ताप्लेजुङको दोभान बजारमा लागेको आगोले ४७ घर जलेको छ । मंगलवार विहान नौ बजेतिर शुरु भएको आगलागी दिउँसो एक बजेतिर नियन्त्रणमा आएको थियो । यसबेलासम्म ३३ परिवारको ४७ वटा घर जल्यो । पर्याप्त दमकलको अभावमा आगोले सिंगो बजार जल्यो । दुई वटा दमकलको मद्दतमा मुस्किलले दिउँसो आगो नियन्त्रणमा आएको थियो । आगलागीबाट २२ परिवार डेरावाल पनि प्रभावित बनेका छन् । सुक्खा मौसम शुरु भएपछि संभवतः यो सवैभन्दा ठूलो आगलागी हो । यो आगलागीबाट कति क्षति भयो भन्ने पूर्ण रिपोर्ट तयार भइसकेको छैन । तर, ३३ परिवारको ४७ घर जल्नु सानो क्षति होइन । धन्न दिउँसो आगलागी भएकाले मानवीय क्षतिबाट भने दोभान बजार जोगिएको छ ।
आगलागी पछि भने स्थानीय सरकार, प्रशासन र प्रकोप उद्धारका निकाय सक्रिय भएको छ । सिंगो बजार जलेकाले अब केहीदिन यो बस्ती खुला आकाश मुनिको बास बस्ने अवस्थामा पुगेको छ । यो दुखद् प्रकोप सँगै दोभान बजारलाई पूर्वकालमा फर्काउने कार्यमा सहायताको खाँचो पर्नेछ । तीन तहकै सरकारले यो बस्तीलाई सामान्य अवस्थामा फर्काउन सहयोग गर्नुपर्नेछ । स्थानीय, प्रदेश र संघीय सरकार सँगै मनकारीहरुको सहयोगी हातले मात्रै यो क्षतिको परिपुरण हुनसक्छ । नेपाली समाजको प्रमुख विशेषता पनि अप्ठ्यारोमा पर्दा एकसाथ उद्धार गर्ने हो । त्यसैले दोभान बजार चाँडै पूर्वअवस्थामा, तर पुराना गल्ती संशोधन गरेर पुनर्स्थापित हुनेछ । त्यो आशा पूरा गर्न सरोकारवालाहरुको ध्यान, दबाव र पहलकदमीको खाँचो पर्नेछ ।
सँगै, दोभान बस्तीको दुखद् घटना सिंगो देशका निम्ति पनि पाठ हो । त्यहाँ भएका कमजोरी र प्रकोप नियन्त्रणमा देखिएको त्रुटिले अरुतिर हुनसक्ने संभावित दुर्घटनाबाट जोगिन सचेत गराउन सक्छ । त्यसै पनि प्रकोप चाहना होइन, तर सानो कमजोरी वा भवितव्यबाट सिर्जना हुन्छन् । भनिन्छ– प्रकोप टार्न कठिन होला, तर जोगिन सकिन्छ । यसतर्फ आम नागरिकले अपनाउने सचेतता महत्वपूर्ण हुन्छ । अझ राज्यका संयन्त्रहरु यस्ता घटनाबाट सकेसम्म कम क्षति गराउनेतर्फ सम्पूर्ण तयारीका साथ रहनुपर्छ । त्यसै पनि सुक्खा मौसम शुरु भएपछि सधैं मुलुकभर आगलागीको घटना वर्षेनि ठूलो संख्यामा हुने गरेको छ । तर, यस्तो प्रकोप नियन्त्रणमा यथोचित ध्यान पुगेको देखिदैन । त्यसैको एउटा दुखद् घटना हो, दोभान बजार आगलागी ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies