वीरगञ्ज : वीरगञ्ज, वडा नम्बर ३ छपकैयाका २१ वर्षीय सोहेल अन्सारी एप्लास्टिक एनीमियाको गम्भीर अवस्थासँग संघर्ष गरिरहेका छन् । फिरोज अन्सारी र सबनम खातुनका एक मात्र छोरा सोहेलको शरीरले नयाँ रक्त कोष उत्पादन गर्न नसक्ने समस्याका कारण उनलाई बारम्बार रगत चढाउनुपर्ने चिकित्सकहरूले बताएका छन् ।
हाल उनलाई वीरगञ्जको नारायणी अस्पतालको आइसीयूमा राखेर उपचार भइरहेको छ । वीरगञ्जदेखि पाटन अस्पतालसम्मको उपचारमा परिवारको सम्पूर्ण आर्थिक स्रोत समाप्त भएको छ । चिकित्सकहरूले उनलाई बचाउन बोनम्यारो ट्रान्सप्लान्ट आवश्यक रहेको बताएका छन्, जसको लागि ३०–४० लाख रुपैयाँ खर्च लाग्ने अनुमान गरिएको छ । जसका कारण एप्लास्टिक एनीमियाबाट पीडित सोहेलको जीवन संकटमा परेको छ ।
सोहेलको परिवारले उनको जीवन रक्षाको अपिल गरेका छन् । आर्थिक अभावका कारण उपचार सम्भव नभएकोले सोहेल परिवाले सहयोगको अपिल गरेको हो । यसैबीच वीरगन्ज महानगरपालिकाका उपमेयर ईम्तियाज आलमले पनि सोबेलको उपचारका लागि आर्थिक सहयोग गर्ने प्रतिबद्धता जनाएका छन् । उपमेयर आलमले सबैलाई आ - आफ्नो ठाउँबाट पीडित सोवेलको उपचारमा सहयोग गर्न पनि आग्रह गरेका छन् ।
