्लामै बहिष्कृत गराउने वा उहाँहरुको मनोवल गिराउने, पार्टी जीवन तहसनहस वा तेजोबध गर्ने कालका अन्यायपूर्ण काम किमार्थ हुनुहुँदैन”, असन्तुष्टि पत्रमा उल्लेख छ ।
यो समूहले बिजयकुमार गच्छदारले पार्टी प्रवेश गर्दा बिधान बिपरीतका काम भएको आरोप लगाएको छ । आगामी फागुन ७–१० मा काठमाडौंमा १४औं महाधिबेशन हुँदैछ ।
