अर्घाखाँची : अर्घाखाँची जिल्लामा गएको एक महिनामा ७९ वटा विपद्का घटना घटेको प्रहरीले जनाएको छ । २०८१ सालको चैत महिनामा जिल्लाका विभिन्न स्थानमा भएका विपद्का घटनाले ४३ घरगोठमा क्षति पुर्याएको प्रहरीको तथ्यांक छ ।
जिल्ला प्रहरी कार्यालय अर्घाखाँचीले मंगलबार गरेको नियमित पत्रकार भेटघाट कार्यक्रममा बोल्दै प्रहरी नायब उपरीक्षक डीएसपी चक्रबहादुर मल्लले एक जनाको प्राकृतिक विपद्का कारण ज्यान जानुको साथै ३९ घर र ४ गोठमा क्षति पुर्याएको बताए ।
पत्रकार भेटघाटमा बोल्दै मल्लले भने, ‘अस्थायी प्रहरी चौकी डोहोटेमा सवारी साधनको चेकजाँच हामिले नयाँ वर्षबाट सुरु गरेका छौं । यहाँ चेकजाँच सुरक्षाको दृष्टिकोणले उपयुक्त देखियो । अब ईलाका प्रहरी कार्यालयमा गाडि चेकजाँच हुँदैन ।’ ईलाका प्रहरी कार्यालय ठाडामा चेकजाँच र इन्ट्री हुँदै आएकोमा नयाँ वर्षको दिनदेखि शितगंगा १२ को डोहोटेबाट चेकजाँच सुरु गरिएको डीएसपी मल्लले बताए ।
