काठमाडौं : नेपाल सरकारको विभाग र उक्त कार्यालय मातहतको सरकारी कार्यालयमा समान हैसियतको दरवन्दी कायम गर्दा कार्य सम्पादनमा असहजता देखिने गरेको छ । जसका कारण मातहतका कार्यालय प्रमुख बनेकाहरु छोटो समयमै उम्केर जाने गरेका छन् । यसको ज्वलन्त उदाहरण बनेको छ, वैदेशिक रोजगार कार्यालय काठमाडौं ताहाचल । उक्त कार्यालयमा कार्यालय प्रमुखको जिम्मेवारी पाउने उपसचिवहरु टिक्ने र सहसचिवहरु भने छिटोछिटो सरुवा भई अन्यत्रै जाने गरेको पाइएको छ । त्यसको पछिल्लो उदाहरण हुन्, उक्त कार्यालयबाट हालै सरुवा भई गृहमन्त्रालय गएका सहसचिव उमेश बस्नेत ।
बस्नेत २०७६ फागुन ७ गते ताहाचल कार्यालयका प्रमुखकारुपमा आएका थिए । सहसचिव बस्नेत लकडाउनको समयलाई छोड्ने हो भने करिब ४५ दिनमात्र सो कार्यालयका प्रमुख बने । सहसचिव बस्नेत गतवर्ष फागुन २ गते जनकपुर उपमहानगरपालिकाबाट श्रम, रोजगार तथा सामाजिक सुरक्षा मन्त्रालयमा सरुवा भई आएपछि लगत्तै वैदेशिक रोजगार कार्यालय ताहाचल खटाइएका थिए । तर, सहसचिव बस्नेतले उक्त कार्यालयमा खासै काम गरेनन् ।
उनी उक्त कार्यालयमा सरुवा भई नआउँदै कोरोना भाइरस (कोभिड–१९) माहामारीको छिपछिपे चर्चा शुरु भएको थियो । नेपाल सरकारको कोरोना रोग रोकथाम तथा नियन्त्रण उच्चस्तरीय समन्वय समितिले फागुन २९ गतेदेखि वैदेशिक रोजगारीमा जाने कामदारहरुको श्रम स्वीकृति स्थगन गर्ने निर्णय गरेपछि उक्त कार्यालयको काम ठप्प नै भयो ।
कोरोना महामारी केही सुस्ताएपछि सरकारले असार १८ गतेदेखि पुनः श्रम स्वीकृति दिन शुरु गरेको थियो । तर त्यसलगत्तै सहसचिव बस्नेत उक्त कार्यालयबाट सरुवा भए । उक्त कार्यालयमा लामो समय नबस्ने सहसचिवहरुमा बस्नेत मात्र एक्ला भने होइनन् । यसअघि कार्यालय प्रमुखका रुपमा खटाइएका सहसचिवहरु विश्व प्रकाश सुवेदी, तेजराज पाण्डे, रुद्रा शर्मा पनि कार्यालयमा लामो समय टिकेनन् । उक्त कार्यालयमा पहिलो महिला प्रमुख बनेकी शर्मा त झन् चार दिन मात्र उक्त कार्यालयको प्रमुख भएर प्रमुख जिल्ला अधिकारीका रुपमा सरुवा मिलाई दोलखा पुगिन् । यस्तै सुवेदी पनि करिब तीन महिना ताहाचलको प्रमुख भएर अख्तियार कार्यालय हेटौंडामा सरुवा भई गए ।
२०७० साल मंसिर २६ गते वैदेशिक रोजगार विभाग अन्तर्गत राजपत्राङ्कित प्रथम श्रेणीको अधिकृत ( सहसचिव स्तर ) कार्यालय प्रमुखसहित १ सय १० जना कर्मचारी दरवन्दी रहने गरी उक्त कार्यालय स्थापना भएको थियो । उक्त कार्यालय अन्तर्गत काठमाडौं कार्यालय, मलेसिया, कतार र साउदी अरब शाखा रहेका छन् । हाल सरकारले सातवटै प्रदेशबाट पुनः श्रम स्वीकृति दिन थालेपछि कार्यालयको बोझ भने घटेको छ ।
