काठमाडौं : विवादास्पद मेडिकल व्यवसायी दुर्गा प्रसाईंमाथिको अनुसन्धान सकेर नेपाल प्रहरीले सोमबार जिल्ला सरकारी वकिलको कार्यालयमा फाइल बुझाएको छ ।
प्रहरीले संगठित अपराध र आपराधिक लाभ मुद्दामा जिल्ला सरकारी वकिलको कार्यालय काठमाडौंमा प्रसाईंको अन्तिम बयान लिएको छ । मंगलवारदेखि थुनछेक बहस सुरु हुनसक्ने प्रहरीले जनाएको छ ।
साइबर अपराध मुद्दामा साइबर ब्यूरोको हिरासतमा रहेका प्रसाईंलाई केन्द्रीय अनुसन्धान ब्यूरोले छुट्टै दुई मुद्दा क्रमशः संगठित अपराध र आपराधिक लाभमा अनुसन्धान गरिरहेको छ ।
प्रसाईंकै योजनामा भारतीय आपराधिक समूहका नाइके लरेन्स बिश्नोईको नाममा धम्की दिएको तथ्य खुलेपछि ब्यूरोले प्रसाईंविरुद्ध मुद्दा चलाउन लागेको हो ।
ब्यूरोले बिश्नोईको नाममा धम्की दिने झापाका हरिचन्द्र फुयाँललाई पक्राउ गरेर अनुसन्धान गरिरहेको छ । उनलाई सीआईबीले साइबर सेलको अनुरोधमा साइबर क्राइम मुद्दामा समातेको हो । प्रसाईंले पछिल्लो समय विवादित बयान दिँदै आएका छन् ।
प्रधानमन्त्री केपी शर्मा ओलीविरुद्ध विवादास्पद बयान दिएपछि उनी पक्राउ परेका हुन् । प्रसाईंलाई सीआईबीले नै ४ मंसिरमा भक्तपुरस्थित उनको निवासबाट पक्राउ गरेर साइबर ब्यूरोलाई बुझाएको थियो ।
प्रसाईंले कम्बोडियामा टेलिकम क्षेत्रमा प्रधानमन्त्री ओलीको लगानी रहेको आरोप लगाएका थिए । यसअघि उनी राष्ट्रिय स्वतन्त्र पार्टी (रास्वपा)की केन्द्रीय सदस्य टीका संग्रौलालगायतको चरित्र हत्या गरेको आरोपमा ६ असोजमा पक्राउ परेका थिए ।
यसैबीच प्रसाईंविरुद्ध संगठित अपराधको कसुरमा पनि अनुसन्धान हुने भएको छ ।
सीआईबीले सरकारी वकिल कार्यालयको रायअनुसार उनीमाथि संगठित अपराधको कसुरमा पनि अनुसन्धान अघि बढाइएको हो ।
सीआईबीका प्रवक्ता तथा एसपी होविन्द्र बोगटीले प्रसाईंमाथि आपराधिक लाभका साथै संगठित अपराधको कसुरमा अनुसन्धान अघि बढाइएको बताए ।
