.jpg)
रौतहट : रौतहट सदरमुकाम गौर नगरपालिकाले गृह मन्त्रालयद्वारा सञ्चालित केन्द्रिकृत नागरिकता सूचना व्यवस्थापन प्रणाली नागरिकता सिफारिस सेवा अनलाइनमार्फत सुरु गरेको छ ।
सेवा सुरु गर्ने गौरनगरपालिका जिल्लाको पहिलो नगरपालिका बनेको छ । गौर नगरपालिकाको वडा नं. ६ र ९ बाट यो सेवा सुरु गरिएको हो । प्रणालीमार्फत वडाहरूले अनलाइनमार्फत नागरिकता सिफारिस गर्ने प्रक्रियालाई छरितो, सरल, र प्रभावकारी बनाउन मद्दत गर्ने बताइएको छ । नागरिकहरूले यसबाट लामो प्रक्रियालाई छोट्याउँदै डिजिटल प्रविधिको फाइदा लिन सक्नेछन् ।
कार्यक्रममा पहिलो अनलाइन सिफारिस वडा नं. ६ निवासी सीमा कुमारीलाई प्रदान गरिएको छ ।
यस प्रणालीले सबै नागरिकका विवरणहरू व्यवस्थित रूपमा राख्न, अद्यावधिक गर्न र आवश्यक परेमा छिटो उपलब्ध गराउन विशेष योगदान पु¥याउने अपेक्षा गरिएको छ ।
जिल्ला प्रशासन कार्यालयसम्म सिफारिस पुर्याउने प्रक्रिया अब डिजिटल माध्यमबाट हुनेछ । यसले लामो प्रशासनिक झन्झट हटाउँदै, नागरिकलाई सहज र छिटो सेवा प्राप्त हुने सुनिश्चित गरिने बताइएको छ ।
गौर नगरपालिकाको वडा नं. ९ का वडाध्यक्ष अर्जुन सिंहले उद्घाटन समारोहको नेतृत्व गर्दै अनलाइन सिफारिस प्रणालीको औपचारिक सुरुवात गरेका थिए । उनले यो प्रणालीले नागरिकता प्राप्तिको जटिलतालाई हटाउँदै नागरिकलाई थप सहजता दिने उल्लेख गरे । साथै, यो सेवा संचालनमा ल्याउन गौर नगरपालिकाका कर्मचारीहरूको अथक प्रयास रहेको उनले बताए ।
कार्यक्रममा निमित्त प्रमुख प्रशासकीय अधिकृत सुभाष ठाकुर, सूचना प्राविधि अधिकृत रौशन श्रीवास्तव, र कानुन अधिकृत धीरज कुमार लाल दासको विशेष भूमिका रहेको छ । उनीहरूले यस प्रणालीको प्रभावकारिता र यसको दीर्घकालीन महत्वबारे आफ्नो विचार प्रस्तुत गरेका थिए ।
अनलाइन प्रणाली लागू भएपछि नागरिकहरूले वडामा गइ कागजी प्रक्रिया पुरा गर्नुपर्ने झन्झटबाट मुक्ति पाउने वडाअध्यक्ष सिंहले बताए । यसले समय, स्रोत र श्रमको बचत हुने उनको भनाइ छ ।
गौर नगरपालिकाले प्रणालीका अतिरिक्त अन्य डिजिटल सेवाहरू पनि थप गर्दै लैजाने योजना बनाएको छ । नगरपालिकाका सबै वडाहरूलाई क्रमशः प्रणालीमा समेट्ने र सेवाको दायरा विस्तार गर्ने तयारी भइरहेको निमित्त प्रमुख प्रशासकीय अधिकृत सुभाष ठाकुरले बताए । गौर नगरपालिकाको यो डिजिटल कदमले स्थानीय प्रशासनलाई थप प्रभावकारी बनाउँदै नागरिकहरूका लागि अत्याधुनिक सेवा छिटो र पारदर्शी बनाउने विश्वास लिइएको उनले बताए ।
