काठमाडौं : संयुक्त अरब ईमिरेट्स (यूएई) र फिलिपिन्सबीच घरेलु कामदार सम्बन्धी बहुप्रतिक्षित सम्झौता भएको छ । फिलिपिन्सले आफ्नो राष्ट्रिय कानून अनुसार उक्त सम्झौता अनुमोदन गरेपछि अर्को महिनादेखि यूएईमा फिलिपिनो महिला कामदार रोजगारीका लागि जाने प्रक्रिया शुरु हुने छ ।
सम्झौतामा घरेलु कामदारको सुरक्षामा पर्याप्त प्रबन्ध गरिएको बताइएको छ । सम्झौतमा यूएई जाने घरेलु कामदारको भर्ना प्रक्रियामा फिलिपिन्सको सरकारी संयन्त्रलाई पनि सहभागी गराउने यूएईको मानव संशाधन मन्त्रालयका उपसचिव साईफ अल–सुवैदीले बताएका छन् । आफ्नो कानून अनुसार घरेलु कामदारको करार अनुमोदन हुनुपर्ने फिलिपिन्सको दूतावासले अडान राखेपछि सन् २०१४ देखि यूएईमा फिलिपिन्सबाट घरेलु कामदार जान छोडेका थिए ।
यूएई जानुअघि कामदारले रोजगारदाता, फिलिपिन्सको वैदेशिक रोजगार कम्पनी र यूएईस्थित कामदार भर्ना गर्ने कम्पनीको संयुक्त दायित्व सिर्जना गर्ने एकीकृत रोजगार करार गर्ने छन् । त्यसले कामदारलाई बढी सुरक्षित गर्ने बताइएको छ । फिलिपिन्सले यस्तै मोडलको सम्झौता कुवेत जाने कामदारहरुका लागि पनि गर्ने गरेको छ ।
यूएईले घरेलु कामदार पठाउन नेपालसँग गरेको आग्रहको सम्बन्धमा कुनै गृहकार्य नभइरहेको अवस्थामा फिलिपिन्स यूएईमा आफ्ना नागरिक घरेलु कामदारको रुपमा पठाउन तयार भएको हो ।
तत्कालीन श्रम, रोजगार तथा सामाजिक सुरक्षा मन्त्री रामेश्वर राय यादवको कार्यकालमा यूएईमा घरेलु कामदार पठाउने सम्बन्धी प्रोटोकलमा हस्ताक्षर गर्ने र प्रतिवन्ध लगाइएका अन्य मुलुकमा घरेलु कामदार सम्बन्धी श्रम सम्झौता गर्ने निर्णय भएको थियो ।
तर ठूलो संख्यामा अदक्ष महिला कामदारले रोजगारी पाउने घरेलु कामदार पठाउने विषयलाई अघि बढाउन श्रम, रोजगार तथा सामाजिक सुरक्षा मन्त्रालयको तत्कालीन प्रशासनिक नेतृत्वले इच्छा र तत्परता नदेखाउँदा घरेलु कामदार पठाउने विषय ओझेलमा पर्दै आएको सरोकारवालाहरुको भनाइ छ । सो विषयमा नेपालले नै चासो नदेखाएको म्यानपावर व्यवसायीहरुको गुनासो रहँदै आएको छ ।
नवनियुक्त श्रममन्त्री गौरी शंकर चौधरीले करिब एक महिनाअघि गत मध्य माघमा नेपालका लागि यूएईका राजदूत सईद हमदान अल नाक्वीले घरेलु कामदारको श्रम स्वीकृतिमा नेपालले लगाएको प्रतिबन्ध हटाउन आग्रह गरेको बताएका थिए ।
नेपालले असुरक्षित रहेको भन्दै विगत चार वर्षदेखि नेपाली महिलाहरूलाई घरेलु कामदारका रूपमा यूएईसहित अन्य खाडी मुलुक जान प्रतिबन्ध लगाएको छ । तर घरेलु कामदारको वर्गमा घरभित्र सरसफाईको काम गर्नेदेखि निजी सवारी चालक, माली, बगैंचेलगायतमा पुरुष कामदार समेत पर्दछन् ।
मन्त्री चौधरीले नेपाली कामदार सुरक्षित हुने सुनिश्चित भए प्रतिबन्ध तत्काल फुकुवा गर्न मन्त्रालय तयार रहेको राजदूत नाक्वीलाई जानकारी दिएको समेत बताएका थिए । तर प्रतिबन्ध फुकाउने विषयमा मन्त्री चौधरीले कुनै प्रक्रिया अघि बढाएको सार्वजनिक भएको छैन ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies