काठमाडौं : काठमाडौं टोखा नगरपालिकाले विष्णुमती करिडोर क्षेत्रमा रहेका सरकारी जग्गाहरुको संरक्षण अभियानका लागि रेखांकन सुरु भएको छ ।
दोस्रो चरणको विष्णुमती करिडोर निर्माण अन्तर्गत बुधबारबाट ग्राण्डी टावरदेखि बुढानिलकण्ठ क्षेत्रमा पर्ने सरकारी जग्गाको रेखांकन सुरु गरेको हो ।
बुधबार बिहान टोखा नगरपालिकाको नगर प्रमुख, उपप्रमुख, प्रमुख प्रशासकीय अधिकृतसहित वडाका जनप्रतिनिधिहरु, स्थानीयबासी, नेपाल प्रहरी, नगर प्रहरी र नापी कार्यालय टोखाको रोहवरमा नापजाँच कार्य सुरु भएको प्रमुख प्रशासकीय अधिकृत शेरबहादुर बिसीले जानकारी दिए ।
उनका अनुसार पहिलो चरणमा टोखा नगरपालिकाले नयाँ बसपार्कदेखि ग्राण्डी टावरसम्मको करिडोर क्षेत्रको जग्गा संरक्षण गर्दै सडकको ट्रयाक खोल्ने कार्य सम्पन्न गरेको छ । केही ठाउँमा कालोपत्रे समेत गरिसकेको छ । त्यस्तै टोखा ११ को मनमैजु पुलदेखि मनोहर तिर्थ धामसम्म १० फिटे फुटपाथ निर्माण सुरु गरेको छ ।
टोखा नगरपालिकाले मेरुदण्डको रुपमा विष्णुमती करिडोर सडक निर्माण कार्यलाई प्राथमिकता दिएको छ । विष्णुमती करिडोरमा नयाँबसपार्कदेखि बुढानिलकण्ठसम्म दुई लाइन सडकको ट्रयाक खोलिसकेपछि साङ्ले खोला करिडोर क्षेत्रमा व्यक्तिले हडपेका जग्गाहरु संरक्षण गर्ने उद्देश्य नगरपालिकाले लिएको छ ।
बुधबार भएको जग्गा नापजाँच टोखा वडा नं. ६ मा पर्ने विष्णुमती करिडोरमा पर्दछ । टोखा–६ मा शुभ होम्सले विष्णुमती करिडोर क्षेत्रमा कम्पाउण्ड वाल लगाएको छ । सो क्षेत्रको वालहरु सहमतिमै हटाएर करिडोर सडक निर्माण गरिने वडा नं. ६ का वडाध्यक्ष शान्ता खनालले जानकारी दिइन् ।
