दोहा कतार : कतारको गृह मन्त्रालयले सुरुङ मार्ग (टनेल) भित्र दायाँ तर्फबाट ओभरटेक गर्न पूर्ण रूपमा निषेध गरिएको जनाएको छ । सवारी दुर्घटना न्यूनीकरण गर्न र सडक सुरक्षा कायम राख्न चालकहरूका लागि विशेष सुरक्षा निर्देशिका जारी गर्दै उक्त कुराको जानकारी दिएको हो । 

मन्त्रालयले सामाजिक सञ्जालमार्फत एक सार्वजनिक सूचना जारी गर्दै टनेल भित्र यात्रा गर्दा सवारी चालकहरूलाई अनिवार्य रूपमा आवश्यक सुरक्षा मापदण्डहरू पालना गर्न पनी विशेष आग्रह गरेको हो। सुरुङ मार्ग भित्रको फरक र संवेदनशील परिस्थितिलाई ध्यानमा राख्दै चालकहरूले ट्राफिक नियमको पूर्ण उल्लंघन नगर्न र सडक संकेतहरूको पालना गर्न गृहले निर्देशन दिएको छ।

मन्त्रालयले जारी गरेको निर्देशिका अनुसार सुरुङ मार्ग भित्र  राखिएका डिजिटल तथा सडक संकेतहरूको अक्षरशः पालना गर्नपनी आग्रह गरेको छ । यसैगरी सडकको अवस्था अनुसार सुरुङमार्गभित्र तोकिएको निश्चित गति सीमाभन्दा बढी गतिमा गाडी नलैजान सचेत गराउँदै मन्त्रालयले टनेल भित्र प्रवेश गर्नासाथ गाडीको हेडलाइन अनिवार्य रूपमा बाल्न भनेको छ । जसले गर्दा भित्रको स्पष्टता कायम रहन मद्दत पुग्ने विश्वास मन्त्रालयले लिएको छ ।

आकस्मिक दुर्घटनाबाट बच्नका लागि अगाडि गुडिरहेको सवारी साधन र आफ्नो सवारी साधन बिच सधैं सुरक्षित र पर्याप्त दूरी कायम राख्न तथा सुरुङभित्र जथाभाबी लेन परिवर्तन नगरी सधैं आ-आफ्नो तोकिएको लेनभित्रै रहेर मात्र गाडी चलाउन  मन्त्रालयले सबै चालकहरूलाई स्मरण गराएको छ । कतारमा कार्यरत तथा बसोबास गर्ने नेपाली समुदायका ठुलो संख्याका चालकहरूलाई समेत लक्षित गर्दै स्थानीय सुरक्षा निकायले यस्ता सुरक्षा सतर्कताहरू समय-समयमा जारी गर्दै आएको छ ।

मन्त्रालयले यी नियमहरूको बेवास्ता गरेमा कानुनी कारबाही समेत हुन सक्नेतर्फ सचेत गराउँदै सम्पूर्ण सवारी चालकहरूलाई जिम्मेवार बन्न र सुरक्षित यात्रा सुनिश्चित गर्न अपिल गरेको छ ।