काठमाडौं : भारतको उत्तर प्रदेशस्थित अयोध्यामा निर्मित भव्य राम मन्दिर यतिबेला ठुलो आर्थिक भ्रष्टाचारको विवादमा तानिएको छ । श्रद्धालुहरूले चढाएको करोडौं डलर बराबरको चन्दा र बहुमूल्य वस्तुहरू हिनामिना भएको आरोप लागेपछि मन्दिर व्यवस्थापनमा हलचल मच्चिएको छ ।

यो प्रकरण पहिलो पटक ‘श्री राम जन्मभूमि तीर्थ क्षेत्र ट्रस्ट’को लेखा टोलीका पूर्व सुपरभाइजर महिपाल सिंहले सार्वजनिक गरेका थिए । उनले चन्दा संकलन र व्यवस्थापनमा अनियमितता भएको खुलासा गरेपछि विपक्षी दल समाजवादी पार्टीका नेता अखिलेश यादवले यो मुद्दालाई राजनीतिक रूपमा अगाडि बढाएका थिए ।

बढ्दो दबाबका बीच उत्तर प्रदेश सरकारले तीन सदस्यीय अनुसन्धान टोली गठन गरेको थियो । अनुसन्धान प्रतिवेदन सार्वजनिक नगरिए पनि प्रहरीले चन्दा र बहुमूल्य सामग्री गणनामा संलग्न ८ जना कर्मचारीलाई पक्राउ गरिसकेको छ ।

यस भ्रष्टाचार काण्डको गम्भीरतालाई मध्यनजर गर्दै मन्दिर ट्रस्टका महासचिव चम्पत रायले शुक्रबार आफ्नो पदबाट राजीनामा दिएका छन् । रायसँगै अन्य केही उच्च पदस्थ ट्रस्टीहरूले पनि पद त्यागेका छन् ।

दशकौंदेखि राम मन्दिर निर्माणको प्रतीक्षामा रहेका र चन्दा दिएका भक्तहरूले यसलाई 'आस्थामाथिको प्रहार' भनेका छन् । मन्दिर निर्माणको आन्दोलनमा संलग्न रहेका सन्तोष दुबेले मन्दिर व्यवस्थापनमा 'धूर्त र चोरहरू' हाबी भएको र उनीहरूलाई मृत्युदण्डको सजाय हुनुपर्ने आक्रोश व्यक्त गरेका छन् ।

यो घोटाला सार्वजनिक भएपछि प्रधानमन्त्री नरेन्द्र मोदीको सरकार र भारतीय जनता पार्टी (भाजपा) रक्षात्मक अवस्थामा पुगेको छ । विपक्षी नेता अखिलेश यादवले सरकारले साना कर्मचारीलाई पक्राउ गरेर 'ठुला माछा'हरूलाई जोगाउन खोजेको आरोप लगाएका छन् ।

राजनीतिक विश्लेषक रशिद किदवईका अनुसार, यो प्रकरणले उत्तर प्रदेशमा केही महिनापछि हुने विधानसभा निर्वाचनमा भाजपालाई ठुलो नकारात्मक असर पार्न सक्छ । हिन्दुत्वको एजेन्डा र राम मन्दिरलाई आफ्नो मुख्य उपलब्धि मान्दै आएको भाजपाका लागि आफ्नै समर्थकहरूबीच फैलिएको यो आक्रोश चुनावी चुनौती बन्न सक्ने देखिएको छ ।

सन् १९९२ मा बाबरी मस्जिद ध्वस्त पारिएपछि लामो कानुनी लडाइँपछि सन् २०१९ मा सर्वोच्च अदालतले सो जग्गा हिन्दु पक्षलाई सुम्पिएको थियो । सन् २०२४ को जनवरी २२ मा प्रधानमन्त्री मोदीले भव्य समारोहका बीच यो मन्दिरको उद्घाटन गरेका थिए । तर उद्घाटनको साढे दुई वर्ष नबित्दै मन्दिर व्यवस्थापनमा देखिएको यो आर्थिक विचलनले विश्वभरका भक्तहरूलाई स्तब्ध बनाएको छ ।