काठमाडौँ : नेपाली कांग्रेसका पूर्वसभापति शेरबहादुर देउवा पक्षले काठमाडौँ जिल्ला अधिवेशन सुरु गरेको छ । पार्टीभित्र नेतृत्व र आधिकारिकताको विवाद कायमै रहेका बेला देउवा समूहले शनिबार राष्ट्रिय सभागृहमा छुट्टै जिल्ला अधिवेशन आयोजना गरेको हो ।
अधिवेशनको उद्घाटन पूर्वसभापति देउवाले गरेका हुन् । उद्घाटनअघि बटुकहरूले स्वस्तिवाचन गरेका थिए भने देउवा पक्षका नेता तथा कार्यकर्ताले विभिन्न सांस्कृतिक झाँकीसहित र्याली निकालेका थिए ।
उद्घाटन समारोहमा देउवा पक्षको १५औँ महाधिवेशन आयोजक समितिका संयोजक डा। शशांक कोइराला, कांग्रेसका पूर्वमहामन्त्री प्रकाशमान सिंह, नेताहरू डा. प्रकाश शरण महत, मोहनबहादुर बस्नेतलगायत सहभागी भएका छन् ।
कांग्रेसभित्रको नेतृत्व विवादपछि देउवा पक्षले समानान्तर रूपमा संगठनात्मक गतिविधि र अधिवेशन प्रक्रिया अघि बढाउँदै आएको छ । गगन थापा नेतृत्वको पक्षले १५औँ महाधिवेशन सम्पन्न गरेर नयाँ नेतृत्व चयन गरिसकेको अवस्थामा देउवा समूहले छुट्टै महाधिवेशनको तयारी गरिरहेको हो ।
देउवा पक्षले यसअघि ६१८ स्थानीय तह र २६ जिल्लामा अधिवेशन सम्पन्न भएको दाबी गरेको थियो । उक्त समूहले वडा, पालिका, प्रदेशसभा तथा प्रतिनिधिसभा निर्वाचन क्षेत्र हुँदै जिल्ला अधिवेशन गर्ने कार्यतालिका अनुसार गतिविधि अघि बढाएको जनाएको छ ।
देउवा समूहले आगामी मंसिर २१ देखि २३ गतेसम्म काठमाडौँमा आफ्नो १५औँ महाधिवेशन आयोजना गर्ने तयारी गरेको छ । त्यसका लागि खुलामञ्च, राष्ट्रिय सभागृह र भृकुटीमण्डपलगायतका स्थान प्रयोग गर्ने योजना बनाइएको छ ।
कांग्रेसभित्र पार्टीको आधिकारिक नेतृत्व र महाधिवेशन प्रक्रियालाई लिएर दुई पक्षबीच विवाद छ । निर्वाचन आयोगले गगन थापा नेतृत्वको पक्षलाई आधिकारिक मान्यता दिएको भए पनि देउवा समूहले उक्त निर्णयप्रति असहमति जनाउँदै कानुनी चुनौती दिएको छ ।
यही विवादका बीच काठमाडौँमा सुरु भएको देउवा पक्षको जिल्ला अधिवेशनलाई समानान्तर महाधिवेशनको तयारीअन्तर्गतको अर्को संगठनात्मक गतिविधिका रूपमा हेरिएको छ ।
.jpg)
.jpg)
