-ताज मोहम्मद मियाँ (हज कमिटीका पूर्वअध्यक्ष)
नेपाली मुस्लिम समुदाय गलत रहेछन भन्ने कुरा मुस्लिम आयोगको गतिविधिले प्रमाणित गरिदिएको छ । प्रसंग मुस्लिम आयोगले गठन गरेको कथित अनुगमन उपसमितिको हो । मुस्लिम आयोगले नेपालका कुनै पनि मस्जिदमा जमाती लुकेका छैनन र फसेका पनि छैनन भन्यो । हामीले पनि त्यही भन्यौं । मस्जिदमा कोही लुकेका छैनन र फसेका पनि छैनन भने आखिर यो अनुगमन केका लागि हा ? किन यो अनुगमनको नाममा मुस्लिम समुदायलाईमात्र आतंकित पारिएको छ ? के नेपालमा मुस्लिम धर्मावलम्बीहरुमात्र छन ? कसलाई देखाउन र कसलाई रिपोर्ट बुझाउन यस्ता कार्य गरिएको छ ? यसको भित्री उद्देश्य के हो ? यी र यस्ता कैयन सवालबारे गम्भीर भएर सोच्नुपर्ने समय आएको छ । या त नेपाली मुस्लिम कोरोना भाइरस फैलाउनमा सक्रिय रहेका वा कोरोना बम मुस्लिम हो भन्न सक्नुपर्यो होइन भने मुस्लिम आयोगले घुमाउरो पाराले विशेषत: मुस्लिमहरुलाई मात्र अनुगमन र खानतलासी किन गर्नुपर्यो ?
नेपालमा ५–६ वटा यस्ता आयोग छन , तर ती संबैधानिक आयोगले यस्तोमा किन हात हाल्दैनन् । मुस्लिम आयोगको उक्साहटमा बारम्बार मस्जिद मदरसामा केका लागि प्रहरी प्रशासनले अनुगमन गर्दैछ राज्यले ? नेपालमा मुस्लिमहरुकामात्र धार्मिक स्थल छन ? यो अनुगमन समिति बनाउँदा यसले के असर पार्छ समुदाय समुदायबीच ? एउटा बिशेष समुदाय अपराधी जस्तो भएर खुम्चेर बस्छ भने अरु समुदायले सधैं मुस्लिमहरु त यस्ता पो रहेछन् भनेर कोच्नेछ्न र समुदाय अपमानित भएर बस्न बाध्य हुनेछ सधैंका लागि । के यही हो आयोग को काम र कर्तव्य ? यो सिंगो समुदायलाई अपराधीकरण गर्न आयोग किन तल्लीन छ, यो सम्पुर्ण मुस्लिम समुदायहरुले बुझ्नु जरुरी छ ।
आयोगको यो अतिबादी सोचका कारण नेपाली मुस्लिम दोस्रो दर्जाको नागरिक हो भन्ने एकातिर प्रमाणित गरेको छ भने अर्कोतिर आफूबाट भए गरेका गल्ती उपसमिति नामक अस्त्रमार्फत् समुदायको टाउकोमा तरवार धुण्याउने जमर्को गरेको देखिन्छ । हिजो र आज सामाजिक संजालमा आयोगले नियुक्ति दिएका ब्यक्तिले सूची राखेको देखियो । वास्तवमा यो आफैमा अबैधानिक पनि छ । त्यो सूचीभित्र नाम परेका केही ब्यक्ति खुसीले फुलेका छन् भने नाम नपर्ने ब्यक्ति मन दुखाएर मरिच जसरी खुम्चेका पनि छन् । यो फुल्नु पनि गलत हो र खुम्चिनु पनि गलत हो । आयोग र आयोगलाइ समर्थन गर्न तम्सेका दुई चार जनाको दिमागमा यो किन गएन कि यो धर्मनीरपेक्ष मुलुक हो, यहाँ राज्यले सबैलाइ समान नीति नियम बनाएको छ र कसैलाइ काखा कसैलाइ पाखा राज्यले पटक्कै गरेको छैन भनेर । तब पनि आखिर मुस्लिम समुदायको धार्मिकस्थलमा अनुगमन किन भनेर सोच्न सक्नु भएन ? यो आत्मघाती र दुर्भाग्यपूर्ण कदम हो ।
त्यसै त मुस्लिम समुदाय विभिन्न भारतीय वा स्वदेशी बिकाउ मिडियाद्वारा लगाइएको आरोपबाट तनावमा रहेकाे छ । त्यसमा पनि यो अनुगमनले मुस्लिमले नै कोरोना फैलाउने प्रमुख भूमिका खेलेको र मस्जिद मदरसामा लुकिछुपी बसेका छन् भन्ने कुरा प्रमाणित गरेको छ । अधिकॉश मुस्लिम समुदायहरुले यो बिषयलाई गम्भीरतापूर्वक लिएका छन् र लिने पनि छन् । यो देशमा सदियौंदेखि मिलेर बसेका समुदाय–समुदायबीच शंका उपशंका गराउनेतिर आयोग नलागाेस र सद्भाव सहिष्णुता एकतामा जोड देओस । राज्यले मुस्लिमका लागि एउटा कानुन, अरुका लागि अर्को कानुन अहिलेसम्म लागू गरकाे पनि छैन र गर्ने पनि छैन । तसर्थ आयोगले मिलेर बसेका समुदाय समुदायहरु बीच अविश्वासको बातावरण सिर्जना गराउने काम नगरोस् भन्ने आग्रह गर्दै यस्ता उट्पट्याङ खालका काम नगर्न सचेत समेत गराउँदछु ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies