अर्घाखाँची : अर्घाखाँचीको शितगंगा नगरपालिकामा आन्तरिक तथा बाह्य पर्यटक भित्राउने उदेश्यले बुधबारदेखि चौथो  शीतगंगा कृषि, पर्यटन तथा औद्योगिक व्यापार महोत्सव सुरु हुने भएको छ ।

शितगंगा नगरपालिकालाई व्यवसायिक पर्यटकीय रूपमा देश तथा विदेशमा चिनाउन, नगरमा स्थापित भएका घरेलु तथा कृषिजन्य उत्पादन वस्तुहरूको प्रबद्र्धन गर्न महोत्सवको आयोजना गरिएको उद्योग वाणिज्य संघका अध्यक्ष लक्ष्मण पन्थीले जानकारी दिए । 

उक्त नगरपालिका–३ ठाँडाको डमरूदह हाईटमा बुधबारदेखि सुरु हुने महोत्सवको नगरप्रमुख छविलाल पौडेलले उद्घाटन गर्ने उद्योग बाणिज्य संघका महासचिव दिल बहादुर गुरुङले जानकारी दिए  ।

नगरभित्र उत्पादित वस्तुहरूको प्रवद्र्धन, पर्यटकीय क्षेत्रको प्रचार–प्रसारका लागी महोत्सवले उल्लेखनीय भूमिका खेल्ने वडा नम्बर–३ का वडाध्यक्ष चिन्तराज अधिकारीले बताए । पुस ९ देखि २१  गतेसम्म सञ्चालन हुने महोत्सवमा १ लाखभन्दा बढी दर्शकले अवलोकन गर्ने र २ करोडभन्दा बढीको कारोबार हुने अपेक्षा गरिएको महासचिव गुरुङको भनाइ छ । 

महोत्सवको उद्घाटनमा नगरपालिकाभित्र रहेका भेषभुषासँग मिल्ने झाँकीसहित भव्यरूपमा उद्धघाटन गरिनेछ । महोत्सवमा स्थानीयस्थरमा उत्पादन हुने  खसीबोका, कुखुरा, दूधका परिकार, स्थानीय उत्पादनहरूको स्टल कृषि, सुपादेउरालीको झल्को दिने स्टल, डम्मरु दहमा बोटिङ सञ्चालन गरिने पत्रकार सम्मेलनमार्फत जानकारी गराइएको छ । 

महोत्सवमा ऐतिहासिक धार्मिक संस्कृतिक र पर्यटक तथा पुरातात्विक स्थलहरूको प्रचार गरी शितगंगालाई विश्वव्यापी चिनाउने तथा संरक्षण गर्ने जिल्लाको समग्र आर्थिक, धार्मिक, सांस्कृतिक, पुरातात्विक, ऐतिहासिक, पर्यटकीय तथा कृषि औधोगिक व्यापार व्यवसायको शीप र ज्ञानको अनुभव आदान गर्ने गराउने कृषि प्रविधि, उत्पादन तथा व्यवसायिकता तथा स्वरोजगारका लागि व्यवसायिहरूलाई प्रोत्साहन गर्ने तथा त्यस्ता उत्पादनहरूको प्रवद्र्धन एवं बजारीकरणमा सहयोग पुराउने उदेश्यले महोत्सव सञ्चालन हुन लागेको हो ।

महोत्सवमा १ सय २० वटा स्टल राखिने छ भने जेष्ठ नागरिक, अपांग अल्पसंख्यक नागरिकलाई निःशुल्क प्रवेशको व्यवस्था मिलाइने छ । महोत्सवमा यसपटक सर्वसाधारणका लागि १ सय रूपैयाँको टिकट वितरण गरिनेछ ।