‘श्रमग्राम’ भनिएको ताहाचलमा कार्यालय स्थापना हुँदा उपसचिव मधुविलास पण्डित निमित्त कार्यालय प्रमुख थिए । उनी लामो समय उक्त कार्यालयमा रहे । ताहाचलमा प्रमुखको दरवन्दी सहसचिव भएकाले सहसचिव नै प्रमुख बनाएर पठाउनुपर्छ भन्ने आवाज उठ्न थाल्यो । त्यतीबेला विभागका बहुचर्चित महानिर्देशक थिए, भरतराज सुवेदी । उनकै समयमा विश्वप्रकाश सुवेदी ताहाचलका प्रमुख भएर गए ।
तुलनात्मकरुपमा विश्व प्रकाश सक्षम र इमान्दार मानिन्थे तर उनले राम्रोसँग कार्यालय हाँक्न सकेनन् भन्ने आवाज उठ्यो या उठाइयो र उनी मन्त्रालय तानिए । यद्यपि ताहाचलका प्रमुख सुवेदी बुद्धनगरका महानिर्देशक सुवेदी भन्दा एकै ब्याची भएपनि केही दिनले ‘सिनियर’ थिए । फेरि उपसचिव पण्डितलाई नै निमित्त कार्यालय प्रमुख बनाएर ताहाचल पठाइयो । सहसचिव बिश्व प्रकाश भने अख्तियार कार्यालय हेटौंडा सरुवा भएर गए ।
कार्यालय व्यवस्थापनदेखि सरसफाई र कार्यालयमा सुधारका धेरै काम थालेका पण्डित उमेरहदका कारण सोही कार्यालयको प्रमुख रहेकै बेला सेवाबाट अवकास लिए । त्यसपछि मन्त्रालयले वैदेशिक रोजगार महाशाखा हेर्ने सहसचिव तेजराज पाण्डेलाई ताहाचल कार्यालय प्रमुखको पनि जिम्मेवारीमा खटायो । तर सहसचिव पाण्डे पनि लामो समय ताहाचल बसेनन् ।
सहसचिव पाण्डे प्रायः मन्त्रालयमै बस्थे । यसो टहलिन पर्यो भने मात्र ताहाचल पुगेजस्तो गर्थे । त्यसबेलाका एक कर्मचारीले भने, ‘विभागमा महानिर्देशक सहसचिव नै भएका भएपनि मन्त्रालयमा रहँदा महानिर्देशकभन्दा माथि र ताहाचल पुग्दा महानिर्देशकभन्दा तल पुगेजस्तो ठान्थे पाण्डे ।’
पाण्डेपछि उपसचिव इन्द्रदेव पाण्डे ताहाचलको निमित्त कार्यालय प्रमुख बनाइए । उपसचिव पाण्डेले केही लामो समय काम गरे । मुलुकमा संसदको निर्वाचन भै नयॉ सरकार नबनिसक्को केहि समय वरपर उपसचिव प्रेम देशार पनि ताहचलका निमित्त प्रमुख भए ।
त्यसपछि मन्त्रालयमा ‘बहुचर्चित’ मन्त्री गोकर्णराज विष्ट आएपछि पूर्व मन्त्री टेकबहादुर गुरुङको ‘सेटिङ भत्काउने’ र ‘भ्रष्टाचार विरोधी ट्यून मिलाउने’ भन्दै गृह मन्त्रालयका उपसचिव भविश्वर पाण्डेलाई निमित्त कार्यालय प्रमुख बनाएर ताहाचल पठाइयो । पाण्डेले पनि लामो समय काम गरेनन् । उनी २०७५ असार, साउन र भदौ गरी करिब तीन महिना मात्र सो कार्यालयमा बसे । ठूलै सुधारको योजनासाथ ताहाचल गएका उनी तीन महिनामै सरुवा मिलाएर प्रधानमन्त्री कार्यालय गए । कार्यालयको व्यवस्थापनलगायतमा सुधार गर्ने भनेर ताहाचल पुगेका पाण्डे सुध्रने छाँट नदेखेपछि आफैं सरुवा मिलाएर गएका हुन् ।
पाण्डे बाहिरिएपछि मन्त्रालयका उपसचिव युवराज खतिवडा कार्यालय प्रमुखको जिम्मेवारीमा ताहाचल गए । तर उनीपनि दुई महिनाभन्दा केही बढी समय मात्रै बसेर फर्किए । उनी २०७६ असोज र कात्तिक गरी दुई महिनाभन्दा केही दिन बढीमात्र ताहाचल बसे ।
