अर्घाखाँची : रुपन्देहीको सैनामैना नगरपालिका वडा नम्बर १ मा पाँच बिघा जमिनमा फैलिएको क्षेत्रमा लटरम्मै तरबुजा खेती देख्न सकिन्छ । उक्त क्षेत्रमा विगत ५/६ वर्षयता तरबुजा प्रजातिका फलफुलले लाखौं आम्दानी हुने गरेको छ ।
उक्त खेती अर्घाखाँची भूमिकास्थान नगरपालिका वडा नम्बर ३ धारापानी स्थायी घर भइ रुपन्देहीमा बसोबास गर्दै आएका स्थानीय ५२ वर्षीय कृष्ण बन्जाडेको हो ।
उनी नेपाल सरकारका लेखा अधिकृत हुन् । उनले जागिरसँगै कृषि पेसा गरेको वर्षौ भएको छ ।
पाँच बिघा जमिन पाँच खण्डमा विभाजन गरेर तारबारले घेरेर उनले कृषि फर्म सञ्चालन गर्दै आएका छन् । पाँचै खण्डका लागि अलग–अलग गेटहरु निर्माण गरिएको छ । ढुवानीमा सजिलो होस् भनेर चार वटा ढोका राखिएको छ । चार–चार मिटरको दूरीमा बिरूवाहरु रोपिएको छ ।
‘तरबुजा बन्जाडे कृषि फर्म’ व्यावसायिक कम्पनी दर्ता गरेर उनले आफ्नो फर्म सञ्चालन गर्दै आएका छन् ।
तरबुजाका अलवा उक्त स्थानमा मेवा पनि लगाइएको छ । उक्त जमिन केही आफ्नो र केही भाडाको रहेको बन्जाडेले बताए ।
उनीहरुले जग्गाको वार्षिक १ लाख रुपैयाँ भाडा तिर्दै आएका छन् ।
बन्जाडेको काममा उनको श्रीमतीले पनि साथ दिएकी छन् । फलफुल फर्मको बीचमा उनीहरुले आफ्ना लागि सानो घर पनि बनाएका छन् ।
बगैँचामा ठाउँ–ठाउँमा उनले सिसी क्यामेरा जडान गरेका छन् । दुई वर्षयता उनको बसाइँ कृषि फर्ममै धेरै छ । उनीहरुले दुई जना सहयोगी पनि राखेका छन् । बढी काम गर्नुपर्दा आवश्यकता अनुसार दैनिक ज्यालामा काम लगाउने गरेको बन्जाडेले बताए । यसरी काम गर्ने स्थानीयवासी नै हुन्छन् । उनीहरुलाई बन्जाडेले दैनिक ज्याला दिन्छन् ।
भूमिगत पानी तानेर बिरूवामा थोपा सिँचाइको प्रबन्ध गरिएको बन्जाडेले बताए ।
उनी अब गाउँमै बस्ने र खेतीमै लाग्ने निष्कर्षमा पुगेका छन् । भन्छन्, ‘अबको जीवन कृषि कर्म गर्दै यतै बिताउने हो, यतै रमाउने हो ।’
बन्जाडे अर्घाखाँचीको पाणिनी बहुमुखी क्याम्पसका पूर्व विद्यार्थी हुन् ।
लेखा अधिकृत बन्जाडेले कमाइको १० प्रतिशत रकम सामाजिक सेवामा खर्च गर्दै आएका छन् । पेसाले अधिकृत भएपनि बन्जाडेले समग्र अर्घाखाँची जिल्लाको विकास निर्माणका बारेमा व्यापक चासो राख्दछन् । बन्जाडे बिहान ५ बजेदेखि नौ बजेसम्म कृषि फर्ममा काम गर्छन् भने बिहान १० बजे देखि ५ बजेसम्म कार्यालयमा सेवामा समर्पित हुन्छन् । बिहान बेलुका आफ्नो कृषि फर्ममा मिहिनेत गरेर उनले लाखौं रुपैयाँ आम्दानी गर्दै आएका छन् ।
