काठमाडौँ : भारत भ्रमणमा रहेका आम जनता पार्टी (आजपाका) स्थायी कमिटी सदस्य विजय यादव निर्विज र गुजरातका ग्रामीण विकास, श्रम र रोजगारमन्त्री बलवंत सिंह राजपूतबीच शिष्टाचार भेटघाट भएको छ ।
गुजरातस्थित मन्त्रीको कार्यालयमा भएको भेटमा दुई देशबीचको धार्मिक, सांस्कृतिक, पर्यटन, आर्थिक विकास र सम्बन्धलाई प्रगाढ बनाउने विषयमा कुराकानी भएको भेटमा सहभागी आम उद्योग वाणिज्य संघका अध्यक्ष साजन जयसवालले बताए । साथै गुजरातमा रहेका नेपाली श्रमिकको सम्मान र सुरक्षाको विषयमा पनि कुराकानी भएको अध्यक्ष जयसवालले जानकारी दिए ।
भेटका क्रममा मन्त्री राजपूतले नेपालका पूर्वमन्त्री प्रभु साह नेतृत्वको आम जनता पार्टीले अपनाएको विचारधाराको प्रशंसा गर्दै निकट भविष्यमा नेपाल भ्रमण गर्ने प्रतिबद्धता व्यक्त गरे ।
केहीदिन अघिमात्रै समाजसेवी शेख इरसादको अध्यक्षता तथा स्थायी कमिटी सदस्य विजय निर्विजको प्रमुख आतिथ्यतामा मुम्बईमा आम नेपाली एकता समाजको विशेष बैठक सम्पन्न भएको थियो ।
नेपालका विभिन्न ठाउँबाट मुम्बई,नयाँ दिल्लीलगायतका सहरहरूमा काम गर्ने नेपालीहरूको सम्मान एवं सुरक्षाको लागी आजपा अध्यक्ष प्रभु साहको उपस्थितिमा चाडै बृहत् भेला आयोजना गर्ने पनि विजय निर्विजले बताए ।
