काठमाडौं : कोरोना भाइरसका कारण रोजगारी गुमाई वा अन्य विभिन्न कारणले भारतबाहेक अन्य देशमा अलपत्र परेकामध्ये कम्तीमा २५ हजार नेपालीलाई नेपाल ल्याइने सहमति भएको छ । कोरोना भाइरस रोकथाम तथा नियन्त्रण उच्चस्तरीय समन्वय समितिको शुक्रबारको बैठकले विदेशमा समस्यामा रहेकाहरुको प्राथमिकताको आधारमा एक हप्तादेखि १० दिनभित्र उनीहरुलाई नेपाल ल्याउने निर्णय गरेको छ ।
समितिले नेपाल फर्काउनुपर्ने बाध्यतामा रहेका नेपालीहरुको विवरण संकलन गरी पेश गर्न परराष्ट्र मन्त्रालयलाई निर्देशनसमेत दिएको छ । मन्त्रिपरिषद्ले यसअघि पारित गरेको विदेशमा रहेका नेपालीलाई ल्याउने कार्यविधि अनुसार कार्ययोजना बनाएको समितिले जनाएको छ ।
श्रोतका अनुसार सरकारले यकिन गरेको २५ हजारको संख्यामा यूएई, कतार र मालदिभ्समा रहेका कामदारसहित बंगलादेशमा रहेका विद्यार्थी समेत रहेका छन् । यूएईमा रहेका गर्भवती महिला र कुवेतमा गत अप्रिल अन्तिमहप्ता आममाफी पाएर देश फर्किन सरकारी सेल्टरमा रहेका करिब ३ हजार नेपाली पहिलो प्राथमिकतामा रहेको बताइएको छ ।
अलपत्र रहेका नेपालीमध्ये केहीलाई ल्याउन नेपालबाट विमान पठाइने र केहीलाई सम्वन्धित देशसँग आग्रह गरी विमान चार्टर गरेर ल्याइने बताइएको छ । नेपाल आएपछि उनीहरुमध्ये आर्थिक हैसियतमा सक्षमलाई उनीहरुकै खर्चमा काठमाडौंका होटलमा राखी स्वास्थ्य परीक्षण गरी स्थानीय तहका क्वारेन्टाइनमा बस्ने गरी पठाउने कार्ययोजना बनेको छ ।
होटलको क्वारेन्टाइनमा बस्नेको व्यवस्थापन पर्यटन मन्त्रालयले गर्ने छ । फर्किनेहरूको वर्गीकरण गरेर रोजगारी गुमाई खर्च नभएकाहरूलाई सरकारले क्वारेन्टाइनमा बस्दाको खर्च व्यवस्था गर्ने बताइएको छ । स्वदेश फर्काउँदा पनि कम्पनीले जहाज टिकट दिएर पठाउने, कामदार आफ्नै खर्चमा आउने र नेपाल सरकारले टिकट व्यहोर्नुपर्ने फरक–फरक समूह बनाइने भएको छ ।
विदेशमा हजारौं नेपाली संक्रमित रहेका छन् । २३ जना नेपालीको कोरोना भाइरसका कारण मृत्यु भइसकेको छ । परराष्ट्र मन्त्री प्रदीप ज्ञवालीले करिब ६ लाख नेपालीको उद्धार गर्नुपर्ने र करिब ३ लाख आधालाई तत्काल उद्धार गर्नुपर्ने संसदीय समितिलाई जानकारी दिएका छन् ।
शुरुमा विदेशमा रहेका नेपालीलाई फर्काउनै नसकिने बताएका प्रधानमन्त्री केपी शर्मा ओलीले केही दिनअघि राष्ट्रका नाममा संवोधन गर्दा भने विदेशमा रहेका नेपालीहरुलाई स्वदेश फर्काउन आदेश जारी गर्ने बताएका थिए । बिहीबार सार्वजनिक आगामी आर्थिक वर्षको बजेटमा विदेशमा अलपत्र परेका नेपालीहरुलाई फिर्ता ल्याउन बजेट छुट्याएको अर्थमन्त्री डा. युवराज खतिवडाले बताएका थिए ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies