गुल्मी : गुल्मीको रेसुङ्गा नगरपालिकाका प्रमुख खिलध्वज पन्थी आजभोली दम, निमोनियाका बिरामी भेट्न कन्सनटेटर र स्वास्थ्यकर्मीसहित घर–घरमै पुग्छन् । 

मंगलबार मेयर पन्थी स्वास्थ्य शाखामा कार्यरत कर्मचारी लिएर नगरपालिकाको वडा नम्बर ४ को अर्खालेमा रहेका दमका बिरामी भेट्न पुगेका छन् । 

बिरामीको स्वास्थ्य अवस्था बुझ्न, अक्सिजन कन्सनटेटरले कत्तिको सहयोग पुगेको छ भनेर बुझ्न उनी त्यहाँ पुगेका हुन् । 

बिरामी भेट्न पुगेका मेयर पन्थीले अक्सिजन कन्सनटेटर आवश्यक पर्दासम्म राख्न र समस्या परेको बेला सहयोग गर्न नगरपालिका जुनसुकै बेला तयार रहेको बताए । 

नगरपालिकामा स्वासप्रश्वास सम्बन्धी  दम र निमोनियाका बिरामीको संख्या बढेको र बिरामीले कन्सनटेटर किन्न समेत नसक्ने अवस्था देखेपछि नगरपालिकाले कन्सनटेटर किन्ने निर्णय गरेको नगरप्रमुख पन्थीले बताए । 

अहिले नगरपालिकामा ५५ जना दम र निमोनियाका बिरामीले नगरपालिकाको अक्सिजन कन्सनटेटर प्रयोग गरिरहेका छन् ।