उदयपुर : त्रियुगा नगरपालिका –५ देउरीमा रहेको देउरी स्वास्थ्य चौकीलाई त्रियुगा नगर अस्पतालमा स्तरोन्नति गरिएको छ । सरकारको नीति तथा कार्यक्रमअनुसार देउरी वडा कार्यालय, आम नागरिक, राजनीतिक दल तथा त्रियुगा नगरपालिकाको पहल कदमी सहकार्य सहयोगमा देउरी स्वास्थ्य चौकीलाई त्रियुगा नगर अस्पतालमा स्तरोन्नति गरिएको हो ।
उद्घाटन कार्यक्रममा त्रियुगा नगरपालिकाको मेयर बसन्त कुुमार बस्नेतले यो नगर अस्पताल त्रियुगा नगरपालिकावासीको लागि गौरवको रुपमा रहेको बताए । उनले यस अस्पताल जिल्ला अस्पतालको सहयोगी तथा बाह्य जिल्ला सिरहा,सप्तरीको लागि पनि महत्वपूर्ण थलो बन्न सक्ने बताए । मेयर बस्नेतले नगर अस्पताल नगरवासीको लागि सञ्चालन गरिएको हुँदा नगरले नै सञ्चालन गर्ने बताए ।
बस्नेतले अस्पताल सञ्चालनमा स्रोत साधन,दक्ष जनशक्ति, भौतिक पूर्वाधारमा कमी हुन नदिने बताए ।
देउरी स्वास्थ्य चौकी परिसरभित्र त्रियुगा नगर अस्पताल स्तरोन्नति हुनुभन्दा अगाडि स्वास्थ्य चौकी चार वटा पुरानो भवनमा सञ्चालनमा रहेको थियो ।
स्वास्थ्य चौकी नगर अस्पतालमा स्तरोन्नति भएपछि अनुमानित ९ लाख ५० हजारमा निर्मित भवनमा ५ शय्याको आकस्मिक कक्ष सञ्चालनमा ल्याइएको छ, भने हाल ३ जना मेडिकल अफिसर कार्यरत रहेका छन् ।
अस्पतालले आँखा जाँच शिविर, प्रयोगशाला, आकस्मिक लगायत सेवाहरु सञ्चालन गर्नुका साथै एक भवन निर्माणको डीपीआर प्रक्रिया अगाडि बढिरहेको त्रियुगा नगरपालिका ५ को वडाध्यक्ष उद्धव थापाले बताए ।
बिहीबार संविधान दिवसको अवसर पारेर अस्पताल परिसरको आकस्मिक भवनभित्र त्रियुगा नगरपालिकाको स्वास्थ्य शाखाको आयोजना रेडक्रस सोसाइटी उदयपुरको सहयोगमा रक्तदान गरिएको थियो ।
रक्तदान कार्यक्रममा १६ जना सहभागीहरुले रक्तदान गरेको आकस्मिक कक्षको प्रमुख सुशान्त चौधरीले जानकारी दिए ।
