सरकारले कोरोना महामारीको तेस्रो लहरको भयबारे पूर्वामान सार्वजनिक गरेको छ । सरकारको कथन छ– तेस्रो लहरको कोरोना महामारीमा बालबालिका धेरै जोखिममा पर्न सक्छन् । पहिलो लहरको कोरोना संक्रमणबाट ८ प्रतिशत बालबालिका संक्रमित भएको तथ्याङ्क पनि सरकारले सार्वजनिक गरेको छ । तर यसपटकको दोस्रो लहरको संक्रमणबाट दुई महिनाभित्रै २४ हजार ८२१ बलबालिका संक्रमित बनेको पनि स्वास्थ्य तथा जनसंख्या मन्त्रालयले जनाएको छ । २३ जेठसम्म मात्रै २० वर्ष मुुनिका ७२ जनाको मृत्यु भएको मन्त्रालयको तथ्याङ्क छ । चिकित्सकहरुको भनाइ उदृत गर्दै मन्त्रालयले शिशु बाहेक पाँच वर्ष उमेरसम्मका, वंशाणुगत मुटुरोग भएका, मिर्गौला, दम र फोक्सो सम्बन्धी विभिन्न रोगको औषधि सेवन गरिरहेका र मोटोपण भएकाहरु तेस्रो लहरको कोरोना संक्रमणबाट जोखिममा पर्न सक्ने बताएको ।
सरकारी निकायको यस्तो प्रक्षेपणका कारण धेरैमा त्रास देखिन्छ । अर्थात् कोरोना महामारीको दोस्रो लहर भन्दा अब संभावित भेरियन्टबाट मानिसको ज्यान जान सक्ने खतरा धेरै रहेको सरकारी भनाइ छ । हुन त यसपटक भन्दा धेरै भय पहिलो पटक थियो । महामारीको पहिलो संक्रमण देखिदै गर्दा धेरैमा भय थियो । महामारी विरुद्धको खोप पत्ता नलागेकाले पनि आममानिसमा महामारीको धेरै भयो । तर यसपटक धेरै असर देखिएको छ । बितेको वर्षदिनमा जति मानिसको महामारीबाट मृत्यु भएको थियो, त्यो भन्दा धेरै मानिसको मृत्यु बितेको दुई महिनामा मृत्यु भएको छ । जबकी नेपालमा कोरोना महामारी विरुद्धको खोप वितरण शुरु भइसकेको थियो । भारत, चीन लगायत मुलुकबाट खोप आइसकेको थियो भने अन्य मुलुकबाट पनि आउने क्रम थियो ।
महामारीबाट रोकथामका लागि सरकारसँग समय पनि पर्याप्त थियो । तर राजनीतिक नेतृत्व शक्ति संघर्षतिर उन्मुख बन्यो । ठूला–ठूला सभाको प्रतिश्पर्धामा सरकार उत्रियो । संसद् भंग गर्ने ५ पुसको निर्णय पछि ११ फागुनसम्म देशभर ठूलाठूला सभा भयो । रोकथाम विरुद्ध आवश्यक तयारीमा सरकार जुटेन, बरु वर्षदिन भित्र स्वास्थ्यमन्त्री तीन जना फेरिए । जब कोरोना महामारीको दोस्रो लहर शुरु भयो, त्यसबेला सरकारसँग फेरि पनि आवश्यक सामथ्र्य थिएन । त्यसैले धेरै मानिसको मृत्यु भयो । अतः अहिले तेस्रो लहरको संभावना र भय बाँड्नु भन्दा सरकारले आवश्यक तयारी गर्नु उचित हुनेछ । यसको अर्थ आम सर्वसाधरणले रोकथामका लागि आवश्यक तयारी नगर्नु भन्ने होइन । त्यसैपनि महामारी विरुद्ध संयुक्त लडाइ लड्नु नै छ ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies