बझाङ : बझाङमा एक स्वास्थ्य चौकीको भवन भूकम्पले क्षतिग्रस्त भएपछि एक वर्षदेखि त्रिपालबाट सेवा दिँदै आइएको छ ।
विनाशकारी भूकम्पले स्वास्थ्य संस्थाका भवन क्षतिग्रस्त भएपछि त्रिपालबाट सेवा प्रवाह गर्न थालिएको हो । २०८० साल असोज १६ गते गएको भूकम्पले मष्टा गाउँपालिका–१ मा रहेको कोटदेवल स्वास्थ्य चौकी भवन क्षतिग्रस्त भएको थियो । भवन क्षतिग्रस्त भएपछि सामान्य, जटिल रोगका बिरामी ,गर्भवती, सुत्केरी महिला समस्यामा परेका छन् ।
मष्टा गाँउपालिकाको कोटदेवल स्वास्थ्य चौकी पूर्ण रुपमा क्षतिग्रत भएपछि प्रसुति सेवा भने टेन्टबाट दिन थालिएको छ । स्वास्थ्य चौकीको भवन पूर्ण रुपले क्षतिग्रस्त भएपछि सबै सेवा त्रिपालबाट दिन थालिएको कोटदेवल स्वास्थ्य चौकीका प्रमुख प्रकाश खड्काले जानकारी दिए । खड्काले भने, ‘स्वास्थ्य चौकी भवन आफैँ बिरामी भएजस्तो स्थिति छ ।’ गर्मिको समयमा बिरामीलाई त्रिपालमा राखेर उपचार गर्दा निकै समस्या भएको खड्काको भनाइ छ । तर स्वास्थ्य चौकीसँग यसको विकल्प छैन ।
मष्टा गाउँपालिका–१ का वडाअध्यक्ष रामचन्द्र रोकायाले भने, ‘गत वर्षको असोज महिनाबाट स्वास्थ्य चौकीले त्रिपालबाट सुत्केरी महिलासहितलाई अन्य सेवा दिँदै आएको छ । स्वास्थ्यचौकी भवन क्षति भएको छ । सुत्केरी गर्भवती महिला लगायत बिरामीहरु समस्यामा परेका छन् ।’ वडाको रकमले भवन निर्माणको लागि नभ्याउने भएपछि गाउँपालिका, प्रदेश र केन्द्रमा माग गरिएको समेत वडाध्यक्ष रोकायाले बताए ।
