मंगलवार एकैदिन चार हजार ३६४ जनामा संक्रमण पुष्टि भएको छ । त्यस मध्ये राजधानी उपत्यकामा मात्रै झण्डै दुई हजारमा संक्रमण पुष्टि भएको छ । स्वास्थ्य तथा जनसंख्या मन्त्रालयका अनुसार मंगलवार काठमाडौंमा १६०२, ललितपुरमा २४० र भक्तपुरमा १२४ जनामा संक्रमण पुष्टि भयो । यो तथ्याङ्क अघिल्लो दिन भन्दा समग्रमा एक हजार बढी हो । मंगलवार तीन हजार भन्दा बढीमा संक्रमण पुष्टि भएको थियो । एकैदिन संक्रमित हुने संख्या एक हजार बढी हुनुले कोरोना महामारी भयावह बन्दै गएको पुष्टि हुन्छ । मंगलवार एकैदिन १८ जनाको कोरोना संक्रमणबाट मृत्यु भएको छ । यो सहित संक्रमणबाट मृत्यु हुनेको संख्या तीन हजार १९४ जना पुगेको छ । संक्रमण उच्च दरमा हुने, तर संक्रमित निको हुनेको संख्या कम हुँदा सक्रिय संक्रमितको संख्या २६ हजार २२५ पुगेको छ । मंगलवार सार्वजनिक तथ्याङ्कअनुसार, ५५५ जना संक्रमित मात्रै निको भएका छन् ।
संक्रमित हुनेको संख्या उच्च दरमा बढेपछि भोलि देखि राजधानी उपत्यकामा एक सातालाई निषेधाज्ञा जारी गरिएको छ । सीसीएमसीको सिफारिस, मन्त्रिपरिषद्को निर्णय र उपत्यकाका तीन जिल्लाका प्रमुख जिल्ला अधिकारीको आदेशमा अत्यावश्यक बाहेकका गतिविधि रोक्नेगरी निषेधाज्ञा जारी हुँदैछ । मन्त्रिपरिषद्ले एक साता नभएर १५ दिन निषेधाज्ञा गर्नुपर्ने निर्णय गरेको छ । अर्थात्, यो महिना निषेधाज्ञामा सकिदैछ । राजधानी उपत्यकामा जस्तै बाहिरका प्रमुख शहरहरुमा कोरोना संक्रमण भुसको आगो जसरी फैलिदैछ । लुम्बिनी, गण्डकी लगायत प्रदेशका जिल्लाहरुमा निषेधाज्ञा जारी गरिएको छ ।
यस्तो बेला सम्पूर्ण राज्यशक्ति र सरोकारवालाहरुको ध्याना कोरोना रोकथाममा केन्द्रीत हुन जरुरी हुन्छ । किनभने, यो महामारीको रोकथाम साझा प्रयासबाट मात्रै संभव छ । एक व्यक्ति र अर्को व्यक्ति बीच सामाजिक दुरी कायम गर्ने कार्य सजिलो छैन । यसले मानवीय, सामाजिक र आर्थिक गतिविधिमा अवरोध सिर्जना गर्दछ । तसर्थ, साझा संकल्पको जरुरी छ । तर, यसबेला कोरोना रोकथाम विरुद्ध एक हुनुपर्नेमा दलहरुबीचको असमझदारी बढेर गएको छ । विशेषगरी लुम्बिनी र गण्डकी जस्तो महामारी तीव्र बनेको प्रदेशहरुमा मुख्यमन्त्री बदल्ने खेल चर्को बनेको छ । मंगलवार मात्रै गण्डकी प्रदेशमा प्रदेशसभा बैठक सत्तारुढबाटै अवरोध भयो । यसले दलहरुबीचको दुरी बढेर जाने देखिन्छ । अतः यस्तो बेलामा पहिले जनस्वास्थ्यमा ध्यान दिने र पछि मात्रै सत्ता केन्द्रीत गतिविधि गरिनुपर्छ । आम नागरिकको जीवन रक्षा नेतृत्वको दायित्व पनि हो ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies