अर्घाखाँची : वर्षेनी बाहिरी जिल्लाबाट बीउ खरिद गरी ल्याउने अर्घाखाँचीमा अब जिल्लाभित्रै बीउ उत्पादन शुरु भएको छ । जिल्लाको भूमिकास्थान नगरपालिकाले बीउ उत्पादन गरी पालिकाभित्र र अन्य पालिकामा बिक्री गर्ने गरी उत्पादन थालेको हो । अहिले भूमिकास्थान नगरपालिकाले पहिलो पटक ठूलो मात्रामा आफैले लिजमा लिएको जग्गामा मकै उत्पादन गरी बीउ बनाउने अभियान शुरु गरेको छ ।
अब नगरपालिकाले कमर्सियल जनशक्ति परिचालन गरी बाँझो खेतबारी र लिजमा लिएर मकैको अलवा धानको बीउ वितरण गर्न उत्पादन शुरु गरिएको नगरपालिकाका प्रमुख प्रशासकीय अधिकृत जगदीशचन्द्र नेपालीले जानकारी दिए ।
अधिकृत नेपालीले भने, ‘अहिले हामिले मकै र धान नगरपालिकाका सबै किसानलाई आफै उत्पादन गरेको हाइब्रिट बीउ वितरण गर्छौं र गहुँ र प्याजको बीउ उत्पादन गर्नका लागि पनि जग्गा लिएर बीउ उत्पादन गर्ने तयारी रहेकोले अब अन्य पालिकामा समेत बिक्री गर्ने लक्ष्य राखेका छौं ।
यसअघि मकै धान गहुँको मूल बीउ कृषि अनुसन्धान केन्द्र भैरहवाबाट खरिद गरी भूमिकास्थान नगरपालिकाका ल्याइ ५० प्रतिशत, ७५ प्रतिशत अनुदानमा किसानलाई वितरण गर्ने गरिएकोमा अहिले वडा नम्बर ९ वडा नम्बर १० लगायतका ठाउँमा मकै धान लगाइ त्यहाँबाट उन्नत जातको बीउ उत्पादन गरी अब आउने सिजनका लागि बीउ वितरण गर्ने नगरप्रमुख झबिलाल थापाले बताए ।
मागमा आधारित बीउ कृषकलाई उपलब्ध गराउने उनको भनाइ छ । अहिले पहिलो वर्ष भएकाले माग पूर्ति गर्न नसकेपनि अर्को वर्ष बीउ प्रयाप्त हुने थापाले दाबी गरे । मनकामना ३ र रामपुरकम्पोजिट नामक मकैको झण्डै ८० कुइन्टल बीउ उत्पादन गरी वितरण गर्नका लागि अहिले नगरपालिकाले १२ जना कमर्सियल जनशक्ति मकै बीउ तयारीका लागि खटाएको छ, भने उनीहरुलाई दैनिक ६ सय रुपैयाँ ज्याला नगरपालिकाले उपलब्ध गराउने गरेको त्यहाँ काममा खटिएकी कल्पना श्रेष्ठले बताइन् ।
त्यस्तै, १४ हेक्टर भन्दा बढी क्षेत्रफलमा लगाएको सुक्खा ३ र सुक्खा ६ धानको बीउ उत्पादन भएको छ । ठाउँ–ठाउँमा बेमौसमी वर्षाका कारण धानबालीमा क्षति भएको समयमा भूमिकास्थान नगरपालिकाले लगाएको मकै धान खेती निकै राम्रो फलेको छ ।
नगरपालिकाले काँक्रो, सिमी, बोडि लगायत बेमौसमी तरकारीका बिरुवा नगरपालिकाको भवन नजिक उत्पादन गरी नगरपालिकाबासीलाई बिक्रीवितरण गर्ने गरेको छ ।
भूमिकास्थान नगरपालिकाबाट अर्घाखाँचीका सन्धिखर्क नगरपालिका, शितगंगा नगरपालिका मालारानी गाउँपालिका पाणिनी गाउँपालिकामा बीउ बिक्रीवितरण गर्ने नगरपालिकाले तयारी गरेको छ ।
वर्षेनी बिउमा मात्र लाखै रुपैयाँ खर्च गर्दै आएको भूमिकास्थान नगरपालिकाले अब आफैँ आत्मनिर्भर भइ जिल्लाका सबै पालिका र बाहिर जिल्लामा समेत निर्यात गर्दा अर्थोपार्जन मात्र होइन्, जिल्लामा कृषि प्रणालीसमेत बलियो हुँदै जाने विश्लेषण गर्न थालिएको छ ।
