.jpg)
विराटनगर : प्रेस चौतारी मोरङको अध्यक्षमा चिना थापा निर्वाचित भएकी छन् । विराटनगरमा शनिबार सपन्न नवौं जिल्ला अधिवेशनले सर्वसम्मतरुपमा अध्यक्षमा थापालाई निर्वाचित गरेको हो । थापा प्रेस चौतारी मोरङको पहिलो महिला अध्यक्ष हुन् ।
त्यसगरी कार्यसमितिको उपाध्यक्षमा शशांक पौडेल, महिला उपाध्यक्षमा रञ्जना अधिकारी, सचिवमा नवराज भट्टराई, सहसचिवमा कृष्णचन्द्र सुवेदी, समावेशी सहसचिवमा राजकुमारी तामाङ र कोषाध्यक्षमा पुन्य पी अधिकारी सर्वसम्मत निर्वाचित भएका छन् ।
सदस्यहरुमा निशान्त ढुंगाना, विशाल मण्डल, प्रमोद कार्की, सामना भट्टराई, संगीता राई, शिशिर राई, शिवशंकर परिहस्त, रोहन राई, दीपक खड्का, रामकुमार शर्मा, रोमा दाहाल, कुलदीप बाँस्तोला, विवेक खतिवडा र सुमना भट्टराई चयन भएका छन् । जिल्ला अधिवेशनले आगामी माघ ३० गते विराटनगरमा हुने प्रदेश अधिवेशनका लागि प्रदेश परिषद् सदस्य र फागुन २५–२७ सम्म विराटनगरमा हुने १०औं महाधिवेशनका लागि केन्द्रीय परिषद् सदस्य पनि चयन गरेको छ ।
जिल्ला अधिवेशनको उद्घाटन कार्यक्रममा मुख्यमन्त्री हिक्मतकुमार कार्की, प्रेस चौतारी नेपालका अध्यक्ष गणेश बस्नेत, सचिव विक्रम लुइँटेल, एमाले केन्द्रीय सदस्य जीवन घिमिरे, रामलाल साह, केन्द्रीय सल्लाहकार परिषद् सदस्य विनोद ढकाल, एमाले प्रदेश कमिटी अध्यक्ष घनश्याम खतिवडा, मोरङ अध्यक्ष बाबुराम कार्की, कोशी प्रदेश प्रचार तथा प्रकाशन विभागका प्रमुख लक्षुमण तिवारी, नेपाल पत्रकार महासंघ केन्द्रीय सदस्य कमल रिमाल, प्रदेश अध्यक्ष भरत खड्का, मोरङ अध्यक्ष सुशीला पाठकलगायतले शुभकामना मन्तव्य राखेका थिए ।
शालिग्राम–मञ्जु दाहाल पत्रकारिता पुरस्कार महेन्द्र विष्टलाई
प्रेस चौतारी नेपालले हरेक वर्ष प्रदान गर्ने शालिग्राम–मञ्जु दाहाल पत्रकारिता पुरस्कार विराटनगरका अग्रज पत्रकार महेन्द्र विष्टलाई प्रदान गरिएको छ ।
जिल्ला अधिवेशनका अवसरमा शनिबार अरुण खबरका प्रधानसम्पादक समेत रहेका विष्टलाई नगद २१ हजार रुपैयाँसहित कोशी प्रदेशका मुख्यमन्त्री कार्कीले सम्मान गरेका हुन् ।
सो पुरस्कारबाट यसअघि वरिष्ठ पत्रकारहरु यज्ञ शर्मा, लीलाराज भट्टराई, रमेशचन्द्र अधिकारी पुरस्कृत भइसकेका छन् । प्रेस चौतारी मोरङले वार्षिकरुपमा कोशी प्रदेश कार्यक्षेत्र भएका पत्रकारहरुलाई सम्मान गर्दै आएको छ ।