त्यसपछि ताहाचल गए निमित्त कार्यालय प्रमुख भएर उपसचिव देवेन्द्र कार्की । उनी करिब १४ महिना निमित्त कार्यालय प्रमुख भए ।
त्यसपछि सहसचिव रुद्रदेवी शर्मा कार्यालय प्रमुख तोकिइन् । उनी २०७६ माघ १७ गते ताहाचलका कार्यालय प्रमुख भएर गएकी थिइन् । तर तीन दिन मात्र काम गरेर उनी बाहिरिइन् । अर्थात २०७६ माघ २० गते उनले ताहाचल छोडिन् ।
त्यसपछि फेरि उपसचिव देवेन्द्र कार्कीलाई नै निमित्त कार्यालय प्रमुख बनाएर मन्त्रालयले ताहाचल पठायो । त्यसपछि फेरि कुरा उठ्यो दरवन्दी कै अर्थात सहसचिवलाई नै कार्यालय प्रमुख बनाएर पठाउने सन्दर्भ । त्यसैक्रममा २०७६ फागुन ८ गते सहसचिव उमेश बस्नेत कार्यालय प्रमुख भएर गएका थिए ।
ताहाचलमा कार्यालय प्रमुखमा सहसचिव रहने भएपनि शाखा प्रमुखमा उपसचिवस्तरका कर्मचारी रहने गरेका छन् । कार्यालयलाई म्यापावर कम्पनीले पेश गरेका मागपत्रमा पूर्व र अन्तिम श्रम स्वीकृति, व्यक्तिगत श्रम स्विकृति दिने र श्रम स्वीकृतिको नविकरण गर्ने जिम्मेवारी रहेको छ । यसका अतिरिक्त नियमनकारी क्षेत्राधिकार अन्तर्गत उक्त कार्यालयलाई म्यानपावर कम्पनी, स्वास्थ्य संस्था र वैदेशिक रोजगार सम्बन्धी अभिमुखीकरण तालिम तथा घरेलु कामदार सम्बन्धी तालिम प्रदान गर्न स्वीकृति प्राप्त संस्थाहरुको अनुगमन, निरीक्षण, निर्देशन तथा कारबाहीस्वरुप संस्था खारेज गर्नेसम्मको सिफारिस गर्ने अधिकार रहेको छ ।
बस्नेतको बहिर्गमनपछि सोही कार्यालयमा शाखा अधिकृत रहेका छत्र शाह अहिले निमित्त कार्यालय प्रमुख छन् । उनी हालै उपसचिवमा बढुवा भएका हुन् । शाह कति समय त्यहाँ बस्ने हुन्, त्यो भने हेर्न बाँकी नै छ । योसँगै ताहाचलमा कोही किन प्रमुख लामो समय टिक्दैनन् भन्ने प्रश्न अनुत्तरित नै रहेको छ ।
दरवन्दी उपसचिवकै बनाउने तयारी
वैदेशिक रोजगार विभाग अन्तर्गतको वैदेशिक रोजगार कार्यालय ताहाचलमा कार्यालय प्रमुखको दरवन्दी उपसचिव नै राख्नुपर्ने आवाज श्रम, रोजगार तथा सामाजिक सुरक्षा मन्त्रालयमा उठ्न थालेको छ । किनकि ताहाचलकै स्वरुपको अन्य ६ प्रदेशमा रहेका वैदेशिक रोजगार कार्यालयमा प्रमुखकारुपमा उपसचिव नै रहेका छन् ।
यसो त अध्यागमन विभागका महानिर्देशक र सो अन्तर्गतको त्रिभुवन अन्तर्राष्ट्रिय विमानस्थल अध्यागमन कार्यालयमा सहसचिवस्तरकै प्रमुख हुने गर्छन् । यस्तै वीर अस्पतालमा समेत निर्देशक र महाशाखा प्रमुखहरु उही तहका हुन्छन् । त्यतातर्फ खासै विवाद भएको पाइएको छैन । तर वैदेशिक रोजगार कार्यालय ताहाचलमा भने सहसचिव लामोसमय कार्यालय प्रमुख भएर बस्न नचाहनुको कारण करिब ५ किलोमिटर टाढा रहेको बुद्धनगरका एउटै तहका महानिर्देशकलाई झलझलती सम्झेर हाकिम मान्नु नै हो ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies