रौतहट : रौतहट जिल्लामा सडक अनुशासन पालना तथा सवारी दुर्घटना न्यूनीकरण गर्ने बुधबारदेखि ट्राफिक सप्ताह २०८३ भव्य रूपमा सुरु भएको छ ।

मधेश प्रदेश प्रहरी कार्यालय जनकपुरधाम, नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय पथलैया बारा र जिल्ला प्रहरी कार्यालय रौतहट सँगको सहकार्य तथा समन्वयमा जिल्ला ट्राफिक प्रहरी कार्यालय रौतहटको आयोजनामा सो जनचेतनामूलक अभियान सुरु भएको हो ।

​सत्य सेवा सुरक्षणम भन्ने नेपाल प्रहरीको मूल आदर्शलाई आत्मसात् गर्दै असार ३ गते देखि सुरु भएको यस सप्ताहव्यापी कार्यक्रमको गौर नगरपालिकामा विशेष समारोहका बीच समुद्घाटन गरिएको छ । ​

भव्य प्रभातफेरीसहित कार्यक्रमको सुरुवात ​सप्ताहको पहिलो दिन गौर नगरमा सडक अनुशासन र यातायात सुरक्षासम्बन्धी विभिन्न प्लेकार्ड र जनचेतनामूलक नारासहितको एक वृहत् प्रभातफेरी निकालिएको थियो ।

गौर नगरको परिक्रमा गरी उक्त प्रभातफेरी गौर नगरपालिकाको सभाहलमा पुगेर औपचारिक उद्घाटन सत्रमा परिणत भएको थियो । ​उच्च पदस्थ अधिकारी र सरोकारवालाहरूको उपस्थिति ​सवारी दुर्घटना न्यूनीकरणका लागि सचेतना छर्न आयोजित उक्त समुद्घाटन कार्यक्रममा जिल्लाका प्रशासनिक सुरक्षा तथा स्थानीय जनप्रतिनिधिहरूको व्यापक सहभागिता रहेको थियो ।

कार्यक्रममा मुख्य अतिथिका रूपमा प्रमुख जिल्ला अधिकारी दिनेश सागर भुसाल रहेका थिए । ​यसैगरी कार्यक्रममा राष्ट्रिय अनुसन्धान जिल्ला कार्यालय रौतहटका प्रमुख कुमार बुढाथोकी, जिल्ला प्रहरी कार्यालय रौतहटका प्रहरी नायव उपरीक्षक बसन्त गौतम, सशस्त्र प्रहरी सीमा सुरक्षा गौर गुल्मका गुल्मपति प्रेमसागर बिष्ट तथा नेपाली सेनाका प्रतिनिधिहरूको उपस्थिति रहेको थियो । ​

स्थानीय सरकार र व्यावसायिक क्षेत्रको प्रतिनिधित्व गर्दै गौर नगरपालिकाका नगर प्रमुख शम्भु साह, यातायात व्यवस्था कार्यालयका प्रमुख अविन्दर दास र उद्योग वाणिज्य संघ रौतहटका अध्यक्ष रविन्द्रनाथ गोपालीले कार्यक्रममा ऐक्यबद्धता जनाएका थिए । ​

कार्यक्रममा जिल्लाका विभिन्न निजी विद्यालयका छात्रछात्राहरू, सञ्चारकर्मी, सुरक्षाकर्मी तथा गौर नगर प्रहरीहरूको उल्लेखनीय सहभागिता रहेको जिल्ला ट्राफिक प्रहरी कार्यालय रौतहटका प्रहरी निरीक्षक राजेन्द्र थापा मगरले जानकारी दिए । ​

कार्यक्रमका वक्ताहरूले पछिल्लो समय बढ्दै गएको सवारी दुर्घटना र यसबाट हुने मानवीय तथा भौतिक क्षतिप्रति चिन्ता व्यक्त गर्दै सडक अनुशासनको पालना नै दुर्घटना रोक्ने मुख्य हतियार भएको बताए ।

विद्यालयका विद्यार्थी र युवा अवस्थादेखि नै ट्राफिक नियमको सचेतना दिन सके दीर्घकालीन रूपमा सडक सुरक्षा सुदृढ हुने विश्वास कार्यक्रममा व्यक्त गरिएको थियो ।

​जिल्ला ट्राफिक प्रहरी कार्यालय रौतहटले यस ट्राफिक सप्ताह २०८३ अन्तर्गत आगामी एक हप्तासम्म जिल्लाका विभिन्न स्थानमा चालक, सहचालक, पैदलयात्री र विद्यार्थीहरूलाई लक्षित गरी सडक सुरक्षा सम्बन्धी विविध जनचेतनामूलक कार्यक्रमहरू सञ्चालन गर्ने जनाए ।