डोल्पा : डोल्पाको त्रिपुरासुन्दरी नगरपालिकाको त्रिपुराकोट स्वास्थ्य चौकीमा सञ्चालित निःशुल्क विशेषज्ञ स्वास्थ्य शिविरको पहिलो दिनमा ९ सय ४४ जनाको स्वास्थ्य परीक्षण भएको छ । कर्णाली प्रदेश सरकार सामाजिक विकास मन्त्रालयको आयोजना तथा त्रिपुरासुन्दरी नगरपालिका डोल्पाको समन्वयमा दुई दिने शिविर सञ्चालनमा छ ।
शिविरमा आँखा, कान, घाँटी, नाक, हाड जोर्नी, लगायतका विरामीहरुले स्वास्थ्य परीक्षण गराएका छन् । त्रिपुरासुन्दरी नगरपालिका स्वास्थ्य शाखा प्रमुख तुलबहादुर श्रेष्ठले पहिलो दिनमा ९ सय ४४ जनाको स्वास्थ्य परीक्षण भएको बताए ।
उनका अनुसार स्वास्थ्य परीक्षण गराएका मध्य सबैभन्दा बढी हाडजोर्नी तथा नशा सम्बन्धिका बिरामी २ सय २३ जनाको परीक्षण भएको छ ।
यसैगरी आँखा सम्बन्धिका २ सय २१ जनाको ओपिडी सेवा लिएका छन् । स्वास्थ्य शाखा प्रमुख श्रेष्ठका अनुसार निःशुल्क मोविन्दुको शल्यक्रिया शिविरसहित अन्य स्वास्थ्य सम्बन्धी चेकजाँच सेवा समेत सञ्चालनमा छ ।
त्रिपुरासुन्दरी नगरपालिका, नेपाल रेडक्रस सोसाइटी, तिलगंगा आँखा अस्पताल, सुर्खेत आँखा अस्पतालको आर्थिक तथा प्राविधिक सहयोगमा तथा नेपाल रेडक्रस डोल्पा शाखा दुनै र उपशाखा त्रिपुराकोट डोल्पाको आयोजनामा निःशुल्क मोतियाबिन्दु शल्यक्रिया आँखा शिविरको समेत सञ्चालनमा रहेको छ ।
स्वास्थ्य सेवा निर्देशक डाक्टर रविन खड्काको नेतृत्वमा डाक्टर सुशीला समदर्शी डाक्टर संजोग शिवाकोटी, डाक्टर जागृति खनाल, डाक्टर गणेश तिवारी डाक्टर, लक्ष्मीनारायण तिवारी र डाक्टर तेजेन्द्र अधिकारी सहितकोविशेषज्ञ चिकित्सकको टोलिबाट स्वास्थ्य परीक्षणका साथै उपचार भइरहेको छ ।
निःशुल्क विशेषज्ञ स्वास्थ्य शिविरमा बढीभन्दा बढी नागरिकले स्वास्थ्य सेवा लिन सकुँन भनेर कात्तिक ९ गतेदेखि त्रिपुरासुन्दरी नगरपालिकाका एघार वटै वडामा स्वास्थ्यकर्मी परिचालन गरी आँखाका बिरामीको छनौट तथा अन्य रोगका बिरामीको लागि शिविरमा आउन सहज होस् भनेर घरदैलोमा पुगेर प्रचार–प्रसार समेत गरिएको थियो ।
