अत्तरिया : गोदावरी नगरपालिका–५ गेटास्थित गेटा अस्पतालले अन्तरङ्गसहित विविध सेवा विस्तारको तयारी प्रायः पूरा गरेको छ । गत वर्षदेखि वरिरङ्ग सेवा सुरु गरेको सो अस्पतालले चालु आर्थिक आगामी भदौदेखि विविध सेवा विस्तारको तयारी गरेको हो ।

अस्पतालले सुदूरपश्चिममै पहिलो पटक ‘मेमोग्राफी’ सेवा सुरु गर्न लागेको अस्पतालका सूचना अधिकारी नैनसिंह कार्कीले जानकारी दिए । “मेमोग्राफी सेवाका लागि आइसकेको छ । जडान पनि भइसकेको छ ।

भदौको पहिलो साताभित्र सेवा सञ्चालन गर्ने लक्ष्य छ”,उनले भने । स्तन क्यान्सर निर्क्योल गर्न यो यन्त्र प्रयोग गरिन्छ । यो सेवा सुदूरपश्चिममा अन्त कुनै ठाउँमा छैन । ” 

आगामी महिनादेखि अस्पतालले बिरामीलाई अस्पतालमा नै राखेर  उपचार गर्ने उनले जानकारी दिए । उनले भने,- “अब इन्डोर सेवा पनि सञ्चालन गर्नेछौँ ५० शय्याको स्वीकृति पाएका छौँ ।” 

भदौ पहिलो सातादेखि २४ सैँ घण्टा आकस्मिक तथा सामान्य शल्यक्रिया सेवा पनि प्रवाह गरिने अस्पतालका निर्देशक डा.विप्लव सापकोटाले जानकारी दिए । कार्डियोग्राफी सेवा पनि सञ्चालन हुने उनले बताए ।

अस्पतालमा १० जना विशेषज्ञ चिकित्सक र स्वास्थ्यकर्मी तथा अन्य कर्मचारी गरी ६५ जना सेवारत छन् ।