काठमाडौं : निष्कासनमा परेका नेता भीम रावलले पार्टीमाथि लगाएको आरोपको एमालेले खण्डन गरेको छ ।
एमालेले रावलद्वारा सार्वजनिक ३१ पृष्ठको प्रश्न र आरोपलाई तत्कालीन नेकपाका अध्यक्ष पुष्पकमल दाहाल ‘प्रचण्ड’कै दस्तावेजको कपी पेस्टको संज्ञा दिएको छ । बिहीबार बसेको सचिवालय बैठकपछि उपमहासचिव प्रदीप ज्ञवालीले रावलले सार्वजनिक गरेको दस्तावेज सोही प्रकृतिको भएको टिप्पणी गरे ।
‘२०७७ साल कात्तिकमा लगभग यिनै भाषामा प्रचण्डले तत्कालीन नेकपा अध्यक्ष केपी शर्मा ओलीलाई यस्तै खालको टिप्पणी गर्नुभएको थियो,’ ज्ञवालीले भने, ‘सायद १९ पेजको थियो । एक हिसाबले कपी पेस्टजस्तै हो ।’
उनले गालीगलौजले देश नबन्ने पनि बताए । ‘एक जमाना थियो, बाबुराम भट्टराईजी, प्रचण्डजी पुराना दललाई डिक्सनरीमा भएका शब्द खोजीखोजी गाली गर्नुहुन्थ्यो,’ ज्ञवालीले भने, ‘रवि लामिछानेजी पनि गालीगलौजबाटै उदाएको हो । गालीगलौजले देश बन्दैन ।’
साढे ३० पृष्ठको गालीगलौज र आधा पृष्ठ मात्र योजना रहेकाले रावलमा कति नकारात्मकता रहेछ भन्ने प्रस्ट भएको ज्ञवालीले टिप्प्णी गरे ।
रावलको अभिव्यक्ति अपेक्षित नै भएको उल्लेख गर्दै एमाले गालीगलौजको प्रतिस्पर्धामा नरहेको बताए । संगठित सदस्यता खोसिएपछि रावलले बुधबार एमाले अध्यक्ष एवं प्रधानमन्त्री केपी शर्मा ओलीमाथि ७४ प्रश्न र आरोप लगाएका थिए ।
पार्टी केन्द्रीय कार्यालयमा बसेको सचिवालय बैठकका निर्णय सुनाउँदै ज्ञवालीले पुस २१ र २२ गते बस्ने केन्द्रीय कमिटीका निम्ति तयार गरिएको राजनीतिक प्रतिवेदन प्रस्तुत गर्ने निर्णय गरेको जानकारी पनि दिए । उनले राजनीतिक प्रतिवेदनका मुख्य मुख्य विषयहरूमा छलफल भएको पनि बताए ।
साथै सरकार गठन यताको ६ महिनाको समीक्षा गरिएको र सरकारले ६ महिनामा महत्वपूर्ण उपलब्धि हासिल गरेको तर पर्याप्त नरहेको निष्कर्ष पार्टीको रहेको उनले जानकारी दिए ।
नागरिकलाई सेवा प्रवाह, विकास निर्माण, अर्थतन्त्रलाई लयमा फर्काउन सरकारले अझ बढी ध्यान केन्द्रित गर्नुपर्ने सुझाव आएको उनले बताए । ज्ञवालीले प्रतिनिधि सभा विघटन, नेकपा विभाजन लगायतका विषय रावलले उठाएको भन्दै तिनै मुद्दा तत्कालीन गठबन्धनले चुनावमा लगेपनि जनताको रोजाइमा एमाले रहेको देखिएको दाबी गरे ।
