वीरगन्ज : स्वास्थ्य तथा जनसंख्या मन्त्री प्रदीप यादवले सर्वोच्च अदालतमा विचाराधिन नारायणी अस्पतालको पाँच सय शय्या भवन निर्माणको मुद्दालाई फास्ट ट्रयाकमा टुंगो लगाउन आफु लागि परेको बताएका छन् ।
गृहनगर वीरगन्जमा रहेको नारायणी अस्पतालको मंगलबार अनुगमन गरेपछि वीरगन्ज महानगरका मेयर,अस्पताल विकास समितिका अध्यक्ष र मेसुसँग छलफल गर्ने क्रममा मन्त्री यादवले उक्त जानकारी गराएका हुन् ।
नारायणी अस्पतालमा थप पाँच सय शय्याको सुविधा सम्पन्न भवन निर्माण सम्बन्धी मुद्दा सर्वोच्च अदालतमा चार वर्षदेखि विचाराधिन रहेको छ ।
भवन निर्माण सम्बन्धी टेण्डर आह्वानको विषयलाई लिएर केही निर्माण कम्पनिले सर्वोच्चमा रिट हालेपछि चार वर्षददेखि उक्त मुद्दा विचारधिन रहेको छ ।
मंगलबारको छलफलमा मन्त्री यादवले अदालतमा विचाराधीन रहेको अस्पताल भवन निर्माणको मुद्दालाई फास्ट ट्रयाकमा सम्बोधन गर्न आफू लागिपरेको बताए । उनले भने,‘अस्पतालको भवन निर्माणका लागि सबै प्रक्रिया अगाडि बढेपनि केही स्वार्थी व्यक्तिले अदालतमा मुद्दा हालेको कारण काम अगाडि बढेको छैन । मैले प्रधानमन्त्री र कानून मन्त्रीसँग भेटेर फास्ट ट्रयाकमा मुद्दाको फैसला गर्न आग्रह गरेको छु । मुद्दा फैसला भएसँगै भवन निर्माणको काम द्रुतगतिमा अगाडि बढ्नेछ ।’
मन्त्री यादवले अस्पतालको पूर्वाधार स्तरोन्नत्तीदेखि औषधि उपकरण खरिदका लागि पनि आफूले मन्त्रालयबाट विभिन्न प्याकेजहरू घोषणा गरेको जानकारी दिए ।
मन्त्री यादवले छलफलमा सहभागी वीरगञ्जका मेयर राजेशमान सिंह र अस्पतालका निमित्त मेसु डा. एनामुल हकलाई अस्पतालका विद्यमान समस्याहरूको सूची तयार पारेर छिट्टै मन्त्रालय आउन निर्देशन पनि दिए ।
अनुगमनका क्रममा मन्त्री यादवले नारायणी अस्पतालको ओपिडी, फार्मेसी, पोस्टअप, ल्याबलगायत अनुगमन गर्दै त्यहाँ उपचाररत बिरामी र कुरुवासँग समेत कुराकानी गरेका थिए ।
अनुगमनकै क्रममा मन्त्री यादवले बिरामीले सुनाएका गुनासोलाई यथाशीघ्र सम्बोधन गर्न अस्पतालका निमित्त मेसु हकलाई निर्देशन दिए । उनले फार्मेसीमा औषधीको व्यवस्थापनका लागि मन्त्रालयसँग बजेट माग गर्न र ओपिडी सेवाका लागि आउने बिरामीको सहजताका निमित्त टिकट काउन्टर थप्दै टिकट काउन्टरलाई वातानुकूलित बनाउन पनि निर्देशन दिए ।
त्यसअअघि निमित्त मेसु हकले नारायणी अस्पताल ३ सय ५० बेडमा स्तरोन्नति भएको वर्षौं बितिसक्दा पनि कर्मचारी दरबन्दी सय बेड अनुसार कै रहेको जानकारी मन्त्री यादवलाई गराएका थिए ।
‘दरबन्दी नहुँदा जनशक्ति अभाव छ । हामीले अपेक्षित ढंगबाट सेवा प्रवाह गर्न सकेका छैनौं । बेड अनुसारको दरबन्दी कायम गर्न मेरो आग्रह छ,’ हकले भने ,‘त्यस्तै क्वाटर, मेसिनरी र अन्य पूर्वाधार अभाव लगायतका समस्या पनि छन् ।’
अनुगमनमा मन्त्री यादवसँगै सहभागी रहेका वीरगञ्जका मेयर राजेशमान सिंहले नारायणी अस्पतालको स्तरोन्नतिलाई आफ्नो प्रमुख एजेण्डा बनाएर काम गर्न मन्त्री यादवसँग आग्रह गरे । त्यसका लागि आवश्यक सम्पूर्ण सहयोग वीरगञ्ज महानगरपालिकाले उपलब्ध गराउने प्रतिबद्धता समेत उनले व्यक्त गरे ।
मेयर सिंहले कर्मचारी क्वाटर निर्माणका लागि जग्गा उपलब्ध गराउने घोषणा समेत गरे । अनुगमनमा अस्पताल विकास समितिका अध्यक्ष धिरज गुप्ता, पूर्व प्रदेशसभा सदस्य जन्नत अन्सारी लगायतको समेत सहभागिता रहेको थियो ।
