नुवाकोट : नुवाकोटको बिदुर–१३ स्थित श्री अजिङ्गरे माविले आफ्नो ४२औं वार्षिकोत्सव भव्य रूपमा सम्पन्न गरेको छ ।
कार्यक्रमका प्रमुख अतिथि बागमती प्रदेशका मुख्यमन्त्री बहादुर सिंह लामाले विद्यालयको विकास र विद्यार्थीहरूको उज्ज्वल भविष्य सुनिश्चित गर्न प्रदेश सरकार सदैव प्रतिबद्ध रहेको बताए ।
उनले शिक्षा क्षेत्रको सुधार र प्रवर्द्धनका लागि सामुदायिक विद्यालयहरूको योगदान प्रशंसनीय रहेको भन्दै विद्यालयको प्रगतिको प्रशंसा गरे । मुख्यमन्त्री लामाले शिक्षा मात्र एक यस्तो साधन हो, जसले समाजको रूपान्तरण गर्न सक्ने बताउँदै विद्यालयले स्थानीय स्तरमा शिक्षा विकासमा खेलेको भूमिकाको सराहना गरे ।
विद्यालय व्यवस्थापन समितिका अध्यक्ष राजकुमार अधिकारीको सभापतित्वमा कार्यक्रम सम्पन्न भएको थियो ।
कार्यक्रममा जिल्ला समन्वय समिति नुवाकोटका प्रमुख रजिन्द्र बिक्रम ठकुरी, उपप्रमुख दलबहादुर तामाङ, बिदुर नगरपालिकाका प्रमुख राजन श्रेष्ठ, उपप्रमुख प्रभा बोगटी तथा अभिभावकहरूको उपस्थिति रहेको थियो ।
विद्यार्थीहरूको सांस्कृतिक प्रस्तुतिले कार्यक्रममा रौनक थपेको थियो ।
विद्यालयका प्रधानाध्यापक रामकृष्ण भण्डारीले विद्यालयको आय-व्यय र प्रगति अवस्थाबारे जानकारी गराउँदै शिक्षा क्षेत्रमा योगदान पुर्याउने व्यक्तित्वहरूलाई सम्मान गरिएको जानकारी दिए । सो अवसरमा गत वर्ष एसईईमा उत्कृष्ट नतिजा (ए+) ल्याउन सफल छात्र छितिज तामाङलाई शिक्षक कृष्ण थापाको नेतृत्वमा संकलन गरिएको २२ हजार रुपैयाँ प्रोत्साहन स्वरूप प्रदान गरिएको थियो ।
यसै अवसरमा नेपाली साझा मञ्च साउदीका संस्थापक तथा संरक्षक कृष्ण पुरीले बिदुर–१३ का गरिब तथा पीडित ८ जना विद्यार्थीलाई स्कुल ड्रेस र शैक्षिक सामग्री प्रदान गरे । यो सहयोगले शिक्षा र समाजसेवाका माध्यमबाट सकारात्मक सन्देश प्रवाह गरेको भन्दै उनीप्रति विद्यालयले आभार व्यक्त गर्यो ।
