लिस्बन : क्यान्सर रोगबाट पीडित गायिका इन्दिरा गोले गुरुङलाई पोर्चुगलबाट आर्थिक सहयोग गरिएको छ । नेपाल राष्ट्रिय तामाङ घेदुङ (संघ) पोर्चुगलले रकम संकलन गरेर गायिका गोलेको उपचार सहयोगार्थ आर्थिक सहयोग गरेको हो ।

घेदुङले पोर्चुगलमा सञ्चालन गरेको आर्थिक सहयोग अभियान अन्तर्गत संकलित दुई हजार तीन सय ४५ यूरो अर्थात् रु.तीन लाख ३२ हजार पाँच सय ७९ नगद रकम पीडित गोलेलाई उपलब्ध गराएको हो ।

सहयोग रकम ‘इन्दिरा गोले बचाउ अभियान’ का संयोजक योगेश लामा र नेपाल तामाङ कलाकार संघका अध्यक्ष विशाल काल्तेनमार्फत गोलेलाई हस्तान्तरण गरिएको घेदुङ पोर्चुगलका अध्यक्ष इमानसिंह तामाङले जानकारी दिए ।

पीडित गोलेको आर्थिक अवस्था कमजोर रहेको र उनको उपचारमा थोरै भएपनि सहयोग पूगोस् भन्ने उद्देश्यले आर्थिक संकलन गरेर सहयोग रकम नेपाल पठाइएको तामाङले बताए ।

पीडित गोलेको उपचार सहयोगार्थ नेपाल तामाङ कलाकार संघको संयोजकत्वमा ‘इन्दिरा गोले बचाउ अभियान’ सञ्चालन गरेर स्वदेश तथा विदेशमा आर्थिक सहयोग संकलन गरिएको थियोे । विगत दुई वर्षदेखि क्यान्सर रोगसँग लडिरहेकी गोले हाल उपचाररत छिन् । 

लामो समयदेखि सांगीतिक क्षेत्रमा समर्पित रहँदै आएकी गायिका गोलेले तामाङ सेलो र नेपाली लोक तथा दोहोरी गीतहरुमा स्वर दिएकी छन् ।